Inkomoko y’ifoto igaragaza intama yagendanaga n’ingabo za RPA

Yanditswe na Prudence Kwizera
Kuya 10 Mutarama 2020 saa 08:48
Yasuwe :
0 0

Amafoto n’inyandiko z’amateka by’urugamba rwo kubohora u Rwanda bigaragaramo intama y’isekurume yagendanaga n’ingabo za RPA ndetse yanabanye nazo iminsi itari mike, ariko abatari bake bakunze kwibaza byinshi kuri yo.

Umujyanama Mukuru wa Perezida wa Repubulika mu bya Gisirikare n’Umutekano, Gen James Kabarebe warwanye urwo rugamba, kuri uyu wa Kane yamaze ayo matsiko abarimu b’amateka bagera ku 1600, bari mu Itorero mu Karere ka Nyanza.

Umwe muri bo yamubajije aho iyo ntama yakomotse ndetse n’aho yaje kujya. Gen Kabarebe yavuze ko nta gitangaje cyari muri iyo ntama nk’uko bamwe babyibwira.

Ati “Twagiraga umwe mu bayobozi w’urwenya cyane, yapfuye mu 1993 witwaga Kayitare, yayoboraga batayo ya 101. Ni umuntu wagiraga urwenya; noneho ako gatama bari baratoraguye aho ngaho, abasirikare baba bakora akarasisi nako kakagakora nk’abasirikare, bahagarara kagahagara, bahindukira kagahindukira kandi batayo yakwimuka kakimuka”.

Gen Kabarebe yavuze ko iyo ntama y’umweru yakundaga abasirikare cyane kandi ikamenya batayo yayo, ku buryo n’iyo batayo zahuriraga hamwe n’izindi nijoro, iyo ntama itigeraga itakara, ikamenya iyayo ikayigendamo.

Yavuze iyo ntama yafotowe umunsi bari basuwe n’abanyepolitiki ba MDR barimo ba Twagiramungu Faustin; aba PSD barimo Dr Gafaranga Theoneste; Felicien Ngango, Frederic Nzamurambaho n’aba PL barimo Ndasingwa Landouard ‘Lando’ n’abandi.

Icyo gihe ngo habaye igisa n’umunsi mukuru, FPR yahuye n’ayo mashyaka.

Ati “Habaho akarasisi, (agatama) na ko gakora akarasisi neza cyane nk’abasirikare.”

Gen Kabarebe yasobanuye ko intambara yo guhagarika Jenoside itangiye iyo ntama ari bwo yishwe n’igisasu.

Ati “Tugiye guhagarika Jenoside intambara itangiye, abasirikare binjiye mu rugamba ikompura (igisasu) riragakubita rirakica.”

Urugamba rwo kubohora u Rwanda ruvugwamo byinshi ariko ibigarukwaho na benshi ni ubutwari, umurava no kudasubira inyuma byaranze ingabo za FPR Inkotanyi, byanatumye zihagarika Jenoside yakorerwaga Abatutsi.

Urwo rugamba rwatangiye tariki 1 Ukwakira 1990 rurangira tariki 4 Nyakanga 1994.

Inkuru wasoma: Intama yagendanaga n’Inkotanyi mu rugamba rwo kubohora igihugu ni iyande?

Iyi ntama yari ifite batayo ibarizwamo, iyigumamo kugeza yishwe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .