Inyandiko ya ‘Braille’ ikoreshwa n’abafite ubumuga igiye gutangira kwigishwa mu mashuri nderabarezi

Yanditswe na Evariste Nsengimana
Kuya 17 Mutarama 2020 saa 09:46
Yasuwe :
0 0

Ikigo cy’Igihugu cy’Uburezi (REB) cyatangaje ko cyamaze kwinjiza inyandiko ya ‘Braille’ ikoreshwa n’abafite ubumuga mu nteganyanyigisho nshya y’amashuri nderabarezi (TTC) mu rwego rwo gutegura abarezi bafite ubushobozi bwo kwigisha buri wese n’ufite ubumuga bwo kutabona.

Hashize iminsi imiryango irengera uburenganzira bw’abafite ubumuga nabo ubwabo bagaragaza ko hakiri imbogamizi mu kwiga ku bafite ubwo kutabona kubera ko abarezi bafite ubumenyi ku nyandiko bashobora gusoma ari mbarwa n’aho ubasanze aba ari mu bigo byihariye byigisha abafite ubumuga bitorohera buri wese kubigeramo.

Braille ni uburyo abafite ubumuga bwo kutabona bakoresha bandika cyangwa basoma aho babasha kumenya icyanditse na bo bakaba babasha kwandika.

Mu kiganiro yahaye IGIHE, Umuyobozi wa REB, Dr. Ndayambaje Irénée, yavuze ko muri iki Cyumweru aribwo abayobozi ba TTC uko ari 16 mu gihugu bamurikiwe integanyanyigisho nshya yamaze kwinjizwamo na gahunda y’uburezi budaheza, iteganya n’uburyo bwo kwigisha abafite ubumuga.

Yavuze ko impamvu iyi gahunda itangirijwe kuri TTC ari mu rwego rwo gutegura abarezi bashobora kwigisha buri wese, ku buryo mu gihe kiri imbere hazaboneka abarimu bahagije.

Ati “Ikintu cya mbere cyakozwe ni uko muri iyi nteganyanyigisho twakoze igiye kwigishwa mu mashuri nderabarezi harimo isomo rijyanye n’uburezi budaheza rinareba abafite ubumuga bwihariye birumvikana hariko abafite ubwo kutabona. Ni isomo rishya ubundi ritabagamo, byumvikane ko mu gihe kiri imbere tuzagira abarimu bose bafite ubumenyi bwihariye ku bafite ubumuga bwihariye.”

Dr Ndayambaje yavuze ko aribwo urugendo rwo guteza imbere imyigishirize y’ururimi rwa Braille rutangiye ariko ko ibyangombwa byose birimo gutegurwa. Ati “Iyi nteganyanyigisho mu by’ukuri twarayiteguye kandi tugiye gutangira kuyishyira mu bikorwa uyu mwaka w’amashuri 2020.”

Buri shuri usanga rifite ibitabo abanyeshuri bifashisha mu bushakashatsi no kwihugura ku byo bigishijwe na mwarimu ariko nta bitabo byanditse muri iyi nyandiko birategurwa. Gusa REB ivuga ko igiye gutangira kubihindura.

Ati “Tugiye gufata ibitabo dufite tubihindure mu rurimi rwa Braille kuko nirwo bariya bana bafite ubumuga bwo kutabona bumva kandi bakoresha. Ni urugendo rero rwatangiye, navuga ko kandi ruzakomeza kugenda neza duftnyije n’abafatanyabikorwa.”

Mu bafatanyabikorwa bari gufasha Guverinoma mu gutegura kwigisha uru rurimi harimo Ishami ry’Umuryango w’Abibumbye ryita ku bana (UNICEF) n’abandi basanzwe bafatanya na Minisiteri y’Uburezi mu guteza imbere uburezi, by’umwihariko ubudaheza.

Umunyamabanga Nshingwabikorwa w’Inama y’Igihugu y’Abafite Ubumuga(NCPD), Ndayisaba Emmanuel, yabwiye IGIHE ko inyandiko ya Braille isanzwe ikoreshwa mu bigo bifasha abafite ubumuga byihariye biri hirya no hino mu gihugu.

Ibyo birimo nk’icya Gahini, HVP Gatagara hirya no hino mu gihugu n’andi mashuri amwe afashwa kwigisha ubu buryo.

Ati “Ariko hari n’ikoranabuhanga, ubu turanakoresha za mudasobwa zivuga ku buryo n’abafite ubwo bumuga bazifashisha.”

Ndayisaba yavuze ko no mu ishami rya Kaminuza y’u Rwanda riri i Huye n’i Gahini hazirikanywe ibyiciro by’abafite ubumuga, bashyirirwa uburyo bwo kubigisha ariko hari na gahunda yo guhugura abataragize amahirwe yo kwiga nabo bakagira ubumenyi kuri urwo rurimi.

NCPD igaragaza ko mu Rwanda habarurwa abafite ubumuga bwo kutabona n’abafite ikibazo cyo kutareba neza, gituma batabasha kwiga kimwe n’abandi barenga ibihumbi 50.

Inyandiko ya Braille ikoreshwa n’abafite ubumuga igiye gutangira kwigishwa mu mashuri nderabarezi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza