00:00:00 IGIHE NETWORK KN KINYARWANDA EN ENGLISH FR FRANCAIS

Injira ku gicumbi cy’umutekano mu by’ikoranabuhanga muri Israel

Yanditswe na Philbert Girinema
Kuya 22 Ukuboza 2022 saa 07:07
Yasuwe :

Umutekano mu by’ikoranabuhanga w’Isi yose, uri mu maboko y’abantu bamwe. Abanya-Israel! Nibo bafite sosiyete zitanga ibisubizo umuntu yakenera mu gihe afite ikibazo gifite aho gihuriye n’ikoranabuhanga, ndetse umunsi ku wundi, bahora bahanganye n’abantu batagira ingano bashaka kugaba ibitero bihishe inyuma ya mudasobwa.

Kugira ngo ubyumve neza, hafi kimwe cya gatatu cy’ikoranabuhanga ryifashishwa mu bwirinzi bw’ibitero bikorerwa kuri internet, ribarizwa muri Israel. Ni ibintu kandi byinjiriza iki gihugu amafaranga atari make dore ko nk’umwaka ushize, Israel yinjije miliyari 8,8$ biturutse ku gucunga umutekano mu by’ikoranabuhanga.

Mu 2014, Minisitiri w’Intebe wa Israel, Benjamin Netanyahu, yagennye ko Be’er Sheva, iba Umurwa Mukuru wungirije wa Israel, anawuha umwihariko ko ugomba kuba igicumbi cy’ikoranabuhanga.

Uwo mwanzuro ukimara gufatwa, hashyizweho uburyo bworohereza ibigo by’ikoranabuhanga kuba byahafungura ibiro, bisonerwa imisoro imwe n’imwe ndetse n’ibindi byemererwa kubona aho gukorera, imishahara y’abakozi n’ibindi.

Kugira ngo leta yerekane ko ishyigikiye koko iterambere rya Be’er Sheva, agace n’ubundi gasanzwe kari ahantu mu butayu, yafashe umwanzuro yimura ishami rya gisirikare rishinzwe iby’ikoranabuhanga, rijya gukorera muri uwo mujyi.

Ubu ni ho hari Ibiro bikuru by’Igihugu bishinzwe Umutekano mu by’Ikoranabuhanga. Ni naho hari Ishami ry’Urwego rw’Ubutasi bwa Israel, Mossad, rikora ibijyanye n’ikoranabuhanga.

Mu rugendoshuri muri Israel rwateguwe na Ambasade yayo mu Rwanda, twasuye ibi biro, gusa kimwe n’abandi bose, amatsiko yari ukumenya imikorere ya Mossad, bitewe n’uburyo twakuze tuyumva, uburyo yakoze operation karundura nyinshi ku Isi harimo n’imwe yaguyemo Yoni, umuvandimwe wa Benjamin Netanyahu i Entebbe muri Uganda.

Ucyinjira mu Biro bishinzwe Umutekano mu by’Ikoranabuhanga, usanganirwa n’abasore bambara nk’uko abarinda Umukuru w’Igihugu hano i Kigali basigaye bambara, kumwe usigaye ubabona bambaye amashati y’amaboko magufi adafunze ibipesu.

Icyo bagusaba bwa mbere ni ukukubikira telefoni, bakakubaza niba nta kintu na kimwe gifata amajwi ufite cyangwa se igifata amashusho. Ubwo amatsiko aba ashize ako kanya.

Twakiriwe na Erez Thidar ukuriye Urwego rw’Igihugu rushinzwe Umutekano mu by’Ikoranabuhanga. Ni umugabo utebya cyane, uvuga icyongereza cyiza adategwa.

Yatubwiye ko inyubako akoreramo, irimo abandi bakozi 120 ayoboye, ko bakorera mu bice bitandukanye, harimo igice cy’ubururu n’igice gitukura. Icyo cy’ubururu ni ikirimo amakuru umuntu ashobora kuba yamenya, naho iburyo bw’aho twari turi atubwira ko hakorera Mossad, mu gice gitukura.

Natwe tuti, aho Mossad ikorera ni ho dushaka, ntiyaduhakanira ahubwo araseka!! Yadusobanuriye ko Mossad ikora ku bintu by’ibanga cyane ku buryo atari ngombwa ko buri wese aba akwiriye kubimenya.

Ikintu gitangaje muri iyo nyubako, abantu bose barira ahantu hamwe, bafite imashini imwe yonyine ikora ikawa, kuko ngo zibaye nyinshi, abantu bajya batatana bari kuruhuka, ariko kuba ari imwe, bituma bahurira ahantu hamwe bakungurana ibitekerezo.

Ibiro bikuru by’Urwego rushinzwe Umutekano mu by’Ikoranabuhanga bifite ishami rikuru i Tel Aviv mu gihe Ibiro bishinzwe ibikorwa biri mu Mujyi wa Be’er Sheva.

Muri iyi nyubako i Be’er Sheva, niho hakirirwa telefoni z’abantu bose bahamagaye bavuga ibibazo bahuye nabyo. Thidar asobanura ko bimwe mu bibazo bakira, biba bidafite shinge na rugero ku buryo hari nk’uhamagara avuga ko printer ye yanze gukora ku mashini cyangwa se ko laptop ye yanze kwaka…gusa abo bose basubizwa neza ntibahutazwe kuko uru rwego ruba rushaka kubaka umubano mwiza n’abaturage ku buryo mu gihe hari ikibazo, baba aba mbere mu gutanga amakuru.

Andi makuru iki kigo kibona usibye ayo gihabwa n’abahamagara, ni ayo kigura ku bigo bikomeye nka Google, Microsoft n’ibindi, ubundi kikayagenzura. Ayo makuru ashobora kugurwa n’ibihugu, ntabwo umuntu ku giti cye ashobora kuyagura.

Sosiyete yose ikora ibijyanye n’ubwirizi mu by’ikoranabuhanga, iyo iki kigo kiyirabutswe, kirayigura, ku buryo ikoranabuhanga ryazo rishobora kuzifashishwa mu buryo bumwe cyangwa ubundi.

Ibigo bitanga amashanyarazi bihora mu mboni y’abagaba ibitero

Umunsi twasuriyeho iki kigo, cyari kimaze kubona ibitero by’ikoranabuhanga birenga miliyoni 4, byari bimaze kugabwa hirya no hino, kandi hari mbere y’uko saa sita z’amanywa zigera.

Mu cyumba babireberamo, biba bimeze nk’abantu bari mu kibuga. Ukabona ibitero biturutse muri Amerika, byagera ruguru ukabona abandi nabo barabyohereje ku buryo baba bameze nk’abari guhanahana umupira.

Ibigo bitanga serivisi z’amashanyarazi ni byo bikunda kwibasirwa cyane n’ibitero, ari nayo mpamvu buri gihe uru rwego ruhora ruryamiye amajanja kuko bishobora gutuma igihugu runaka kijya mu icuraburindi.

Ibitero by’ikoranabuhanga bigabwa biturutse muri mudasobwa irenze imwe, ku buryo udashobora kubona aho bituruka ha nyaho. Biba ikibazo iyo bibaye byinshi biturutse ahantu hamwe, icyo gihe nibwo hifashishwa ikoranabuhanga, hakaboneka IP Address y’aho byaturutse ku buryo niba bivuye muri Amerika, Israel ishobora kumenyesha FBI ko ahantu runaka hari imashini iri kugaba ibitero ikwiriye gukurwa ku murongo.

Ibitero bigabwa ku mbuga nkoranyambaga bigenzurwa hifashishijwe ikoranabuhanga ryakozwe n’Abanya-Israel ryitwa Trackzilla, ku buryo niba hari abashaka kwinjirira za website batahurwa batarazivogera.

Israel ifitanye imikoranire n’ibihugu birenga 90 birimo n’ibyo badacana uwaka. Impamvu ngo ni uko mu by’ikoranabuhanga, uwo ariwe wese yakubera umuntu w’ingenzi. Basobanura ko igitero cyagabwa hamwe, gishobora kugira ingaruka ahandi.

Muri ibyo bihugu bakorana bya hafi mu guhanahana ubunararibonye n’amakuru yakwifashishwa mu kurinda umutekano mu by’ikoranabuhanga.

Mu bitero by’ikoranabuhanga Israel itazigera yibagirwa, harimo nk’icyamaze iminsi 35 cyagabwe ku bitaro, ku buryo hari ubwoba ko amakuru y’abarwayi ashobora gushyirwa ku karubanda.

Urebye ku Isi hose, ibitero byinshi by’ikoranabuhanga bigabwa kuri serivisi z’ubuzima, uburezi n’izo gushyira website kuri internet (hosting).

Uduce tw’Isi dukunze kwibasirwa n’ibitero ni ibihugu byo muri Amerika y’Amajyepfo na Afurika.

Muri iyi nyubako ni ho hakorera Ishami rya Mossad rishinzwe umutekano mu by'ikoranabuhanga
Ibigo by'ikoranabuhanga bikomeye ku Isi byimuriye ibiro muri uyu mujyi
Inyubako zose ziri muri Be’er Sheva, zikoreramo ibigo bitanga serivisi z'ikoranabuhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .