00:00:00 IGIHE NETWORK KN KINYARWANDA EN ENGLISH FR FRANCAIS

Intangiriro zigoye, urugendo rwo kwibohora no kwiyubaka; Jean Malic Kalima yabivuye imuzi (Video)

Yanditswe na Ndahayo Emmanuel
Kuya 21 May 2024 saa 07:27
Yasuwe :

Mu 1994, u Rwanda tubona uyu munsi rwari inzozi kuri benshi, ndetse yewe hari n’abumvaga izo nzozi zizarangira gutyo nyine, ari inzozi zisanzwe zizibagirana.

Abo bamwe barugezemo barumirwa, babura imbaraga zibasunika basubira inyuma, bamwe barahirwa abandi biranga.

Icyakora kuri bamwe, uru Rwanda icyo gihe rwari umushinga, rukaba icyizere cy’ahazaza, rukaba ubuhungiro ku bahejwe mu gihugu cyabo ndetse rukanaba urugo rw’abakuze batagira aho bita iwabo.

Aba rero nibo barugezemo rudafite isura bakarubonamo amahirwe, nubwo muri ibyo bihe ingaruka za Jenoside yakorewe Abatutsi zari zikigaragarira buri wese kuko ibikorwa byo gushyingura imibiri y’abazize Jenoside byari bikiri henshi mu gihugu.

Ibikorwaremezo byari hafi ya ntabyo, ubukene bunuma mu gihugu hose, Umuryango Nyarwanda utaratangira gahunda z’ubumwe n’ubwiyunge, mbega ubona ko bigoye cyane kwizere ahazaza h’iki gihugu, cyane cyane ku rubyiruko rwashobora no kubakira ubuzima mu bindi bihugu.

Umushoramari Jean Malic Kalima wari ukiri umusore muto muri ibyo bihe, ni umwe mu bageze mu Rwanda ruri muri ibyo bihe bigoye, ariko kimwe n’abandi bari kumwe, ahitamo guhaguruka arahatana, yanga kurutera umugongo ahubwo arutiza imbaraga za gisore ngo zirwubake.

Mu kiganiro cyihariye yagiranye na IGIHE, Kalima yavuze ko ibyagezweho byose muri iyi myaka 30 u Rwanda rumaze rwibohoye, byaturutse ku buyobozi bwiza bwashyizeho politiki yo kunga Abanyarwanda, iyi politiki ikababera umusemburo wo gukorera hamwe no guteza igihugu imbere.

Yavuze ko yishimira kubona igihugu giteye imbere n’uruhare rwa buri wese mu kuhobora no kubaka u Rwanda rushya, ibimaze gutanga umusaruro ushimishije muri iyi myaka 30 ishize.

Yagize ati “Urugendo nagenzemo narugenzemo n’abandi. Aho twakoraga twakoraga turi kumwe n’abandi ariko bitabuza nk’umuntu kwitekerezaho akavuga ati ‘ariko, ubu koko ibyo turimo tubihagazemo neza?’

Uyu mugabo yasobanuye uburyo gukora muri icyo gihe byari bigoye cyane, kuko abakozi ba Leta batahembwaga amafaranga cyangwa ibindi bintu bifatika, ahubwo bahabwaga ibirimo ibigori n’ibindi bike byari bihari.

Yagize ati “Urugendo ndutangira, urugendo ntabwo rwari rworoshye. Naje mbanza gukorera Leta kuko niho hari akazi kandi mu by’ukuri uwumvaga afite kugira icyo yamara, yagiye muri Leta aho tutahembwaga, twahembwaga ibigori nabyo tutanabireba kuko amasaha yo kuryama yari make, twakoraga amanywa n’ijoro.”

Kalima yabanje gukora mu bubanyi n’amahanga, aza gushingwa kwakira abashyitsi bo mu nzego zitandukanye baje gusura u Rwanda, aho yakunze kubaherekeza mu bice bitandukanye by’igihugu, rimwe na rimwe bakajyana mu bikorwa byo gushyingura.

Yasobanuye ko ako kazi karimo ibibazo byinshi, kuko benshi b’abanyamahanga babazaga Abanyarwanda bati “Ariko mwebwe muzi ibyo murimo? Mwizeye iki?”

Nyuma y’imyaka irenga 10 akora mu nzego za Leta, Kalima yaje gusanga urugendo rwo kwiyubaka rutangiye gufata umurongo kuko hari abanyeshuri bake bari barangije amashuri batangiye kwinjira mu mirimo ya Leta, aza gufata icyemezo cyo kwimukira mu rwego rw’abikorera.

Icyo gihe Leta yari yarashyizeho gahunda yo kwegurira abikorera bimwe mu bigo bya Leta, we aza guhitamo kwinjira mu rwego rw’ubucukuzi bw’amabuye y’agaciro.

Kimwe mu byamuteye imbaraga zatumye yinjira muri uru rwego ni uko yari amaze kubona ko igihugu gifite amabuye y’agaciro, dore ko yari yarageze mu bice byinshi ubwo yabaga aherekeje abashyitsi basuye u Rwanda.

Ku rundi ruhande, Kalima yumvaga abantu bavuga ko u Rwanda rutagira amabuye y’agaciro, ndetse n’ayo rutunze atari ayarwo. Ibi byaramutunguye kuko yari yaramaze kubona aho mabuye ari mu gihugu, bituma yiyemeza kwinjira muri uru rwego kuko yari azi amahirwe rubitse.

Ibi kandi byamufashije kwereka abanyamahanga ko u Rwanda ari igihugu gifite umutungo kamere w’amabuye y’agaciro uhagije.

Ati “Nza mu Rwanda nagize amahirwe yo gusura igihugu, njya za Rwinkwavu, njya za Musha… nza kumenya ko igihugu gifite amabuye y’agaciro kandi yatangiye gucukurwa kera.”

Uyu muhate we wanatewe imbaraga cyane n’uburyo ubwo Leta yeguriraga abikorera ibirombe, abanyamahanga babyitabiriye ku bwinshi, akifuza kwinjiramo nk’Umunyarwanda kuko icyo gihe bari bake.

Imbogamizi zari nyinshi

Nk’umuntu wari ukiva muri Leta, Kalima ntiyorohewe no kubona amafaranga akenerwa muri iryo shoramari, gusa ibi ntibyamuciye intege kuko yahisemo gukorana n’abashoramari bo hanze “Baje biguru ntege nabo batizeye bavuga bati ‘ariko se wizeye iki?’"

Yavuze ko ibyo byose bitamuciye intege kuko “yari afitemo kimwe cyo kumenyekanisha ko mu Rwanda hari amabuye y’agaciro.”

Uru rwego rwanahuye n’izindi mbogamizi cyane cyane nyuma y’uko Leta Zunze Ubumwe za Amerika zitangiye gushyiraho amananiza ku mabuye y’agaciro aturuka mu Karere k’Ibiyaga Bigari u Rwanda ruherereyemo.

Ibi byose ariko ntibyamuciye intege kuko yakomeje gukora cyane no kwiyubaka, inyungu yakuye mu rwego rw’amabuye y’agaciro ayishora mu rwego rw’ubuzima aho yashinze Ivuriro rya ‘Legacy Clinic’ riri mu mavuriro yigenga afite ibikoresho bigezweho mu Rwanda.

Yavuze ko iki cyifuzo cyatewe ahanini n’ibibazo nawe yahuye nabyo, aho umubyeyi we yabuze aho yivuriza, kandi nyamara n’ishoramari muri uru rwego rikaba ryari rikiri rito, byose bimuha imbaraga zo gutangiza iri vuriro.

Ati “Ndavuga reka nanjye ngerageze, mfite igitekerezo cyo kuba nashinga ahantu umuntu ashobora kuza arwaye, atanarwaye ashaka kumenya ukuntu ahagaze, akaba yabona muganga, akaba yakwipimisha hari laboratwari zihagije.”

Mu ntangiriro, Kalima yabanje gukorana n’abanyamahanga ariko aza kubona ko Abanyarwanda nabo bashoboye.

Kugeza ubu iri vuriro riri ku rwego rukomeye aho rifite abaganga bahagije, ndetse ku munsi rikaba ryakira abarwayi barenga 450, ati “Numva mu by’ukuri nanjye ari uruhare rwanjye rwo kubaka igihugu cyanjye.”

Abagore ntibagitinya ibirombe

Kimwe mu bibazo Kalima yasanze mu bucukuzi bw’amabuye y’agaciro ni ikijyanye n’imyumvire, aho abagore batibonaga mu mirimo yo gucukura amabuye y’agaciro, mu gihe n’abagabo babikoragamo batagezaga amafaranga mu rugo, ahubwo bakayangiza. Ibi byatumaga agace karimo ibirombe bikoreshwa na Kalima kadatera imbere.

Kalima yabonye iki kibazo, atangira gushishikariza abagore kwinjira muri uyu mwuga ku buryo ubu “Hari benshi maze gushyingira, hari benshi bajya gukomeza amashuri” barabanje gukora mu rwego rw’amabuye y’agaciro.

Nyuma yo kushishikariza abagore kwinjira muri uyu mwuga, Kalima, ku bufatanye na Leta ndetse na UNICEF, yaje gushinga Irerero ku buryo abagore babyaye bakora mu birombe, bashobora kujya bazana abana babo kuri iryo rerero ku buryo bakomeza gukora akazi kabo ariko abana bafite aho bari kwiga no kwitabwaho.

Kalima yavuze ko nyuma y’uko u Rwanda rubohowe, rugatangira urugendo rwo kwiyubaka, yari afite icyizere cy’uko urugendo rw’iterambere ruzashoboka, bitewe n’imiyoborere myiza yatangaga icyizere muri ibyo bihe.

Ati “Benshi babohoye iki gihugu, baje bafite uwo murava, nkatwe rero twagize Imana zo gukorana na bamwe mu bayobozi bakuru, twatangirira nko ku Muyobozi Mukuru w’igihugu cyacu, wamurebagamo kuvuga ngo nta kureba inyuma, reba imbere ukuntu twubaka iki gihugu. Wareba n’abandi ukuntu bafite umurava, nibyo byatumye ntekereza ibintu binini. Ni naho duhagaze ubu.”

Kalima yavuze ko urubyiruko rukwiriye guhaguruka rugakora, aho kwishyiramo ko umuntu wateye imbere yageze ku bintu abikuye ahandi.

Ati “Numva nabwira [urubyiruko] ko rudakwiriye kwishyira mu mutwe ko icyo mugenzi we yagezeho ari ukubera ko yafashijwe, mu Rwanda twabonye urugero ko umuntu ashobora gutangirira kuri zero… Buriya hari benshi bagiye bahabwa amahirwe, bagahabwa amafaranga n’abashoramari ugasanga bayakoresheje nabi. Mbagira inama yo kuba abanyakuri, bajye bavugisha ukuri kuko ukuri kurafasha.”

Kalima yavuze ko ashyigikiye cyane gahunda wa Perezida Kagame ukunze gutanga amahirwe ku rubyiruko, akavuga ko ari impamba igihugu cyihaye izatuma gikomeza gutera imbere mu myaka myinshi iri imbere. Yashimangiye ko urubyiruko rw’ubu rukwiriye kwigirira icyizere, cyane ko rufite abajyanama beza.

Ati “Urebye neza ni nko kuvuga ngo mugende mufate inshingano ariko mufite abajyanama. Amahirwe bafite ni uko bafite abajyanama, hari ibyo baza basanga, bazashobore kubisigasiga, bazashobore kubisana.”

Uretse kuba ari umushoramari mu nzego zitandukanye, Kalima anahagarariye inyungu za Repubulika ya Tchèque, igihugu gifitanye umubano mwiza n’u Rwanda ndetse na Perezida wacyo, Petr Pavel, akaba yari mu Rwanda aho yifatanyije n’igihugu mu gikorwa cyo kwibuka abazize Jenoside yakorewe Abatutsi mu 1994.

Reba ikiganiro twagiranye na Jean Malic Kalima

Jean Malic Kalima aganira n'umunyamakuru wa IGIHE

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .