00:00:00 IGIHE NETWORK KN KINYARWANDA EN ENGLISH FR FRANCAIS

Inteko ya Amerika yongeye guha rugari ikinyoma muri dosiye ya Rusesabagina

Yanditswe na IGIHE
Kuya 15 July 2022 saa 03:44
Yasuwe :

Inteko ya Amerika yatoye umwanzuro watanzwe na Young Kim uhagarariye Leta ya California hamwe na Joaquin Castro uhagarariye Texas, usaba ubutegetsi bwa Joe Biden gusaba u Rwanda ko rurekura Paul Rusesabagina.

Ni umwanzuro wari washyikirijwe Inteko muri Gashyantare uyu mwaka. Uvuga ko Guverinoma ya Joe Biden ikwiriye gusaba u Rwanda kurekura Paul Rusesabagina ku mpamvu z’ubugiraneza.

Paul Rusesabagina yafatiwe i Kigali mu myaka ibiri ishize. Icyo gihe yageze i Kigali aturutse muri Leta Zunze Ubumwe z’Abarabu, abeshywa n’umupasiteri w’inshuti ye ko bagiye i Burundi, undi aza kwisanga ageze i Kigali.

Yahenzwe ubwenge n’uwo mukozi w’Imana wari waremereye inzego z’ubugenzacyaha z’u Rwanda, ko kuko Rusesabagina ari inshuti ye, azamugeza mu gihugu kugira ngo akurikiranwe n’ubutabera ku byaha yashinjwaha.

Uwo mupasiteri witwa Constantin Niyomwungere yafashe icyo cyemezo cyo guhenda ubwenge Rusesabagina nyuma y’uko yari amaze kubona uburyo umutwe wa FLN yayoboraga wagize uruhare mu bitero byaguyemo abanyarwanda icyenda abandi benshi bagakomereka.

Muri Nzeri umwaka ushize, Rusesabagina yakatiwe gufungwa imyaka 25 amaze guhamwa n’ibyaha by’iterabwoba.

Kuva yafatwa Amerika binyuze mu muryango wa Rusesabagina no mu bagize Inteko batandukanye, bakoze iyo bwabaga bashaka gutera u Rwanda igitutu kugira ngo arekurwe.

Ni byo byanakomeje no ku wa Kane, aho umwanzuro watowe n’Inteko Ishinga Amategeko usaba ubutegetsi bwa Biden gusaba u Rwanda kurekura Rusesabagina.

Uvuga ko Rusesabagina uvuka mu Rwanda, yakoze ibikorwa by’ubutwari muri Jenoside yakorewe Abatutsi, akarokora abari bahungiye muri hoteli yayoboraga kabone nubwo ari umuhutu ariko ngo yanze ko abenegihugu bagenzi be bicwa.

Ukomeza uvuga ko Rusesabagina ari “Umuturage wa Amerika washimuswe akaba ari imbohe mu gihugu cy’amahanga azira kutavuga rumwe n’ubutegetsi”.

Kim umwe mu basunitse uyu mwanzuro, yavuze ko Rusesabagina akomeje gukorerwa ibikorwa bibangamiye uburenganzira bw’ikiremwamuntu kandi ko ibyo bitemewe.

Mugenzi we, Castro yagize ati “Mu myaka igera kuri ibiri, Guverinoma y’u Rwanda yafunze Rusesabagina Paul mu buryo bugaragara ko bugamije kumucecekesha ku bwo kunenga ubutegetsi bwa Kagame.”

Yakomeje avuga ko Rusesabagina ari umuntu warwaye Cancer akayikira, ukeneye ubuvuzi bwihariye burenze ubwo ahabwa n’inzego z’u Rwanda muri iki gihe.

Bavuga ko igifungo Rusesabagina yahawe ku myaka ye 68 gisa n’igifungo cya burundu bityo akwiriye kurekurwa agasanga umuryango muri leta ya San Antonio.

Ikindi aba bagize Inteko ya Amerika bavuze ni uko ngo akeneye kwitabwaho n’umuryango we kurusha uko biri ubu kuko ahabwa iminota itanu kuri telefoni yo kuvugana na bo.

Paul Rusesabagina yakatiwe gufungwa imyaka 25 ahamijwe ibyaha bifitanye isano n’iterabwoba. Yahamijwe icyaha cyo kuba mu mutwe w’iterabwoba n’icyo gukora no kugira uruhare mu mutwe w’iterabwoba.

Yagizwe umwere ku cyaha cyo kurema umutwe w’ingabo utemewe, mu gihe ibindi bikorwa byakorewe mu bitero no gutera inkunga iterabwoba, bikaba bigize icyaha cyo gukora no kugira uruhare mu gikorwa cy’iterabwoba.

Urukiko rwavuze ko nta nyoroshyacyaha yahabwa kuko atitabiriye amaburanisha ngo asobanure byimbitse ibyaha yashinjwe.

Rwasobanuye ko ibyaha Rusesabagina yakoze bigize impurirane mbonezamugambi kandi byateje urupfu ku buryo yagombaga guhanishwa gufungwa burundu.

Urukiko rwamugabanyirije ibihano nyuma yo kureba imikorere y’ibyaha n’ibyo yatangaje mu mabazwa ya mbere.

Perezida Kagame aherutse gutangaza ko ibyo Rusesabagina n’abo baregwa hamwe bakoze no mu bihugu bimusabira kurekurwa amategeko yabyo adashobora kubyihanganira biramutse bibayeho.

Ati “Biratangaje kubona abantu bafite uruhare mu mateka yacu y’igihe kirekire, bagera aho babyitwaramo nabi kariya kageni. Ntabwo ari ukubyitwaramo nabi gusa, ahubwo ni ukubera uburyo batekereza ko twakabaye tuba, ni ukudusuzugura. Mu gihe unsuzuguye bigeze hariya, ni inshingano zanjye kukwereka ko ntemeranya nawe. Ntabwo nshobora kubyemera, urwo ni rwo Rwanda rw’ubu, ni narwo twifuza ejo hazaza.”

Niho Perezida Kagame yahereye asobanura uburyo hari umwe mu bayobozi w’umunyamahanga wigeze kumusaba kurekura Rusesabagina, ngo kuko ari intwari itakabaye ifungwa.

Ati “Hari umwe mu bayobozi nubaha wigeze kuza arambwira ngo urabona ‘ukwiriye kurekura uriya mugabo’. Ndamubwira nti ‘ariko sinjye rukiko, icya kabiri n’iyo kwaba ari ugukoresha ububasha bwanjye nka Perezida nkabukoresha nabi, ese wambwira impamvu ubundi uyu mugabo yakabaye arekurwa?”

Yakomeje agira ati “Yarambwiye ati ‘urabona ni intwari, abantu barabivuga, bisa nk’aho rwose muhanganye!’ Naramubwiye nti ‘njye si ndi intwari, nta nubwo mbishaka’. Nibyo mperutse kuvuga, ushobora kuba intwari gute mu mateka nk’ayacu ya Jenoside. Umuntu yakwiswe intwari iyo tuba twarabashije kubihagarika ariko twatakaje abasaga miliyoni.”

Rusesabagina Paul yamenyekanye cyane muri filime Hotel Rwanda, ivuga uburyo yarokoye abantu muri Hôtel des Mille Collines mu gihe cya Jenoside yakorewe Abatutsi.

Bamwe mu Batutsi babaye muri iyo hoteli icyo gihe, bagaragaje ko hari byinshi biri muri iyo filime bitari ukuri, kuko babaga muri iyo hoteli bishyuraga Rusesabagina bitandukanye n’ibyo yagiye atangaza ko bayiberagamo ubuntu. Rusesabagina na we yiyemereye ko filime ya Hotel Rwanda itavuga ukuri kuzuye kuko hari ibyongewe mu nkuru yayo kugira ngo irusheho kuryoha.

Perezida Kagame yavuze ko yakomeje kuganira n’uwo muyobozi wasabiye Rusesabagina gufungurwa, akamubaza icyo azabwira abagizweho ingaruka n’ibikorwa by’umutwe Rusesabagina yari ayoboye babuze ababo.

Ati “Uwo muntu yahise ambwira ngo ‘eeh ese burya hari n’abagizweho ingaruka? Abo twagenda tukabihanganisha.”

“Ndongera ndamubwira nti ‘ese bizagende bite ku bandi baregwa hamwe? Hari abandi nka 20 batanze ubuhamya bakemera ibyaha byabo hanyuma batanga ubuhamya. None se nabo turabarekura hanyuma tubwire abagizweho ingaruka guceceka?”

Perezida Kagame yavuze ko uwo muyobozi yasaga nk’ushaka kwerekana ko Rusesabagina ari bo bamugize intwari kugira ngo babone uko bagoreka amateka y’u Rwanda.

Paul Rusesabagina yakatiwe gufungwa imyaka 25. Mu iburanisha rya none ntiyigeze yitaba urukiko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .