Intandaro y’ubwiyongere bw’inda ziterwa abangavu mu mboni za Sr Nayituriki

Yanditswe na Mukahirwa Diane
Kuya 31 Ukwakira 2020 saa 07:31
Yasuwe :
0 0

Umuyobozi w’Ishuri rya Lycée Notre Dame de Citeaux riherereye mu Mujyi wa Kigali, Sr Hélène Nayituriki uzwi cyane mu nyigisho zigamije guteza imbere umuryango, yamaganye ubukangurambaga bukunze gukorwa bwo kwemerera ingimbi n’abangavu kuboneza urubyaro cyangwa kugendana udukingirizo.

Sr Nayituriki yavuze ko gushishikariza urubyiruko gukoresha agakingirizo cyangwa gukoresha imiti yo kuboneza urubyaro, ari ukurushumuriza ngo rujye gukora imibonano mpuzabitsina.

Kiliziya Gatolika Sr Nayituriki abarizwamo, ntiyemera uburyo bwo kuboneza urubyaro butari ubwa kamere, kandi ifata gukora imibanano mpuzabitsina ku batarashakanye nk’icyaha.

Mu kiganiro yagiranye na IGIHE, Sr Nayituriki yavuze ko imyitwarire idahwitse iranga urubyiruko muri iyi minsi, ituruka ku bintu bitandukanye birimo no kudohoka kw’ababyeyi ku kwita ku bana babo.

Guhera mu myaka nk’itanu ishize, umubare w’abangavu baterwa inda wagiye wiyongera. Impamvu zabyo ntizivugwaho rumwe.

Mu kwirinda no kugabanya uwo mubare hari abagiye basaba ko urubyiruko rwiga mu mashuri rwegerezwa udukingirizo, rukemererwa no gufata imiti yo kuboneza urubyaro mu gihe rubyifuza.

Sr Nayituriki asanga ibyo ntacyo byafasha ahubwo byaba ari nko kubaha rugari ngo bajye gusambana.

Yagize ati “Ibi byo ni ubwicanyi bwica abantu benshi. Icya mbere urica uwo mwana uhaye kunywa iyo miti, urica n’uwari kuvuka. Iyo miti mushaka guha abana ni nko kubashumura, bisa nko kubwira impigi ngo genda uhige nubona inyamaswa wirire. Ubwo se ibyo ni ibintu bizima cyangwa ni ubwicanyi?”

Sr Nayituriki yavuze ko abantu badakwiriye kuvuga ko kwifata byabananiye kandi hari ibindi byaha birinda bikabashobokera.

Ati “Njye mbona ari ubugome buhanitse guha abana bacu ibyo binini cyangwa utwo dukingirizo n’ibindi byose byo kuboneza urubyaro. Ntidukwiye kuvuga ngo byamunaniye kwihangana, nidukore uburyo bwose bitamunanira kuko birashoboka. Umwana iyo ugiye umwigisha ugakora kuburyo umurinda ubuzerezi ntaba ingegera, kumurinda rero birashoboka cyane.”

Abaharanira ko urubyiruko ruhabwa udukingirizo cyangwa rwemererwa kuboneza urubyaro, bashingira ku mahame y’uburenganzira bwa muntu n’ubwigenge bwa muntu ku kimubereye.

Sr Nayituriki si ko abibona. Ati “Ukajya ukumva ukumva abantu bakuru b’ababyeyi baririrwa baririmba ngo nibahe abana agakingirizo. Umwana uramuha agakingirizo k’iki ? Ubwo uba umwigisha gukora iki? Mpora mbivuga uko ni uguha umwana inkoni ngo nazamuka umusozi aze kuyishingikirizaho na we ajye ahora ayitwaza nyine.”

Yavuze ko ikibazo cy’ubwiyongere bw’ubusambanyi mu rubyiruko no gutwara inda zitateganyijwe, gituruka ku bintu byinshi harimo no kuba ababyeyi batakibonera umwanya abana.

Yavuze ko uburyo ababyeyi basigaye bareramo abana, budashobora gutuma babona umwanya wo kuganira cyangwa ngo abana babiyumvemo, babubahe nk’ababyeyi.

Ati “Umwana bamutegura akiri muto, akakureba mu jisho akareba uko rimeze akaba ari naryo yigana. Nubwo aba ataramenya ubwenge ariko iyo akoze akantu ukamureba nabi amenya ko atari byiza.”

“Umwana uza ugaha ibere umunota umwe ugahita uterera umukozi ndakubwiza ukuri uwo mwana ntabwo azagukunda, nta n’ubwo azakumvira ariko wa wundi muganira ufata mu ntoki mukamarana akanya, bituma mwunga ubumwe.”

Sr Nayituriki yavuze ko mu gihe cyose ababyeyi bashyira imbere amafaranga kurusha abana babo, nta kabuza ingaruka zabyo zizakomeza kwiyongera.

Ati “Uyu munsi ababyeyi barabona amafaranga kurusha uko babona abana babyaye cyangwe se bakarangara bakumva ubuzima butabafasheho ndetse hari n’ababyara batabishaka. Ntabwo abo barera abo bana ngo babe abana bazima.”

Yavuze ko bitumvikana uburyo umubyeyi avuga ko yabuze umwanya wo kuganiriza abana be, nyamara akabona uwo gukora ibindi.

Ati “Ntabwo wabura umwanya wo kurera umwana wawe. Kuki se ubona uwo kujya mu kabari cyangwa kumara amasaha atanu ukora imisatsi ntiwite ku mwana?”

Imibonano mpuzabitsina imbere y’abana

Mu bindi bikunze gutungwa agatoki kuba intandaro y’inda nyinshi zitateganyijwe mu rubyiruko, harimo ubumenyi buke ku buzima bw’imyororokere.

Sr Nayituriki yavuze ko ababyeyi bakwiriye kumenya uko babyigisha abana babo hakiri kare, bakabikora mu kinyabupfura kandi ubutumwa bukumvikana.

Ati “Tugomba kuganiriza abana ariko mu buryo bwiyubashye, yakubaza aho umwana ava ukamusobanurira bijyanye n’imyaka ye ukagenda umwongerera ubumenyi uko akura. Urabimuhisha ajye kubishaka ahandi kandi najya kubishaka ahandi bazabimubwira nabi.”

Kuba hari ababyeyi batiyubaha, bagakorera imibonano mpuzabitsina mu maso y’abana babo nabyo Sr Nayituriki asanga ari ikibazo gikomeye.

Ati “Ni gute uza gukorera imirimo y’abakuru imbere y’umwana w’imyaka itatu? Umwana areba ibyo iwabo bakora na we akajya kubyigana. Ni tureke gufata abana ngo tubereke amabi yacu ahubwo twiyubahe nibyo bizatuma n’abana bacu biyubaha.”

Mu gihe umwana yagize ibyago agaterwa inda, Sr Nayituriki avuga ko atari wo mwanya wo kumubwira nabi, ahubwo ari ukumuba hafi no kumuhumuriza kugira ngo umwana agiye kubyara avuke neza.

Yavuze ko kandi ari umwanya wo kwigisha uwo watewe inda atabiteguye, kugira ngo bitazongera kumubaho ukundi.

Sr Nayituriki yavuze ko icyo urubyiruko rukeneye cyane ari ibiganiro, haba mu muryango, ku mashuri n’ahandi “kandi bakaganirizwa n’abantu bafite imico myiza.”

Sr Nayituriki yavuze ko kwemerera ingimbi n'abangavu udukingirizo n'imiti yo kuboneza urubyaro ari ukubaroha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .