Inyigo nshya yagaragaje icyuho ku bagore batsindira amasoko ya Leta mu Rwanda

Yanditswe na Evariste Nsengimana
Kuya 16 Ugushyingo 2019 saa 12:27
Yasuwe :
0 0

Inyigo nshya yakozwe n’Ishami ry’Umuryango w’Abibumbye ryita ku bagore (UN Women) mu Rwanda n’Umuryango ‘New Faces New Voices’ yagaragaje ko abagore batsindira amasoko ya Leta bari ku kigero cyo hasi, n’ayo batsindiye akaba aciriritse ugereranyije n’atsindirwa n’abagabo.

Ni inyigo yakozwe hasesengurwa politiki z’itangwa ry’amasoko, kumva ubushobozi n’imbogamizi ku bigo byashinzwe n’abagore no kugena ingamba zorohereza abagore mu rwego rw’itangwa ry’amasoko ya Leta.

Abakoze iyi nyigo bagaragaje ko nubwo guverinoma igenda ishyiraho ingamba zitandukanye zigamije guteza imbere no kongerera ubushobozi umugore no kuzamura ubwuzuzanye hagati y’umugabo n’umugore, abagore bayobora ibigo badahabwa amahirwe mu itangwa ry’amasoko ya Leta.

Ubwo iyi nyigo yamurikwaga ku wa 15 Ugushyingo, Umuyobozi wa UN Women-Rwanda, Fatou Lo, yavuze ko itangwa ry’amasoko ya Leta ryihariye 15-30% by’umusaruro mbumbe w’ibihugu muri rusange bityo ko ari ngombwa guha umwanya abagore bafite ibigo bakabigiramo uruhare.

Ati “Uburyo bumwe bwo guteza imbere kwihangira imirimo ni ukongera abagura ibicuruzwa na serivisi bikorwa n’ibigo by’abagore. Ibigo bitanga amasoko nk’ibya Leta, iby’amasosiyete n’imiryango mpuzamahanga bigomba kubyaza amahirwe uwo musaruro, bikongera umusaruro n’udushya kandi bigakumira icyo cyuho.”

Iyi nyigo yagaragaje ko mu bigo 332 byatsindiye amasomo hagati ya 2016 na 2019, ibiyobowe n’abagore ari 13% gusa. Ayo masoko yari afite agaciro ka miliyari zisaga 34Frw, abagore batsindiye afite agaciro kangana na 5% gusa.

Bisobanuye ko batsindira amasoko aciriritse nk’ayo gutanga serivisi, gucunga inama, gutanga ibirirwa n’imitako mu gihe ibigo by’abagabo bitsindira amasoko akomeye nk’ay’ubwubatsi no gukwirakwiza ibyifashishwa mu buhinzi.

Iyi nyigo yagaragaje imbogamizi zitandukanye zibangamira abagore mu kwitabira no gutsindira amasoko ya Leta zirimo kubura amafaranga, ubushobozi buri hasi, ingwate zihanitse n’ubunararibonye bucye ku bafite ibigo bigitangira.

Hari kandi kuba bamwe mu batanga amasoko basaba abagore kuryamana na bo kugira ngo bazabafashe kuyatsindira no guhabwa amasezerano, kutagira amakuru cyangwa ubumenyi bucye mu gukoresha ikoranabuhanga.

Umuyobozi mukuru w’Umuryango New Faces New Voices, Dr Monique Nsanzabaganwa, yavuze ko muri uwo muryango bagerageza gushakira umuti ikibazo cy’imari.

Ati “Tugerageza kuziba icyuho hagati y’ibigo by’imari n’abagore bakora ubucuruzi buzwi n’ubutazwi, twumva ibyo abagore bakenera n’ibyo ibigo by’imari bibagenera.”

Iyi nyigo itanga inama z’uko Guverinoma n’abandi bafatanyabikorwa bakwiye gushyiraho ingamba zo koroherereza abagore mu itangwa ry’amasoko ya Leta zirimo ubukangurambaga ku mahirwe bahabwa n’itegeko riyagenga, kwibumbira muri Koperative kugira ngo bibafashe kugira ubushobozi bwo guhangana n’abandi.

Hari kandi gushishikariza abashoramari b’abagore kugira uruhare mu mirimo ifitanye isano n’itangwa ry’amasoko, gushyiraho uburyo bwo kongerera ubushobozi abagore bakora mu rwego rw’itangwa ry’amasoko, gucunga imari, uburyo amasoko atangwamo, kwifashisha ikoranabuhanga n’ibindi.

Minisitiri w’Uburinganire n’Iterambere ry’Umuryango, Solina Nyirahabimana, yavuze ko hakeneye kugira igikorwa mu maguru mashya.

Ati “Ibi bimenyetso bishingiye ku nyigo yakozwe ku gufasha abagore mu itangwa ry’amasoko ya Leta biradusaba gukorana byimbitse mu gufasha abagore b’abashoramari gutsindira amasoko.”

Uretse ingamba ku mbogamizi abagore bagirira mu itangwa ry’amasoko, iyi nyigo yanagaragaje ko hakenewe ibiganiro ku gushyiraho uburyo bufasha abagore mu itangwa ry’amasoko ya Leta.

Inyigo nshya yagaragaje icyuho ku bagore batsindira amasoko ya Leta mu Rwanda
Fatou Lo, yavuze ko itangwa ry’amasoko ya Leta ryihariye 15-30% by’umusaruro mbumbe w’ibihugu muri rusange bityo ko ari ngombwa guha umwanya abagore bafite ibigo bakabigiramo uruhare

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza