Intambwe idatsikira yafashije Nyaruguru kuvana abaturage mu bukene no kwesa imihigo (Amafoto)

Yanditswe na Prudence Kwizera
Kuya 5 Ugushyingo 2020 saa 07:00
Yasuwe :
0 0

Akarere ka Nyaruguru kaje ku isonga mu kwesa imihigo y’umwaka wa 2019/20 n’amanota 84% kubera ibikorwa bitandukanye kagezeho bigamije kuzamura imibereho myiza y’abaturage no kubateza imbere.

Abazi neza Nyaruguru bavuga ko yavuye kure mu bijyanye n’ibikorwa remezo, iterambere ndetse n’imibereho myiza y’abaturage kuko yahoze ituwe n’abakene benshi batungwaga no kujya guca inshuro mu tundi turere cyangwa mu mahanga ibyo bitaga ‘kudeya’

Kuri ubu imibereho y’abagatuye iri mu nzira nziza kuko hari ibikorwa remezo by’ibanze bagejejweho ku buryo byahinduye imyumvire n’imitekerereze y’abagatuye, bituma kegukana umwanya wa mbere mu kwesa imihigo y’umwaka wa 2019/20 kavuye ku mwanya wa 24 kariho mu 2017/18

Zimwe muri gahunda twavuga muri Nyaruguru ni uko buri murenge wamaze kugeramo umuriro w’amashanyarazi ndetse ingo ziyafite ziri ku kigero cya 93%; amazi meza yegerejwe abaturage ku rugero rwa 80,8%; amashuri yubatswe ku bwinshi ndetse n’amavuriro ku nzego z’utugari (Poste de Santé) yarahageze.

Aka karere gatuwe n’abaturage 318.832 kandi abagera kuri 90% ku ijana ni abahinzi-borozi.

Umuyobozi w’Akarere ka Nyaruguru, Habitegeko François, yabwiye IGIHE ko ibyiza bagezeho byose babikesha gukorera hamwe no gufatanya bishingiye ku miyoborere myiza iri mu gihugu irangajwe imbere na Perezida Paul Kagame.

Ubuhinzi n’ubworozi

Ha mbere mu Karere ka Nyaruguru harangwaga inzara yatumaga bamwe mu bagatuye batungwa no kujya guca inshuro mu tundi turere, bitewe n’uko ubutaka bwaho busharira babuhingaho ntibyere.

Umuyobozi w’Akarere ka Nyaruguru, Habitegeko François, yavuze ko umusaruro w’ubuhinzi wazamutse ku buryo bufatika kuko abaturage bafashijwe kubona ishwagara yo guhingisha ubutaka busharira.

Urugero ni nko ku birayi aho ku mwaka hahingwa hegitali zigera ku 7000 aho kuri hegitali imwe hasarurwa toni ziri hagati ya 24 na 30.

Muri aka karere hakunze kwera ibirayi, ibigori, imboga n’ingano ariko by’umwihariko hasarurwa icyayi ku bwinshi.

Hakozwe amatarasi y’indinganire ku buso bwa hegitali zisaga 5000, hatunganywa n’ibishanga ku bwinshi kugira ngo umusaruro w’ubuhinzi wiyongere.

Muri hegitali 934 z’ibishanga binini bihaboneka hamaze gutunganywa hegitali 575. Ni Akarere katagira ibishanga byinshi bitewe n’imiterere y’imisozi yako. Ibihari bikunze guhingwamo ibirayi, ibigori n’imboga.

Ibyo byatumye abaturage batangira guhinga kinyamwuga ndetse hashyirwaho n’inganda ziciriritse zitunganya umusaruro ukomoka ku buhinzi.

Ati “Ntabwo ari uguhingira gusa kurya ahubwo kuri ubu bahingira n’isoko ugasanga n’ibihingwa byera muri Nyaruguru biri ku masoko ya hano no mu tundi turere ndetse n’i Kigali.”

Hahujwe ubutaka kuri hegitali 5572 buhingwaho ibihingwa byatoranyijwe kandi bucibwaho amaterasi y’indinganire kugira ngo harwanywe isuri ndetse n’ifumbire hamwe n’ishwagara ihingishwa idakushumukira mu tubande.

Abahinzi bubakiwe ikigo kigezweho mu Murenge wa Kibeho cyagenewe ibikorwa by’ubuhinzi kirimo n’uruganda rutunganya umusaruro w’ibigori; byose byatwaye agera kuri Miliyoni 900 Frw.

Umwihariko ku buhinzi bw’icyayi

Bitewe n’uko Akarere ka Nyaruguru gafite ubutaka bweraho icyayi ku bwinshi, abahinzi bazaniwe umushoramari ubaguriza amafaranga yo kugihinga bakazamwishyura cyeze. Mu 2017 nibwo yatangiye kuyabaguriza.

Uwo mushoramari bazaniwe na Perezida Kagame ni uwo mu gihugu cy’u Bwongereza witwa Sir Ian Wood; abaguriza amafaranga yo guhinga icyayi binyuze mu mushinga we witwa SCON (Services Company Outgrowers Nyaruguru Ltd).

Ni umushinga mugari uzamara imyaka 20 aho bateganya guha inguzanyo abahinzi b’icyayi 7 000 kandi bahinze icyayi ku buso bwa hegitali ibihumbi birindwi. Umuturage ufite hegitali imwe agurizwa ibihumbi 900 Frw.

Uwo mushinga watangiriye mu Mirenge ya Kibeho, Mata, Cyahinda na Munini ariko muri uyu mwaka wa 2020 uzakomereza mu Murenge wa Busanze.

Ibibazo bibangamiye imibereho myiza y’abaturage

Akarere ka Nyaruguru kashyize ingufu mu gukemura ibibazo bibangamiye imibereho myiza y’abaturage birimo abatagira aho kuba. Mu mwaka w’imihigo wa 2019/2020 hatujwe imiryango 328.

Habitegeko yavuze ko kuri ubu nta muturage ugisembera kubera kutagira aho kuba.

Ati “Ubu aho mvugira aha nta muturage uri mu karere uvuga ngo ‘njyewe ndasembera singira aho mba’. Ashobora kuba ari mu nzu wenda idahesheje ishema, abo turacyabafite byumvikane neza ariko kuba yavuga ngo ntabwo mfite aho nkinga umusaya icyo cyarakemutse.”

Amashanyarazi n’amazi

Mu Karere ka Nyaruguru buri murenge wamaze kugezwamo amashanyarazi ndetse abaturage bayafite mu ngo zabo bari ku kigero cya 93%. Harimo akomoka ku miyoboro migari ku rugero rwa 38.4% n’aho akomoka ku mirasire y’iziba ari ku rugero rwa 54.1%.

Mu 2011 ingo zari zifite amashanyarazi zari ziri ku kigero cya 0.8%.

Bamwe mu baturage bo mu Karere ka Nyaruguru baherutse kubwira IGIHE ko amashanyarazi yahinduye imibereho yabo.

Nshimiyimana Charles wo mu Murenge wa Busanze ati “Mbere twaracuruzaga tugafunga saa Moya nabwo twarinze gucana udutadowa ariko uyu munsi turakora tukageza saa Yine z’ijoro ubona hakiri ku manywa. Ubu buri muhanda usanga ufite amatara ndetse n’imbere y’urugi rwa buri muturage ugasanga habona neza nta kibazo.”

Ku mazi meza, abaturage bayafite bangana ni 257.697 mu bagera kuri 318.832 batuye akarere bangana na 80.8%

Imihanda ya kaburimbo

Muri Werurwe 2019 ni bwo mu Karere ka Nyaruguru hatangiye kubakwa umuhanda wa kaburimbo Huye-Kibeho-Munini-Ngoma ureshya n’ibilometero 66. Biteganyijwe ko uzuzura muri Nzeri 2021.

Bamwe mu baturage batuye mu gice uwo muhanda uri kubakwamo baherutse kubwira IGIHE ko bawitezeho impinduka ziganisha ku iterambere n’imibereho myiza.

Nkurunziza Alphonse yagize ati “Nanjye nzagura imodoka bakimara kuwurangiza izajya imfasha mu kazi kanjye kajyanye n’ubuhinzi nkora bw’icyayi.”

Umuyobozi w’Akarere ka Nyaruguru, Habitegeko François, yavuze ko hari ibindi bilometero 35 bya kaburimbo iciriritse n’ibindi bigera kuri 35 by’imihanda myiza y’igitaka ndetse n’ibigera kuri 23 by’imihanda iri gukorwa mu byanya bihingwamo icyayi.

Hari kandi umushinga ugeze kure wemezwa wo kubaka umuhanda wa kaburimbo wa kilometero 62 uzava ku Cyitabi mu Karere ka Nyamagabe ukanyura mu Murenge wa Kivu, Muganza na Ruheru ugahura n’uwa Remera ugakomereza muri Nyagisozi.

Isoko rya kijyambere na gare

Mu Murenge wa Kibeho hubatswe isoko rya kijyambere na gare igezweho byatwaye asaga miliyoni 840 Frw. Byombi byubatswe mu mushinga mugari witwa ‘Kibeho Modern Market and Car Parking’ ugamije guteza imbere Nyaruguru mu bijyanye n’ibikorwaremezo.

Bamwe mu bacuruzi n’abagenzi bavuga ko na bo iterambere rikomeje kubageraho kuko ibikorwaremezo babyubakirwa uko umwaka ushize undi ugataha.

Ndatinya François ukora umwuga wo kudoda imyenda ati “Turishimye cyane kuko ubona ko dukorera ahantu heza hasobanutse; mbere aho nakoreraga hari ivumbi ryinshi habangamye. Ubu byatumye ndangura ibicuruzwa byinshi kuko aho nkorera ari heza kandi hagaragara.”

Ibitaro bya Munini

Ibitaro bya Munini Perezida Kagame yemereye abaturage bo mu Karere ka Nyaruguru bigiye kuzura kuko inyubako zamaze kuzamurwa hasigaye imirimo ya nyuma irimo gukora amasuku no gushyiramo ibikoresho bikenewe.

Byatangiye kubakwa muri Werurwe 2018, icyiciro cya mbere kigizwe n’ibyumba 160 ni cyo kigiye kuzura kikaba kigizwe n’inzu ebyiri ariko hakazakurikiraho kubaka icyiciro cya kabiri kigizwe n’inzu nini ifite ibyumba 140.

Umuyobozi w’Akarere ka Nyaruguru, Habitegeko François, yavuze ko bizatahwa bitarenze muri Gashyantare 2021.

Inganda zitunganya icyayi

Mu Karere ka Nyaruguru hari inganda eshatu nini zitunganya umusaruro w’icyayi ungana toni zirenga 5000 z’icyayi cyumye ku mwaka.

Hari kandi umushinga w’inganda ebyiri nini zizubakwa mu 2020/21 zizajya zitunganya toni z’icyayi cyumye zigera ku bihumbi 10 ku mwaka.

Hari kandi inganda nto zitunganya ikawa zigera ku munani n’izindi nto enye zitunganya umusaruro w’ibigori.

Imbogamizi zirimo ubwumvikane buke no guhungabanya umutekano

Zimwe mu mbogamizi Umuyobozi w’Akarere ka Nyaruguru, Habitegeko François, avuga zabakomye mu nkokora harimo ubwumvikane buke bwigeze kurangwa muri komiye nyobozi y’akarere ndetse n’igitero cyagabwe n’abagizi ba nabi mu Murenge wa Nyabimata mu 2018.

Ubwo bwumvikane buke bwagaragaye hagati ye (Habitegeko) n’uwari Umunyamabanga Nshingwabikorwa w’Akarere ka Nyaruguru, ndetse n’uwari Visi Meya ushinzwe iterambere ry’ubukungu.

Habitegeko avuga ko byatumye batsikira ariko nyuma abo bayobozi bombi bamaze kugenda iterambere rirakomeza.

Ku kijyanye n’umutekano avuga ko kuri ubu wifashe neza ariko ibitero byagabwe mu 2018 byagize ingaruka ku baturage kuko hari abagera kuri bane byahitanye, abandi basahurwa imitungo yabo.

Ubuyobozi bwagerageje kubafasha ariko icyo bishimira muri iki gihe ni uko ababigizemo uruhare barimo Nsabimana Callixte ‘Sankara’ na Rusesabangina Paul babyigambye bamaze gufatwa bakaba bari kuburanishwa n’inkiko z’u Rwanda.

Yagiriye inama umuyobozi uzamusimbura igihe azaba asoje manda ye kuzashyira ingufu mu gukemura ibibazo bibangamiye imibereho myiza y’abaturage kuko hari ibigihari, agaharanira gukorera hamwe n’abandi, akirinda gushyira inyungu ze imbere kandi akirinda ko iterambere akarere kagezeho ryasubira inyuma.

Yasabye abaturage gukomeza kwiteza imbere no gukorana neza n’ubuyobozi bubahiriza gahunda nziza za Leta.

Abahinzi bubakiwe ikigo kigezweho mu Murenge wa Kibeho cyagenewe ibikorwa by’ubuhinzi kirimo n’uruganda rutunganya umusaruro w’ibigori
Abaturage basigaye batuzwa ku midugudu bakuwe mu manegeka
Abaturage batujwe mu Mudugudu wa Gorwe bahawe n'inka zo korora
Biteganyijwe ko uyu muhanda Huye-Kibeho-Munini-Ngoma ureshya n’ibilometero 66 uzuzura utwaye amafaranga y’u Rwanda agera kuri miliyari 70
Bitewe n’uko Akarere ka Nyaruguru gafite ubutaka bweraho icyayi ku bwinshi, abahinzi bazaniwe umushoramari ubaguriza amafaranga yo kugihinga bakazamwishyura cyeze
Gare ya Kibeho yorohereje abakora ingendo
Ibinyabiziga byatangiye kunyura mu muhanda wa kaburimbo uri kubakwa i Nyaruguru bigenda neza nta vumbi n'imikuku
Ibitaro bya Munini bizatahwa bitarenze muri Gashyantare 2021
Inyubako y'Ibiro by'Akarere ka Nyaruguru
Inzego z'ubuyobozi mu Karere ka Nyaruguru zifatanya n'abaturage mu bikorwa birimo n'ubuhinzi
Mu Karere ka Nyaruguru buri murenge wamaze kugezwamo amashanyarazi ndetse abaturage bayafite mu ngo zabo bari ku kigero cya 93%
Mu Murenge wa Kibeho hubatswe isoko rya kijyambere na gare igezweho byatwaye asaga miliyoni 840 Frw
Uruganda rw'icyayi rwa Mata ni rumwe mu zitunganya umusaruro mwinshi
Umuyobozi w’Akarere ka Nyaruguru, Habitegeko François, yabwiye IGIHE ko ibyiza bagezeho byose babikesha gukorera hamwe no gufatanya

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .