Inyungu ku nguzanyo za VUP igiye gushyirwa kuri 2%, itangwe umushinga urangiye

Yanditswe na Evariste Nsengimana
Kuya 27 Ugushyingo 2019 saa 09:38
Yasuwe :
0 0

Inyungu ku nguzanyo zo gukora imishinga iciriritse ibyara inyungu ku baturage bo mu cyiciro cya mbere n’icya kabiri by’ubudehe bahabwa binyuze muri gahunda ya VUP, igiye gushyirwa kuri 2% mu gihe cy’umushinga, ikuwe kuri 11% yatangwaga ku mwaka bigatuma abagenerwabikorwa bayitera umugongo.

Mu 2008 nibwo izo nguzanyo ku batishoboye zashyizweho zigamije kubakura mu bukene, biteganyijwe ko umuntu uzajya uyihabwa azajya atanga inyungu ya 2%.

Ibi siko byubahirijwe kuko wasangaga umuturage yakwa inyungu ya 2% buri kwezi, ku mwaka ugasanga yishyuye 24% ariko nyuma biza kuvugururwa ashyirwa kuri 11% nabwo ku mwaka, ibintu byatumye bamwe bahitamo kutayifata.

Mu 2017 IGIHE yatangaje inkuru igaragaza ko hari amafaranga yaheze kuri konti z’imirenge Sacco kubera ko abayagenewe banze kuyaguza, kubera inyungu nyinshi. Nko mu Murenge wa Nyarusange mu Karere ka Muhanga, mu 2016 bari bafite miliyoni zisaga 100 Frw zigenewe inguzanyo ya VUP, zidakoreshwa.

Uretse inyungu ihanitse, abaturage bavugaga ko ikindi gituma badafata iyo nguzanyo ari uko bayihabwa bamaze gutanga ingwate ku masambu yabo.

Ubwo yari mu Nama y’Igihugu y’Umushyikirano ya 16 yabaye mu 2018, Perezida Paul Kagame yabajije uburyo inyungu yongerewe, ikavanwa kuri 2% ikagezwa kuri 11%, abaza uwafashe icyo cyemezo ntiyaboneka.

Icyo gihe Guverineri wa Banki Nkuru y’Igihugu, Rwangombwa John, yavuze ko inyungu ya 2 % yakwaga ku nguzanyo z’abatishoboye yatangwaga buri kwezi, umwaka ugashira batanze inyungu ya 24 %, mu gihe inyungu ya 11 % yashyizweho itangwa ku mwaka.

Icyo gisobanuro ariko nticyanyuze bamwe kuko Karengera Narcisse wo mu karere ka Nyaruguru yagize ati “Ndi mu bayafashe, inyungu natanze ni 2 %. Impamvu mbivuze ni uko bavuze ngo bagiye kucyiga, nsanga nibakigira ku mafaranga 11% bizagira ingaruka ku muturage wayabonaga kuri 2 %.”

Rwangombwa yahise avuga ko inzego bireba zigiye kubisuzuma neza.

Umunyamabanga wa Leta muri Minisiteri y’Ubutegetsi bw’Igihugu (Minaloc) ushinzwe imibereho myiza y’abaturage, Nyirarukundo Ignatienne, yabwiye IGIHE kuri uyu wa 27 Ugushyingo 2019 ko iyo nyungu igiye gushyirwa kuri 2%.

Ati “Uko bimeze rero [inyungu] yavuye kuri 11% igera kuri 2%. Ubwo ni ukuvuga ngo niba umuntu asabye ibihumbi 100 Frw azajya yishyura ibihumbi 102Frw. Ntibizamubuza gukora ariko nibura ntibizamubera umutwaro mu gihe ataratera imbere. Azaba ari ayo atari ukuvuga ngo ni ku mwaka ahubwo ari ku gihe cy’umushinga.”

Yavuze ko inzego z’ubuyobozi bw’ibanze zirimo guhugurwa ku mitangire y’iyi nguzanyo no gukurikirana uko akoreshwa ku buryo nyuma y’Ukuboza uyu mwaka bizatangira gushyirwa mu bikorwa.

Nyirarukundo yavuze ko ibigenderwaho mu guha umuturage utishoboye iyo nguzanyo nabyo bizavugururwa ku buryo nibura izajya ihabwa umuntu ushobora kuyibyaza umusaruro, asaba abantu guhindura imyumvire, cyane cyane abayifata nk’inkunga bakirengagiza ko bazayishyura.

Umwanzuro wo gushyira iyi nyungu kuri 2% kandi igatangwa mu gihe cy’umushinga witezweho gufasha abagenerwabikorwa b’iyi gahunda kuko hari abayatinyaga.

Dusabimana Clementine wo mu Karere ka Gisagara yagize ati “Benshi twatinyaga gufata ariya mafaranga kubera gutinya ko azaba menshi bakadutereza utwacu cyangwa ugasanga umushinga nta nyungu tuwukuyeho ariko bashyize kuri 2% kugeza umushinga urangiye. Ni ikintu cyafasha uwahawe gukora umutima uri hamwe nawe akiteza imbere.”

Ubushakashatsi bwa Gatanu ku Mibereho y’Ingo (EICV 5) buherutse kugaragaza ko kuva mu 2014 kugeza mu 2018, ubukene bwagabanutseho 0.9 % buva kuri 39.1 % bugera kuri 38.2 %.

Ni igabanuka rito ugereranyije n’ubushakashatsi bwo mu 2014. EICV ya gatatu yo mu 2011 yerekanye ko abakene bari 46% , iya kane yo mu 2014 yerekana ko abakene ari 39.1%,ni ukuvuga ko bagabanutse ku kigero cya 6.9 %.

Umunyamabanga wa Leta muri Minisiteri y’Ubutegetsi bw’Igihugu (Minaloc) ushinzwe imibereho myiza y’abaturage, Nyirarukundo Ignatienne, yavuze ko inyungu ya 2% izajya yishyurwa mu gihe cy'umushinga aho kuba 11% ku mwaka

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza