Inyandiko z’abana zifashishijwe mu kugaragaza ibibazo by’umwanda byugarije ingo z’i Rwamagana

Yanditswe na Hakizimana Jean Paul
Kuya 21 Ugushyingo 2019 saa 07:55
Yasuwe :
0 0

Ubuyobozi bw’Akarere ka Rwamagana bwifashishije abana mu kwereka ababyeyi babo bimwe mu bibazo bigaragara mu ngo zabo bishingiye ku mwanda birimo kutagira imisarani yujuje ubuziranenge, kutagira kandagira ukarabe, agatanda k’amasahani, ikimoteri n’ibindi.

Ibi bibazo ubuyobozi bwabicishije mu mashuri yose abarurwa muri Rwamagana muri gahunda yiswe “Hygiene letter to parents” kugira ngo bwereke ababyeyi ahari umwanda mu ngo zabo bahiteho isuku irusheho kwiyongera mu miryango.

Abana bandikiraga ababyeyi babo amabaruwa bakayaha imirenge ikabanza ikayafotora ubundi ikazayabashyikiriza.

Micomyiza Nerice wo mu Murenge wa Muhazi yabwiye ababyeyi be ko iwabo nta kimoteri kihaba bituma bamena imyanda aho biboneye.

Yanavuze ko ubwiherero bwabo butagira amazi kandi bwegereye igikoni ku buryo bikenewe gukosorwa ngo bakomeze bagire ubuzima bwiza.

Ineza Belyse wo mu Murenge wa Mwulire we yabwiye ababyeyi be ko mu ibase babikamo amasahani hagaragaramo umwanda mwinshi cyane ndetse ko umukozi wo mu rugo atakigura amazi meza yo kunywa.

Ati “Amafaranga mumuha arayarya igicupa agasukamo amazi asanzwe ku buryo ashobora kudutera inzoka. Muzabikurikirane.’’

Isaro Keyssie we yagize ati “Ubwiherero bwo hanze ntibugikora neza, aho bajugunya imyanda hari ibintu byinshi bitari mu mwanya wabyo, hari igihe usanga ububiko bw’imbuto harimo izapfuye.”

Bamwe mu babyeyi baganiriye na IGIHE bavuze ko bishimiye iyi gahunda ngo hari byinshi abana babo bababwiye batari bazi rimwe na rimwe wanasangaga abakozi babo batavuga.

Mukandayisenga Claudine utuye mu Murenge wa Kigabiro yagize ati “Byinshi abana banjye bangejejeho mu mabaruwa banzaniye sinari mbizi, hari nk’uwambwiye ko ubwiherero bwo hanze bukeneye gupfundikirwa, sinabyitagaho. Undi ambwira kububakira agatanda k’amasahani ibyo byose sinabizirikanaga n’umukozi wacu ntiyambwiraga ariko kuva babimbwiye nahise mbikemura.”

Umuyobozi w’Akarere ka Rwamagana wungirije ushinzwe Iterambere ry’Ubukungu, Mudaheranwa Regis, yavuze ko bafashe icyemezo cyo gukoresha abana kugira ngo bereke ababyeyi babo ibibangamiye isuku mu ngo zabo.

Ati “Twafashe umunsi umwe ari ku wa gatanu mu mezi abiri ashize dufata isaha imwe mu bigo byose bibarirwa mu karere kacu, abana tubaha umukoro wo gutaha bakareba ibintu bituma iwabo mu rugo hataba isuku. Baragarutse ku wa mbere tubasaba kwandikira ababyeyi babo babasaba gukemura bya bibazo bahabonye.”

Yakomeje avuga ko abana bamaze kwandika ibyo bibazo byoroheye ubuyobozi mu kubikurikirana hirya no hino mu midugudu kuko bituma bagenda urugo ku rundi bitwaje amabaruwa basuzuma icyakozwe.

Mudaheranwa yanavuze ko nyuma y’ayo mabaruwa ngo ababyeyi benshi basanze barabyishimiye ndetse ngo byatanze n’umusaruro ugaragara hirya no hino mu miryango.

Gusaba ababyeyi gukemura ibibazo by’umwanda bigaragara mu ngo zabo byahujwe no kwizihiza Umunsi Mpuzamahanga w’Umusarani wujuje ibyangombwa no gukaraba intoki ukoresheje amazi meza n’isabuni.

Abana bahimbye indirimbo nziza zijyanye n’isuku n’isukura bahembwe ibikoresho birimo ibikapu, amakaye, indobo n’ibindi.

Mu bayobozi bitabiriye iki gikorwa barimo Guverineri w'Uburasirazuba, Mufulukye Fred n'Umuyobozi w’Akarere ka Rwamagana wungirije ushinzwe Iterambere ry’Ubukungu, Mudaheranwa Regis (hagati)
Abana bahimbye indirimbo nziza y'isuku bahembwe ibikapu n'ibindi bikoresho
Abitwaye neza bahawe ibihembo bitandukanye
Guverineri Mufulukye Fred ahemba umwe mu bana bitwaye neza
Umuyobozi w’Akarere ka Rwamagana wungirije ushinzwe Iterambere ry’Ubukungu, Mudaheranwa Regis yasobanuye ko amabaruwa yandikiwe ababyeyi yahurijwe hamwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza