Umuyobozi wungirije w’Akarere ka Karongi ushinzwe Ubukungu n’Iterambere, Niragire Theophile, yabwiye IGIHE ko ibikorwa byo gutanga amasoko biri kugana ku musozo.

Ati “Bizatwara arenga miliyari 2,5 Frw. Ikindi ni uko turi mu masoko ya nyuma, yo gushaka abazakurikirana imirimo, turatekereza ko muri uku kwezi kwa Gicurasi cyangwa Kamena imirimo yo kubaka yatangira kuko ibijyanye no gutanga amasoko biragana ku musozo.”

Akarere ka Karongi kakorega mu Murenge wa Rubengera mu kagari ka Kibilizi mu nzu itisanzuye.

Guverineri w’Intara y’Iburengerazuba, Habitegeko François , avuga ko mbere yo gufata umwanzuro wo kwimurira Ibiro by’Akarere mu Murenge wa Bwishyura, abaturage bagishijwe inama.

Ati “Akarere rero kuba kava [mu Murenge wa] Rubengera kakajya mu Murenge wa Bwishyura ibyo ari byo byose hari impamvu. Abakozi b’Akarere bagomba gutangira serivisi ahantu heza, niba aka karere karafashwe nk’Umujyi ntabwo Ibiro byako byakorera muri nyakatsi.”

Byitezwe ko Ibiro bishya by’Akarere bizazamura isura y’Akarere ka Karongi bikanarushaho gukuza Umujyi wa Karongi muri rusange.

Ikibanza kizubakwamo inyubako nshya y'Akarere ka Karongi

Akarere ka Karongi kari gasanzwe gakorera mu nyubako nto

Byitezwe ko iyi nyubako izahindura isura y'Akarere ka Karongi

Inyubako nshya y'Ibiro by'Akarere ka Karongi izuzura nyuma y'imyaka ibiri

Iyi nyubako izatwara miliyari 2,5 Frw

Igishushanyo mbonera cy'Inyubako nshya y'Ibiro by'Akarere ka Karongi