Intebe ya Radiyo mu nkundura y’ikoranabuhanga rigezweho

Yanditswe na Nkurunziza Ferdinand
Kuya 14 Gashyantare 2020 saa 09:35
Yasuwe :
0 0

Tariki ya 13 Gashyantare buri mwaka, isi yose yizihiza umunsi mpuzamahanga wahariwe Radiyo. Mu buzima bwa buri munsi bw’abatuye isi, radiyo ifatwa nk’umuyoboro w’amakuru atandukanye woroheye benshi kandi ku kiguzi gito ugereranyije n’indi miyoboro.

Amateka ya Radiyo ntabwo ari maremare mu Rwanda kuko mu 1961 ari bwo Radiyo Rwanda yabonye izuba, imara imyaka myinshi ari yo yonyine abaturage bakesha amakuru n’ikindi icyo ari cyo cyose kigenewe rubanda mu buryo bw’amajwi.

Mu ntangiriro zayo, yari ishinzwe kunyuzaho amatangazo ya Leta ku butegetsi bwa Perezida Gregoire Kayibanda. Mu myaka 30 ya mbere, icyitwa ikoranabuhanga no gusakaza amajwi kure kuri Radiyo Rwanda byari ku rwego rudashimishije kuko nko gutegura ikiganiro cy’iminota ibiri byatwaraga umunsi wose.

Mu baturage gutunga radiyo byari umuhigo kuko uwari uyifite cyari ikimenyetso cy’ubukire kuko byatumaga mu masaha y’amakuru n’ibindi biganiro bikunzwe nk’ikinamico abaturanyi bakoranira mu rugo ruyitunze ngo bayumve.

Mu iterambere ry’ikoranabuhanga Isi irimo ubu, radiyo igaragara nk’iyakoze ibishoboka byose yisanisha na ryo kandi rikaba ryarayifashije kugera kuri benshi mu buryo bufatika ndetse rihindura imikorere yayo.

Abasesenguzi bavuga ko uko ikoranabuhanga ritera imbere na radiyo itera imbere kandi ntigaragaze gutakaza umwimerere yahoranye mu myaka myinshi ishize.

Umuyobozi wa Radiyo Rwanda, Aldo Havugimana, umaze imyaka 15 mu itangazamakuru rya radiyo, avuga ko ikoranabuhanga ryafashije radiyo kugira inkomoko y’inkuru n’ibitekerezo byo kuyinyuzaho byinshi, ndetse ubu ikaba igikunzwe n’abatari bake kuko yarushijeho gusakaza amakuru kuri benshi.

Ati “Mudasobwa, internet, telefone n’ibindi bikorwa remezo byifashisha ikoranabuhanga byatumye gutara amakuru no kuyasangiza abaturage birushaho koroha”.

Havugimana akomeza avuga ko iri koranabuhanga by’umwihariko irya telefone ryatumye umuturage utuye mu bilometero byinshi aganira inyumvankumve n’umunyamakuru wicaye ahakorera radiyo ako kanya.

Iri koranabuhanga ryakuranye no kurushaho guharanira ubwisanzure bwo kuvuga icyo umuntu ashaka, bamwe mu basesenguzi bavuga ko bitari bikwiye gufatwa nk’imbogamizi kuko buri wese asabwa kumva ko afite inshingano zo kuvuga ibidasenya cyangwa ngo biteze ikindi kibazo mu muryango mugari abarizwamo.

Aldo Havugimana yahamije ko radiyo y’ubu itandukanye n’izo hambere, kuko ubu ari urubuga rwo guhana ibitekerezo bigamije ubumwe no kuzamura ubukungu n’imibereho myiza y’abaturage.

Ku mwaduko wa televiziyo mu bihugu by’i Burayi, abantu benshi batekereje ko radiyo igihe gutakaza agaciro; internet na yo ihageze nabwo abantu bavuga ko radiyo itazongera kumvwa, ariko umwihariko wa radiyo wo kumvwa bidahagaritse imirimo y’abayiteze amatwi, wakomeje kuyihagarika mu mwanya w’icyubahiro mu miyoboro yose ikoreshwa mu gusakaza amakuru.

Umuyobozi Mukuru w’Inama Nkuru y’Itangazamakuru mu Rwanda (MHC), Peacemaker Mbungiramihigo, avuga ko itangazamakuru rya radiyo mu Rwanda ryungukiye cyane muri gahunda ya Leta yo guteza imbere ubukungu bushingiye ku ikoranabuhanga kuko byayifashije kugera kuri benshi.

Ati “Kera uwabaga afite radiyo yumvaga amakuru y’igihugu arimo, ariko adashobora kumva ku buryo bworoshye amakuru yo mu bindi bihugu no ku yindi migabane, bikamugora guhindura icyerekezo yifuza kumviraho amakuru y’ibindi bihugu ku buryo bumworoheye”.

Mbungiramihigo akomeza avuga ko ikoranabuhanga muri radiyo ryongereye ubusabane hagati y’abantu ndetse bituma n’abayikurikira bagira uruhare mu biyitambukaho mu buryo bwo gutanga ibitekerezo, ntibikomeze kuba nk’ivanjiri cyangwa amasomo atangwa na mwarimu, bidakenera ubaza cyangwa ngo ajye impaka ku byavuzwe.

Abasesenguzi bahuriza ku nama ivuga ko radiyo ikwiye kurushaho kubyaza umusaruro uburyo bw’ikoranabuhanga rigezweho, ku buryo izakomeza kugera ku bantu benshi mu buryo bworoshye, ariko hakanongerwa ingamba z’ubushishozi mu gihe hategurwa ibicishwa kuri radiyo ku buryo buzarushaho kugenzura abari butange ibitekerezo.

Aba banongeraho ko nyuma yo kwigisha abanyamakuru gutambutsa ibifasha abaturage kwiyubaka, hanakwiye kurushaho kwigisha ababakurikira uko itangazamakuru rikora, bakamenya uburyo bwo gushungura ibirinyuzwamo bakamenya ko biba bikwiye.

Kuri ubu radiyo zumvikanira mu Rwanda zirenga 30, zirimo iz’ubucuruzi, amadini n’iz’abikorera. Ikoranabuhanga kandi ryanatumye aho umuntu ari yumva radiyo yaba kuri telefoni ye ndetse no kuri internet.

Umuyobozi wa Radiyo Rwanda, Aldo Havugimana avuga ko ikoranabuhanga ryorohereje radiyo kubona ibyo zitangaza
Umunyamabanga Nshingwabikorwa wa MHC, Mbungiramihigo Peacemaker avuga ko ikoranabuhanga ryatumye radiyo igera kuri benshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza