00:00:00 IGIHE NETWORK KN KINYARWANDA EN ENGLISH FR FRANCAIS

Intumwa za Mozambique zashimye imikorere ya Laboratwari y’Igihugu y’Ibimenyetso bya Gihanga

Yanditswe na Ntabareshya Jean de Dieu
Kuya 2 June 2022 saa 08:27
Yasuwe :

Itsinda ry’abantu 10 baturutse muri Mozambique bayobowe na Minisitiri w’Ubutabera w’icyo gihugu, Helena Mateus Kida, ryashimye imikorere ya Laboratwari y’Igihugu y’Ibimenyetso bya gihanga.

Mu ruzinduko rwabo mu Rwanda, iri tsinda rigamije kwigira ku Rwanda mu bikorwa bitandukanye birebana no gutanga ubutabera buboneye ndetse hari n’amasezerano agomba gusinywa hagati y’inzego z’ubutabera z’ibihugu byombi.

Kuri uyu wa kane tariki ya 2 Kamena 2022, aba bayobozi batandukanye mu nzego z’ubutabera basuye Ikigo cy’Igihugu cy’Ibimenyetso bya gihanga, Rwanda Forensic Laboratory (RFL), basobanurirwa imikorere yacyo n’uburyo kiri gukora akazi gakomeye kasabaga ko abifuza gukorerwa izo serivisi bagana mu mahanga.

Zimwe muri serivisi zitangirwa muri RFL harimo gukora ibizamini by’isanomuzi, ibizwi nka AND, gupima inyandiko mpimbano, uburozi, ibiyobyabwenge n’ibindi bitandukanye.

Nyuma yo gutambagizwa no kwerekwa imikorere yayo, aba bayobozi bagaragaje ko bifuza kugira imikoranire myiza n’u Rwanda ku buryo abakozi bo mu nzego z’ubutabera z’iwabo bazaba bahugurirwa mu Rwanda mu myaka ibiri iri imbere.

Yagize ati “Dukurikije imikorere n’imbaraga zashowemo, biragaragaza ko Leta yemeye guhara byinshi igashora mu kubaka iyi Laboratwari. Ibyo twabonye aha byatweretse ko bishoboka.”

Kugeza ubu Laboratwari y’u Rwanda y’Ibimenyetso bya gihanga bikoreshwa mu butabera (RFL) imaze gusuzuma dosiye zirenga ibihumbi 26 kuva mu 2018 yongerewe ubushobozi ndetse ikazamurirwa urwego rw’imikorere.

Umuyobozi wa RFL, Lt Col Dr. Karangwa Charles, yasobanuye ko iyi Laboratwari ifite mu nshingano gutanga ibimenyetso bya gihanga ku nzego zitandukanye n’abantu ku giti cyabo.

Yagize ati “Kuva RFL yatangira ikanahabwa izi nshingano, imaze gutanga umusanzu ukomeye cyane haba mu Rwanda, mu Karere iherereyemo no hanze. Abatugana si abo mu Rwanda gusa, hari abaza bavuye mu bindi bihugu bashaka guhinyuza [ibisubizo bahawe] kandi bagasanga bimeze kimwe.’’

Yavuze ko ubu bari gushaka uburyo ishobora kugirwa ahantu ho gutangira amahugurwa.

Ati “Turi gukorana n’inzego z’igihugu cyane cyane Minisiteri y’Ubutabera kuko ari yo itureberera, kugira ngo dutangize gahunda yo gushyiraho aho twajya twigishiriza (training center of excellence) kandi muri gahunda dufite, twizera ko tuzaba twatangiye [mu minsi ya vuba] ku buryo dushobora gusubiza abagiye basaba igihugu cyacu ubwo bufasha.”

Kugeza ubu Mozambique yamaze kugaragaza ko yiteguye kuzohereza inzobere kwihugura mu Rwanda mu birebana no gupima ndetse no gushaka ibimenyetso bya gihanga.

Hari kandi n’ibindi bihugu byamaze kugaragaza ko bibyifuza birimo u Burundi, Cameroun, Congo Brazaville, RDC, Togo n’ibindi bihugu bitandukanye.

Hari gahunda yo gusaba ko RFL yakora ku rwego mpuzamahanga cyane ko ifite ibikoresho bihagije n’ubushobozi buyemerera gukorera kuri urwo rwego mu gukurikirana ibimenyetso bya gihanga byifashishwa mu butabera.

Ku munsi, iki kigo gishobora kwakira nibura ibirego cyangwa abifuza gukoresha ibizamini bya ADN barindwi, birimo abantu bagera kuri batatu. Ikizamini ku muntu umwe gitwara ibihumbi 89 Frw.

Imibare igaragaza ko RFL imaze gusuzuma dosiye 14.600 zerekeranye no gusuzuma ibikomere byatewe n’ihohoterwa, 4500 byo gusuzuma uturemangingo ndangasano (ADN), 850 byo gupima ibikumwe, 723 byo gupima ibiyobyabwenge n’ibindi.

Hari kandi dosiye 1576 mu gupima uburozi n’ingano ya alcohol mu maraso y’abantu [abanyweye inzoga, ibiyobyabwenge n’abandi], bitandatu byo gusuzuma amajwi n’amashusho bigahuzwa na ba nyirabyo, 26 muri serivisi zo gupima imbunda n’amasasu na 13 bigendanye no kumenya microbes zateje ibyago.

Umuyobozi wa RFL, Lt Col Dr. Karangwa Charles, yasobanuye ko iyi Laboratwari ifite mu nshingano gutanga ibimenyetso bya gihanga ku nzego zitandukanye n’abantu ku giti cyabo
Imashini zifashishwa muri Laboratwari
Minisitiri w’ubutabera w’icyo gihugu, Helena Mateus Kida, ryashimye imikorere ya Laboratwari y’Igihugu y’Ibimenyetso bya gihanga
Minisitiri w’ubutabera w’icyo gihugu, Helena Mateus Kida, yavuze ko igihugu cye kiteguye kwigira ku Rwanda
Minisitiri w’ubutabera w’icyo gihugu, Helena Mateus Kida n'Umuyobozi wa RFL, Lt Col Dr. Karangwa Charles bagiranye ibiganiro
Iyi Laboratwari ipima n'uburozi
Iri tsinda ryasobanuriwe imikorere ya RFL

Amafoto: Munyakuri Prince


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .