00:00:00 IGIHE NETWORK KN KINYARWANDA EN ENGLISH FR FRANCAIS

Intwaza zagaragajwe nk’isoko y’ubudaheranwa ku rubyiruko rwifuza ejo heza

Yanditswe na IGIHE
Kuya 4 July 2022 saa 10:54
Yasuwe :

Urubyiruko rw’u Rwanda rwasabye kuvoma mu budaheranwa no kudacika intege byaranze incike za Jenoside yakorewe Abatutsi zizwi nk’Intwaza, mu guharanira kubaka u Rwanda ruzira amacakubiri.

Byasabwe kuri iki Cyumweru, tariki ya 3 Nyakanga 2022, ubwo hasozwaga iminsi ijana yo kwibuka ku nshuro ya 28 Jenoside yakorewe Abatutsi, mu Murenge wa Mageragere mu Karere ka Nyarugenge.

Muri uyu muhango hatashywe inzu umunani zubakiwe Abacitse ku icumu rya Jenoside yakorewe Abatutsi batishoboye, ubwiherero bwubakiwe Intwaza mu Kagari ka Nyarurenzi, Umurenge wa Mageragere, inka n’ubwisungane mu kwivuza byagenewe imiryango 20 itishoboye bigizwemo uruhare n’Umuryango AVEGA Agahozo.

Umuyobozi Nshingwabikorwa w’Akarere ka Nyarugenge, Ngabonziza Emmy, yagarutse ku bugome bwakoranywe Jenoside, nk’aho muri Mageragere mbere ya Jenoside hari hatuye Abatutsi basaga 7000 nyamara ubu hakaba hararokotse 120 gusa.

Yavuze ko hari ibikomeje gukorwa mu gusigasira ayo mateka ya Jenoside nk’aho imibiri 180 y’Abatutsi bishwe muri Jenoside iherutse kuboneka yashyinguwe mu cyubahiro muri iki gihe cy’iminsi 100 yo kwibuka.

Ngabonziza yavuze ko harangijwe imanza za Gacaca 146, zanabaye n’umwanya wo guhuza imiryango y’abagize uruhare muri Jenoside n’abayirokotse.

Umuyobozi wa AVEGA Agahozo, Mukabayire Valérie, yashimye ingabo zari iza FPR Inkotanyi ku rugamba zarwanye kugira ngo zirokore Abatutsi bicwaga.

Yashimye byimazeyo kandi Umufasha wa Perezida wa Repubulika, Madamu Jeannette Kagame, ku bikorwa adahwema gukorera Intwaza mu bigo by’Impinganzima yashinze.

Umuyobozi wungirije ushinzwe Ubukungu n’Imibereho myiza mu Mujyi wa Kigali, Urujeni Martine, yagaragaje ko gusoza iminsi ijana yo kwibuka bitavuze kwibagirwa.

Yagaragaje ko nk’Ubuyobozi bw’Umujyi bazakomeza gushyira ingufu mu bikorwa byo gushyigikira Abacitse ku icumu rya Jenoside yakorewe Abatutsi, gukurikirana Gahunda zigamije Ubumwe bw’Abanyarwanda no guhana abakomeje kwinangira bakwiza ingengabitekerezo ya Jenoside.

Umunyamabanga Uhoraho muri Minisiteri y’Umuryango n’Uburinganire, Batamuliza Mireille, yagaragaje ko kwibuka nyako ari uguharanira ko Jenoside itazongera kuba, hashimangirwa inzira y’ubumwe n’ubwiyunge.

Yashimye intwaza zatujwe mu Murenge wa Mageragere kuba zitaraheranwe n’agahinda zikaba zikomeje kwiyubaka.

Batamuliza yakanguriye Urubyiruko rw’u Rwanda gusura intwaza mu rwego rwo gukomeza kumenya amateka y’igihugu cyabo no kumenya ibyo bagomba kwirinda mu rwego rwo kubaka igihugu cyiza.

Batamuliza yakanguriye Urubyiruko rw'u Rwanda gusura Intwaza mu gukomeza kumenya amateka y'Igihugu cyabo no kumenya ibyo bagomba kwirinda mu rwego rwo kuzubaka u Rwanda rwiza
Abahawe inka basabwe kuzifata neza ngo biteze imbere
Hatanzwe inka 20 ku miryango itishoboye
Imiryango umunani itishoboye yahawe inzu
Intwaza zashimiwe ubudaheranwa nyuma y'ingaruka basigiwe na Jenoside yakorewe Abatutsi
Inzu umunani zirimo ibikoresho n'ibindi byangombwa by'ingenzi
Umunyamabanga Nshingwabikorwa wa Nyarugenge, Ngabonziza Emmy, yijeje ko bazakomeza kwita ku bacitse ku icumu batishoboye
Umuyobozi wa AVEGA Agahozo, Mukabayire Valérie, yashimye Ingabo zari iza FPR Inkotanyi ku rugamba zarwanye kugira ngo zirokore Abatutsi bicwaga
Wabaye umwanya wo kwishimira ibyo u Rwanda rwagezeho nyuma y'imyaka 28 Jenoside ihagaritswe
Imiryango itishoboye muri Nyarugenge yashyikirijwe ubwisungane mu kwivuza
Batamuliza yakanguriye Urubyiruko rw'u Rwanda gusura Intwaza mu gukomeza kumenya amateka y'Igihugu cyabo no kumenya ibyo bagomba kwirinda mu rwego rwo kuzubaka u Rwanda rwiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .