Inyongera ya 10% ku mushahara, inguzanyo ya miliyari 160 Frw: Bimwe mu byakozwe mu kwita ku mwalimu

Yanditswe na IGIHE
Kuya 2 Ukuboza 2020 saa 11:50
Yasuwe :
0 0

Minisitiri w’Intebe, Dr Edouard Ngirente, yagaragaje ko Guverinoma ikomeje gukora ibishoboka byose mu kwita ku mibereho y’abalimu, nka bamwe mu bakora imyuga mu bwitange bukomeye.

Kuri uyu wa Mbere ubwo yari mu Nteko Ishinga Amategeko, Minisitiri w’Intebe yavuze ko hari byinshi Guverinoma yakoze n’ubu bigikomeje, byerekeranye no kuzamura imibereho myiza ya mwalimu, birimo gutera inkunga Umwalimu SACCO ku buryo bugaragara.

Ibyo bigakorwa nk’uburyo bwo kuyongerera ubushobozi bwo guha inguzanyo zifasha abalimu kwiyubakira amacumbi no gukora imishinga itandukanye ibabyarira inyungu.

Yagize ati “Kuva mu 2017 kugeza mu 2019, Leta imaze gutera inkunga Umwalimu SACCO ku buryo bugaragara, kandi twabonye ingaruka nziza ku buryo ifasha abanyamuryango bayo. Iyi nkunga ya Leta ndetse n’imigabane shingiro y’abanyamuryango b’Umwalimu SACCO byayifashije guha abanyamuryango bayo inguzanyo zingana n’amafaranga y’u Rwanda arenze miliyari 160.”

Uretse gufasha abalimu binyuze mu Umwalimu SACCO, Leta iheruka no kongera umushahara w’abarimu mu mashuri abanza n’ayisumbuye.

Dr Ngirente yakomeje ati “Guhera muri Werurwe 2019, abarimu bo mu mashuri abanza n’ayisumbuye ya Leta n’afashwa na Leta, bongerewe amafaranga angana na 10% ku mushahara wabo. Muri uyu mwaka, Guverinoma y’u Rwanda mu ngengo y’imari yongereyo andi 10%.”

Yavuze ko aya 10% yongereweho uyu mwaka abalimu bagombaga kuba barayahawe guhera mu kwezi kwa karindwi, ariko hajemo imbogamizi zatumye bazatangira kuyabona guhera ku mushahara w’ukwezi kwa Ugushyingo.

Yakomeje ati “Ubu Uturere 16 twamaze kuyaha abarimu, ndetse n’’utundi 14 dusigaye tukaba tuyatanga muri iki cyumweru. Ikindi kandi ni uko aya mafaranga bayahabwa ariko bakanabona ibirarane by’amezi ya Nyakanga, Kanama, Nzeri n’Ukwakira..”

Mu kunganira abarimu kandi, abarimu b’indashyikirwa bagenda bahabwa ibihembo binyuranye.

Buri mwaka tariki ya 5 Ukwakira ubwo haba hizihizwa Umunsi Mpuzamahanga wa Mwarimu, mu Rwanda hahembwa abarimu babaye indashyikirwa kurusha abandi mu byiciro bitandukanye birimo abigisha mu mashuri abanza n’abo mu yisumbuye.

Bamwe mu barimu bagiye bahembwa, baheruka kubwira IGIHE ko ibihembo bahawe byabagiriye akamaro mu mibereho yabo no mu kazi ko kwigisha ariko bavuga ko cyane cyane byabateye umurava no guharanira guhora ku isonga mu byiza.

Bizirema Sylvain wo mu Karere ka Nyanza, mu 2019 yabaye umwalimu w’indashyikirwa mu Rwanda hose mu rwego rw’amashuri yisumbuye ahabwa ibihembo birimo moto, televiziyo n’icyemezo cy’ishimwe.

Avuga ko atita cyane ku kiguzi cy’ibihembo yahawe ahubwo azirikana agaciro kabyo n’icyo bivuze mu kazi akora.

Ati “Iyo umuntu ahembwe ni nk’ikamba aba yambitswe aba agomba no kuririnda rero, niba ubaye indashyikirwa ugomba guharanira guhora uri indashyikirwa mu mirimo yawe yose ukora ku buryo abantu bose bifuza kukureberaho mu byo ukora bifuza kugufatiraho urugero.”

Agihabwa moto yahise atangira kujya ayigendaho agiye ku kazi, ariko nyuma ayiha umumotari uyikodesha agera ku bihumbi 80 Frw ku kwezi.

Amafaranga ava muri iyo moto ngo asigaye ayifashisha mu gutunganya neza inzu zishamikiye ku yo abamo ku buryo ateganya ko nizimara kuzura nazo zizajya zimwinjiriza agera ku bihumbi 80 Frw y’ubukode buri kwezi.

Televiziyo yahawe nayo imufasha gukurikira amakuru yo mu Rwanda n’ahandi ku Isi, ariko by’umwihariko muri ibi bihe bya Coronavirus, abana bayikurikiraho amasomo bari mu rugo.

Mutuyimana Restituta wo mu Karere ka Gisagara we yatoranyijwe nk’umwarimu w’indashyikirwa mu Ntara y’Amajyepfo mu rwego rw’amashuri abanza mu 2018, ahabwa na moto na mudasobwa igendanwa (Laptop).

Yabwiye IGIHE ko ibihembo yahawe byamugiriye akamaro mu kazi ko kwigisha no mu buzima busanzwe.

Ati “Guhembwa kwanjye rero usibye n’umurava byanteye no kumva akazi kanjye ari akazi kadasanzwe. Imashini bampaye niyo nkoresha mu kazi buri munsi nyiteguriraho amasomo kandi na bagenzi banjye bamaze kuyimenya kuko nkunze kuyibatiza. Moto bampaye nyikoresha ngiye ku kazi cyangwa ngiye gusura ibikorwa byanjye hirya no hino, aho kugira ngo ntegeshe amafaranga ni yo injyana noneho ayo mafaranga nkayazigama.”

Bimwe mu bigenderwaho mu gutoranya umwarimu w’indashyikirwa harimo uko yigisha, uko abanyeshuri yigisha batsinda, imibanire ye na bagenzi be n’ubufatanye mu kazi, uko yiteza imbere mu buzima busanzwe ndetse n’uko akorana neza na Koperative Umwarimu Sacco.

Abarimu bo mu mashuri abanza ni 45.573, abarimu bo mu mashuri yisumbuye ni 26.258 mu gihe abarimu bo mu mashuri y’imyuga n’ubumenyingiro ari 2.944.

Bigisha abanyeshuri 2.511.384 bo mu mashuri abanza na 732,000 bo mu mashuri yisumbuye.

Minisitiri w'Intebe, Dr Edouard Ngirente, ubwo yari mu Nteko Ishinga Amategeko kuri uyu wa Mbere
Mwalimukazi Mutuyimana Restuta avuga ko ibihembo yahawe byamugiriye akamaro mu kazi ko kwigisha no mu buzima busanzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .