Inkuru y’uburyo Mateke atigeze arumbira na rimwe Museveni

Yanditswe na Matthew Ndirima
Kuya 24 Ukuboza 2019 saa 02:10
Yasuwe :
0 0

Iyo urebye neza abayobozi bari muri Guverinoma ya Uganda, bashinzwe ibijyanye no gukorana n’imitwe y’iterabwoba igamije guhungabanya u Rwanda, bihita bikwibutsa Polonius umukinnyi wahimbwe na William Shakespeare mu mukino witwa Hamlet wo mu 1602 aho yavuze ati “no muri ibi bikorwa by’ubusazi, hari uburyo bwo kugera ku kintu.”

Kuri buri kimwe cyose cyavuzwe kuri Uganda ku buryo ishyira imbaraga nyinshi mu guhungabanya umutekano w’u Rwanda, harimo n’amakuru y’uko Minisitiri ushinzwe Ibikorwa by’Akarere, Philemon Mateke, ari umuntu wisaziye utajya mu bikorwa nk’ibi by’intambara; gusa hari ibigaragaza ko hari uburyo bwo kugera ku bintu mu bikorwa by’ubusazi.

Ku bantu bafite byinshi bahuriyeho, u Rwanda na Uganda, ku bize mu mashuri yisumbuye mu myaka ya 1970, ndetse no ku bakurikiye ingengabitekerezo ya politiki ya Minisitiri Dr Philemon Mateke; bahita babona ko nta wundi Museveni yari gutoranya ngo ashyire mu bikorwa umugambi wo guhuza ibikorwa by’imitwe y’iterabwoba irwanya u Rwanda irimo FDLR na RNC.

Amateka ya Mateke y’urwango yagiriye Abatutsi azwi na benshi kuva mu myaka ye ya kera akiri mu mashuri yisumbuye ahagana mu 1970.

Ubwo Museveni yatangaga izi nshingano kuri Minisiteri, yari abizi neza ko, Mateke ariwe muntu ukwiriye aka kazi.

Nyuma y’uko hahishuwe uruhare rwe ndetse n’isano ye ya hafi n’imitwe y’iterabwoba igamije gutera u Rwanda, Mateke yasohoye itangazo ry’amafuti ku wa 19 Ukuboza 2019, agerageza kwivuga neza aho kuvuga guverinoma ye.

Yazanyemo umwe mu bantu bazwi mu mateka ko yari yuzuye ingengabitekerezo ya Jenoside, Joseph Goebbels, amugereranya n’Umunyamabanga wa Leta ushinzwe Ububanyi n’Amahanga, Nduhungirehe Olivier.

Gobbles yari Umu-Nazi wa karundura wagize uruhare rukomeye wari ushinzwe ibya Propaganda ndetse yari umuntu wo hafi cyane wa Adolph Hitler; yagize uruhare rukomeye muri Jenoside yakorewe Abayahudi. Ibi ubwabyo ni ikigereranyo gitangwa n’umwarimu wabaswe n’ingengabitekerezo y’u Rwanda.

Philemon Mateke yigaragaje bwa mbere nk’umuntu ushishikajwe n’inzangano zishingiye ku moko mu myaka ya 1970.
Nk’umwarimu ku ishuri ryisumbuye rya Mutorere muri Kisoro, mu ibanga rikomeye yashishikarije abanyeshuri b’Abahutu babaga Kisoro no mu Rwanda kugira ngo bibasire bagenzi babo baturukaga mu nkambi zari zicumbikiye Abanyarwanda muri Uganda.

Abandi bibasiwe hamwe n’Abanyarwanda, bari abanyeshuri b’Abafumbira b’Abatutsi bari abaturage ba Uganda ku buryo bwemewe n’amategeko.

Nyuma y’ibyo bitero bikomeye byakomerekeyemo umubare munini w’abanyeshuri, umutuzo waje kugarurwa mu kigo ubwo abayobozi n’abasirikare bari baturutse i Kabale hari muri Komini Kigezi bazaga bagahosha icyo gitero.

Abasirikare boherejwe kuri iryo shuri bahamara ibyumweru bigera kuri bibiri barinze abanyeshuri bahigwaga, bakazajya buri gihe bakora igenzura mu masaha y’ijoro nyuma y’uko bamenyeye ko abo bagizi ba nabi bitwikira ijoro ngo bagabe ibitero byabo.

Muri abo bagizi ba nabi harimo abanyeshuri baturuka mu Rwanda bari barambutse umupaka bagiye kwiga, umwe muri bo wamenyekanye cyane ni Casimir Bizimungu, umwe mu bo Dr Mateke yafashije kugira ngo babone ishuri.

Bizimungu waje kuba Minisitiri w’Ubuzima na Minisitiri w’Ububanyi n’Amahanga ku butegetsi bwa Habyarimana, byaje kurangira ari umwe mu bantu bacuze umugambi wo gutsemba Abatutsi mu 1994.

Ibi bigaragaza ko ingengabitekerezo y’urwango ya Philemon Mateke itavutse ejo, yatangiye kurera abakoze Jenoside mu myaka myinshi mbere. Uruhare rwe n’umuhate mu gufasha FDLR na RNC ni umusaruro w’ibikorwa yashyizeho umutima mu myaka myinshi.

Ntibisaba ngo ni ubuyobozi ubu n’ubu buri ku ntebe i Kampala, Mateke ntajya atezuka ku ngengabitekerezo ye; yaba ari umwarimu ku ngoma ya Idi Amin mu myaka ya 1970, nka Minisitiri ku bwa Milton Obote no ku bwa Museveni aho yahawe rugari rwo kugera ku ndoto ze ngo azishyire mu bikorwa.

Ubwo Perezida Museveni yafataga ubutegetsi mu 1986 nk’umuntu wari mu ishyaka rya NRM, Mateke ni we mu Minisitiri wenyine muri bose bavaga mu ishyaka rya UPC n’abandi bayobozi bo hejuru wahisemo guhungira i Kigali.

Yatuye i Kigali ubwo u Rwanda rwayoborwaga na Habyarimana mu gihe abandi bagenzi be bo bari baragiye gushaka ubuhungiro mu bihugu bivuga Icyongereza aho bagize amahirwe yo kubona akazi gatandukanye bitewe n’ibyo bari barize.

Mateke washoboraga kubona byoroshye akazi mu bihugu bivuga Icyongereza birimo n’ibyo muri Afurika y’Iburasirazuba n’ibyo muri Afurika y’Amajyepfo, aho benshi mu baminisitiri bagenzi be bakabonye; yahisemo kuguma mu Rwanda mu bantu ba hafi ba Habyarimana, ariko abizi neza ko adashobora kubona akazi mu gihugu kivuga Igifaransa.

Ariko ku rundi ruhande, ni inde ukeneye akazi mu gihe ari umushyitsi w’imena w’igihugu?

Mu itangazo rya Mateke ryo ku wa 19 Ukuboza 2019 aho yisobanuraga agaragaza uwo ari we wa nyawe aho kuba ubutegetsi abarizwamo aho akora nka Minisitiri bifite igisobanuro cyihariye iyo ugerageje kugitekerezaho.

Ni gute yashoboraga kuvuganira Guverinoma ifite intumwa zamutabye mu nama mu biganiro byabereye i Kampala ku wa 13 Ukuboza 2019?

Ntabwo zigeze zigerageza kumuvuganira nyuma y’ibimenyetso simusiga byagaragajwe n’intumwa za Guverinoma y’u Rwanda, bigaragaza uruhare rwa Mateke nk’umuhuzabikorwa w’imitwe y’iterabwoba igamije guhungabanya u Rwanda ifashijwe na Guverinoma ya Uganda.

Bitewe n’ibimenyetso ntakuka byagaragajwe, Minisitiri w’Ububanyi n’Amahanga wa Uganda, Sam Kuteesa n’Umukuru w’Urwego rw’Ubutasi mu Gisirikare, CMI. Brig. Kandiho ntacyo bari bafite cyo kurenzaho usibye kuryumaho bagaceceka.

Nk’uko byagiye bitangazwa na Chimp Reports, ikinyamakuru kinyuzwamo amakuru ya CMI, itangazo rya Mateke ryo ku wa 19 Ukuboza ryatumye abakora iperereza bo muri Loni basaba guhata ibibazo Mateke ariko ngo bimwa uburenganzira na Guverinoma ya Uganda.

Niba uyu mugabo ari umwere yakwifuje ko Isi yose imenya icyatumye guverinoma ye yangira abakora iperereza ba Loni ko bamuvugisha.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .