00:00:00 IGIHE NETWORK KN KINYARWANDA EN ENGLISH FR FRANCAIS

Inyungu ya BK Group Plc yageze kuri miliyari 23 Frw mu gihembwe cya mbere cya 2024

Yanditswe na Ndahayo Emmanuel
Kuya 31 May 2024 saa 11:36
Yasuwe :

Inyungu y’Ikigo BK Group Plc yazamutseho 33.6% mu gihembwe cya mbere cya 2024 (cyarangiye ku italiki ya 31 Werurwe), igera kuri miliyari 23.9 Frw, bingana na miliyoni 18.5$, ivuye kuri miliyari 17.8 Frw mu gihembwe cya mbere cya 2023.

Iri zamuka ahanini ryagizwemo uruhare n’ishoramari iki kigo cyakoze mu nzego zinyuranye, ndetse n’imikoreshereze myiza y’umutungo muri rusange.

Banki ya Kigali, nka kimwe mu bigo bigize BK Group Plc, nayo yitwaye neza cyane muri iki gihembwe, dore ko inyungu yayo yazamutse ikagera kuri miliyari 22.5 Frw, ivuye kuri miliyari 17.4 Frw, izamuka rya 28.8% ugereranyije n’igihembwe cya mbere cy’umwaka ushize.

Muri rusange iyi banki yinjije miliyari 61.3 Frw muri iki gihembwe, avuye muri miliyari 51.1 Frw mu gihembwe cya mbere cy’umwaka ushize. Mbere yo kwishyura imisoro, inyungu yacyo yari miliyari 31.4 Frw, yaje kuba miliyari 22.5 Frw nyuma yo kwishyura imisoro.

Ibi byatewe ahanini n’izamuka ry’inguzanyo iki kigo cyatanze, zageze kuri miliyari 1.328 Frw zivuye kuri miliyari 1.244 Frw.

Icyizere abakiliya bakomeje kugirira iyi banki nacyo kiri hejuru, dore ko yababikiye agera kuri miliyari 1.392 Frw avuye kuri miliyari 1.387 Frw.

Umuyobozi Mukuru wa BK Group Plc, Béata U. Habyarimana, yavuze ko bishimiye iri zamuka kuko rigaragaza akazi katoroshye kakozwe n’iyi banki mu gukomeza guteza imbere imikorere yayo.

Yanishimiye kandi uburyo ubukungu bw’u Rwanda bukomeje kuzanzamuka bwikura mu ngaruka bwagizweho na Covid-19 zirimo izamuka ry’ibiciro, ibi bikaba binaherutse gutuma Banki Nkuru y’u Rwanda imanura inyungu fatizo ikayigeza kuri 7%, ashimangira ko “Bizatuma tugira ubwisanzure bwisumbuye mu gutanga serivisi no kudahunganywa n’izamuka ry’ibiciro.”

Umuyobozi Mukuru wa Banki ya Kigali, Dr. Diane Karusisi, na we yavuze ko bashyizeho gahunda zirimo gukoresha ikoranabuhanga mu rwego rwo kurushaho kwiyegereza abakiliya, ndetse no intego ari ukurushaho gushaka ibisubizo bizatuma abagana iyi banki batera imbere kurushaho.

Icyakora ku rundi ruhande, inguzanyo zitishyurwa neza zarazamutse, ziva kuri miliyari 86 Frw zigera kuri miliyari 112 Frw, ibigize 5.7% by’inguzanyo iyi banki yagombaga kwishyurwa, bivuye kuri 4.5% mu gihembwe cya mbere cy’umwaka ushize.

Icyakora ku rundi ruhande, inguzanyo zavuguruwe zaragabanutse, kuko ubu zigize 22.54% by’inguzanyo zose z’icyo kigo, zivuye kuri 24.46% mu gihembwe cya mbere umwaka ushize, ibi bikatanga icyizere cy’uko inguzanyo zitishyurwa neza zishobora kuzagabanuka mu minsi iri imbere.

Habyarimana yavuze ko “Dufite intego yo gukomeza gutanga serivisi nziza mu rwego rwo gufasha abakiliya bacu kugera ku ntego zabo.”

Yashimangiye ko n’ibindi bigo biri muri BK Group Plc, birimo BK Tech House, BK Insurance, BK Capital na BK Foundation, byose biri kwitwara neza muri rusange.

Ku bafite imigabane muri Banki ya Kigali, inyungu ku mugabane yageze kuri 25 Frw ivuye kuri 19 Frw, biturutse muri iri zamuka ry’inyungu y’iyi banki.

Imigabane ya Banki ya Kigali igurirwa ku Isoko ry’Imari n’Imigabane ry’u Rwanda (RSE) ndetse n’Isoko ry’Imari n’Imigabane ry’i Nairobi muri Kenya (NSE).

Umutungo rusange wa banki ya Kigali ugeze kuri miliyari 2.152 Frw uvuye kuri miliyari 2.062 wariho mu gihembwe cya mbere cy’umwaka ushize.

Umuyobozi Mukuru wa BK Group Plc, Béata U. Habyarimana, yavuze ko bishimiye iri zamuka kuko rigaragaza akazi katoroshye kakozwe n’iyi banki mu gukomeza guteza imbere imikorere yayo
Umuyobozi Mukuru wa Banki ya Kigali, Dr. Diane Karusisi, yavuze ko bafite intego yo kunoza serivisi batanga
Banki ya Kigali, nka kimwe mu bigo bya BK Group Plc, yabonye inyungu ishimishije mu gihembwe cya mbere cy'uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .