Intango y’amahari hagati y’u Rwanda na Uganda yabaye intandaro y’urupfu rwa Sendashonga

Yanditswe na Ferdinand Maniraguha
Kuya 9 Werurwe 2019 saa 10:10
Yasuwe :
0 0

Kuwa Gatandatu tariki 16 Gicurasi 1998 ahagana saa kumi n’imwe z’umugoroba, Seth Sendashonga yishwe arashwe ubwo yari kumwe n’umugore we mu modoka batashye aho babaga nk’impunzi mu mujyi wa Nairobi muri Kenya.

Uyu mugabo wari warabaye muri Guverinoma y’Ubumwe nyuma ya Jenoside yakorewe Abatutsi, yishwe amaze iminsi mu biganiro byari bigamije gutegura igitero hifashishije ingufu za gisirikare ku Rwanda mu mugambi wo gukuraho Leta yagiye ahunze.

Hari hashize iminsi mike Sendashonga abonye abaterankunga muri iyo ntambara yateguraga nk’uko bigaragara mu gitabo cy’Umufaransa Gérard Prunier cyitwa "Africa’s World War : Congo, the Rwandan Genocide, and the Making of a Continental Catastrophe".

Ku mapaji ya 366 na 367 y’icyo gitabo cyasohotse bwa mbere mu 2008, Prunier avuga ko Uganda yari yiyemeje gufasha Sendashonga guhirika Leta ya FPR Inkotanyi bari bamaze gushwana.

Prunier avuga ko ari we wahuje Sendashonga n’abategetsi ba Uganda, inama ikabera i Nairobi, igitekerezo cye bakacyakira neza.

Agira ati “Sendashonga yarambwiye ngo nanjye ngomba kwigaragaza. Buri wese yifashisha imbunda kugira ngo azagire amahirwe yo kwicara ku meza y’ibiganiro umunsi umwe. Ndamutse nkomeje kwanga imbunda hari igihe cyazagera nkagaragara nk’aho ntacyo mvuze.”

Inama ya Sendashonga n’abagande yari yitabiriwe na bamwe mu basirikare bakuru muri icyo gihugu barimo na murumuna wa Perezida Museveni, Gen Salim Saleh.

Sendashonga yari yemerewe ahantu ingabo ze zizitoreza muri Tanzania, dore ko abasaga 600 mu ngabo zahoze ari iza Habyarimana bari biyemeje kumujya inyuma.

Prunier agira ati “Ku cyumweru tariki 3 Gicurasi 1998, yahuriye i Nairobi n’umuvandimwe wa Museveni , Salim Saleh. Ibintu ntabwo byari bimeze neza hagati ya Kampala na Kigali, Salim yari ashyigikiye igitekerezo cyo gufasha undi mutwe wifuza kwinjira mu mukino. Mu minsi mike yakurikiyeho, Seth yahuye na Eva Rodgers wo muri Minisiteri y’Ububanyi n’Amahanga ya Leta Zunze Ubumwe za Amerika amubwira ku migambi afite. Yamusubije ko ntacyo bamufasha ariko ko ntacyo bibatwaye.”

Prunier akeka ko iyo migambi ariyo yaba yaratumye Sendashonga yicwa bikozwe na Leta y’u Rwanda ‘kuko yari yarenze umurongo’.

Ubusanzwe Prunier ntabwo yakunze kuvuga rumwe n’ u Rwanda ariko Perezida Paul Kagame kuri uyu wa Gatandatu yifashishije igitabo cye mu kwerekana uburyo Uganda itigeze yishimira ubutegetsi bwa FPR bwahagaritse Jenoside nyuma yo kwisuganyiriza muri icyo gihugu abayigize bamaze gufasha Perezida Yoweri Museveni kugera ku butegetsi.

Yabivuze mu gihe umubano w’ibihugu byombi wifashe nabi ndetse u Rwanda ruherutse kugira inama Abanyarwanda kutajya muri Uganda nyuma y’imyaka ibiri abanyarwanda basaga 900 bafashwe bagatoterezwa muri icyo gihugu nta byaha bizwi bashinjwa, ambasade ntinamenyeshwe.

Ni nyuma kandi y’uko u Rwanda rugaragaje ko ruhangayikishijwe n’imitwe ishaka kuruhungabanya irimo RNC, ruvuga ko yahawe rugari muri Uganda.

Perezida Kagame yavuze ko yagerageje kuganira na Perezida Museveni kenshi ngo ikibazo cyose cyaba gihari gikemuke kitagize ingaruka ku baturage undi akabyirengagiza.

Yagize ati “Hari ikindi gihe namubwiya nti ‘Nagiye nkuzanira inshuro nyinshi ibi bibazo bitubangamiye ariko aho wenda ibi bintu biri kuba kuko ufitanye ikibazo natwe, wambwira icyo kibazo icyo ari cyo nkagikemura’ ariko ntacyo yambwiye.”

Yahishuye ko ibibazo by’u Rwanda na Uganda bimaze imyaka isaga 20, cyane cyane guhera igihe icyo gihugu cyemeraga gufasha Sendashonga.

Yagize ati “Ubisomye neza harimo ukuri mubyo Prunier yavugaga. Twari dufite amakuru ko ibyo bintu yanditse mu gitabo cye biri kuba. Seth Sendashonga yapfuye kubera ko yari yarenze umurongo. Nta byinshi mfite byo kuvuga kuri icyo ariko ntabwo mbyicuza.”

Kagame yabwiye abayobozi kujya baba maso, kuko ngo mu gihe u Rwanda rupanga kwiteza imbere, hari undi upanga kurubuza amahoro.

Ati “Impamvu nzamuye ibi ni ukwerekana uruhererekane rw’ibintu byakomeje kugenda biba mu myaka 20 ishize aho mu gihe turi aha turebera hamwe uko twatera imbere, hari undi muntu uri ahantu avuga ngo ntabwo tuzabakundira. Ni ibintu bigenda byisubiramo.”

Uganda ihakana ibyo u Rwanda ruyishinja, ikavuga ko abanyarwanda ifata ari abashaka kuyihungabanyiriza umutekano.

Perezida Kagame yavuze ko ari byiza igihugu kwanga ko hari ukivogera ngo agihungabanyirize umutekano ariko ko ari byiza nacyo kutavogera abandi.

Ati “Nta bubasha mfite kubyo umuntu antekerezaho cyangwa ibyo ategura kungirira ariko hari icyo mfiteho ububasha, ni ibibera hano mu gihugu cyanjye. Wagerageza kuduhangabanya n’ibindi. Umuntu ku giti cye ashobora kunyica, akandasa ibyo birashoboka ariko hari ikintu kidashoboka utankorera kandi nibyo nifuza ko bitaba no ku gihugu cyacu, nta n’umwe wampfukamisha kuko gupfukama ni amahitamo yawe.”

Yakomeje agira ati “Ntabwo nahitamo guteza abandi ibibazo, simbishaka ariko niba bo barahisemo kubiguteza, ugomba kwitegura kubihashya. Tugomba kubyitegura.”

Umubano w’u Rwanda na Uganda si ubwa mbere ujemo agatotsi kuko guhera mu 1998 kugeza mu 2000 ibihugu byarebanye ay’ingwe ndetse ingabo zabyo zirwanira i Kisangani muri Repubulika Iharanira Demokarasi ya Congo hapfa abasirikare barenga ibihumbi bibiri bo ku ruhande rwa Uganda, ibintu kugeza magingo aya bifatwa nk’igisebo gikomeye ku ruhande rwa Uganda.

Amahari hagati y'u Rwanda na Uganda yabaye intandaro y'urupfu rwa Sendashonga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza