Inyama y’inka irakosha i Kigali! Abaguzi n’abacuruzi batewe impungenge n’igiciro gihanitse

Yanditswe na IGIHE
Kuya 3 Ugushyingo 2019 saa 04:23
Yasuwe :
0 0

Abaturage n’abacuruzi b’inyama z’inka baravuga ko batewe impungenge n’izamuka ry’ibiciro byazo ku masoko ku buryo ngo bifite ingaruka ku mirire n’ubushabitsi bwabo.

Ku Isoko rya Kimironko ahacururizwa inyama z’inka, abacuruzi bavuga ko kubona abakiliya ari amahirwe bitewe n’ibiciro byazo byazamutse ku buryo ngo zirya uwifite.

Abaturage baganiriye na RBA dukesha iyi nkuru bemeza ko izamuka ry’igiciro ryabagizeho ingaruka.

Mutesi Josiane yagize ati ‘‘Inyama zavuye ku 2000 Frw zigera kuri 2700 Frw, urumva nk’icyiciro cyanjye sinabarizwamo, imvange ni 2700 Frw, iroti 3700 Frw.’’

Twagirumukiza Alphonse na we avuga ko atewe impungenge n’ibiciro by’inyama bihanitse.

Ati ‘‘Urabona nk’abantu bajyaga bagura inyama, nk’umuntu akagura ibilo bitanu ubu asigaye agura kimwe cyangwa inusu kubera guhenda. Inyama zaguraga 1800 Frw zikaba zigeze kuri 2700 ntawe ukizigondera, hakiyongeraho n’abanyeshuri, wazanaga 5000 Frw ugatwaramo ibilo bibiri ugasagura n’ibirungo ariko ntibikivamo.’’

Yakomeje avuga ko ihenda ry’inyama ryagize ingaruka ku mirire y’abana bato ndetse n’abakuru bari basanzwe bazirya.

Abacuruzi b’inyama na bo bavuga ko aho bazirangura, zibahenda cyane ku buryo haboneka nke, uzifite akazamura ibiciro.

Bagambiki Jean Claude yagize ati ‘‘Inyama zarahenze kubera ibura ry’inka kandi abakiliya barabuze kubera icyo kibazo.’’

Mukakamanzi Claudine yavuze ko bari kurangura inyama zihenze cyane ku buryo bigira ingaruka ku biciro muri rusange.

Ati ‘‘Mbere inyama twaziranguraga 1800 Frw, ubu ni 2200 Frw, tukazigurisha 2700 Frw, urumva rero ibiciro bigomba kuzamuka. Ntituramenya impamvu zahenze, inka zarahenze, abacuruzi b’inka na bo bajya mu masoko bakatubwira ko zahenze kuko usanga n’umuturage wari ufite inka ya 200 000 Frw, ubu yarayishyize kuri 300 000 Frw.’’

Nyandwi Jean Marie Vianney avuga ko batazi icyateye iryo henda, agakeka ko bishoboka ko ubworozi bw’inka zitanga inyama bukiri hasi.

Ati ‘‘Twabonye biza ntabwo tubizi, inka ngo zarabuze umucuruzi arajya mu isoko akazana inka eshatu yarazanaga 20 akagutegeka igiciro ashaka. Aborozi b’inka basanga korora inka z’inyama batazibonamo inyungu nk’ubworozi bw’inka zitanga umukamo.’’

Ikibazo cy’ibura ry’inyama z’inka ntikiri ku Kimironko gusa kuko na Nyabugogo ahazwi nko ku Mashyirahamwe hari n’ibagiro ryakira amatungo maremare n’amagufi yiganjemo inka, ihene n’intama barataka.

I Nyabugogo ho ngo hari bamwe mu bacuruzi bari kubivamo bitewe no kubura ubushobozi bwo kujya ku masoko.

Umuyobozi Mukuru wungirije ushinzwe Ibijyanye n’Ubworozi mu Kigo gishinzwe guteza Imbere Ubuhinzi n’Ubworozi (RAB), Dr Solange Uwituze, yagaragaje ko mu myaka itanu ingano y’inyama z’amatungo abagwa yikubye kabiri.

Ibi ariko ntibikuraho ko inyama z’inka ziba nke bitewe n’umubare munini w’abazikenera.

Imibare ya RAB igaragaza ko mu Rwanda hari inka zisaga miliyoni 1 n’ibihumbi 300. Kuva mu 2013 kugera mu 2018 inyama zagiye ziyongera kuko iz’inka zavuye kuri 29807 zigera kuri toni 53019; inyama z’ihene zari toni 16953 zigera kuri 19480 mu gihe iz’intama zari toni 5802 zigera kuri toni 6742.

Inyama z’inkoko zo zari toni 15727 zigera kuri toni 40561; iz’inkwavu zari toni 3893 zigera kuri toni 12 842 mu gihe iz’ingurube zari toni 8905 zigera kuri 35,017.

Muri rusange mu 2013 inyama zabazwe zari toni 81087, mu 2018 zikuba kabiri zigera kuri toni 167 661.

Inyama y'inka kuri ubu iri gukosha ku isoko mu Mujyi wa Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza