Ingoro Ndangamurage y’u Rwanda yataramiye Intwaza zo mu Mpinganzima i Huye barasabana (Amafoto)

Yanditswe na Prudence Kwizera
Kuya 16 Mutarama 2020 saa 02:32
Yasuwe :
0 0

Abayobozi n’abakozi b’Ikigo cy’Ingoro z’Umurage w’u Rwanda, (INMR), basuye Intwaza zatujwe mu rugo Impinganzima mu Karere ka Huye bahakorera igitaramo n’ubusabane hagamijwe gususurutsa abo bakecuru n’abasaza.

Ni igikorwa bakoze kuri uyu wa Gatatu bari kumwe n’Itorero ry’icyo kigo ryataramye biratinda maze Intwaza zisagwa n’ibyishimo zibyinana nabo.

Icyo gitaramo cyatangiye ahagana saa kumi kigeza saa moya z’umugoroba cyaranzwe no kuririmba, kubyina, gusangira icyo kunywa ndetse no kumurika ibirango by’amateka bibukiranya ibigize umuco nyarwanda.

Bakoze n’ibindi birimo gukina igisoro, kuvugira inka, kuboha ibyibo n’ibiseke, guhamiriza n’ibindi.

Umuyobozi wa INMR, Amb Masozera Robert, yavuze ko kuva icyo kigo cyagera i Huye ari bo ba mbere bahisemo gusura mu rwego rwo kubifuriza umwaka mushya muhire wa 2020 ndetse no gusabana na bo.

Ati “Ntabwo turamara ukwezi tuzanye icyicaro gikuru hano i Huye, twaricyaye dukora urutonde rw’abantu tuzasura dusaga ab’ibanze ari abadukora ku mutima, ni mwe. Ni mwe ba mbere b’ibanze tuvuze ngo reka tubahereho kandi byadushimishije kuko tuzi ko tubivanamo umugisha wanyu wa kibyeyi.”

Amb Masozera yababwiye ko bazanywe no kubifuriza umwaka mushya muhire wa 2020; kubagaragariza urukundo no kubataramira.

Ati “Muzagire umwaka mushya muhire turabifuriza kuzagira ubuzima bwiza n’imibereho myiza, mbese imigisha yose ituruka ku Mana turayibifuriza muri uyu mwaka wa 2020; twahisemo kuza ngo tubibifurize kandi tunasangire umwaka mushya.”

Yababwiye ko ari ababyeyi beza bityo biyemeje ko bazajya babasura kenshi kugira ngo basangire ibyishimo.

Ati “Mwebwe muri ababyeyi bacu, turabonamo ba nyogokuru na ba sogokuru bacu dusigaranye, abenshi turi hano ababyeyi twagiraga ntabo tugifite, ni mwebwe dufite nk’ababyeyi bacu, natwe turi abana n’abuzukuru musigaranye.”

“Iyo abana bahuye n’ababyeyi na ba sekuru na ba nyirakuru murabizi ko biba ari ibyishimo n’umunezero.”

Hagati mu gitaramo habaye igikorwa cyo kumurika ibikoresho byo mu Ngoro z’Umurage w’u Rwanda byakoreshwaga hambere birimo, ibisabo, urusyo, ingasire, ibiseke, imyambi n’imiheto, impuzu, ingoma, uruhindu n’ibindi.

Intwaza zaganiriye na IGIHE zavuze ko zishimye cyane kubera ibyo birori n’ubusabane kuko hari byinshi byiza bibibutsa.

Mukandekezi Concessa w’imyaka 70 y’amavuko yashimishijwe cyane no kubona intore zihamiriza ndetse n’abakobwa bacunda amata.

Ati “Intore zanshimishije cyane kuko kuva kera narazikundaga, gucunda amata nabyo nabyishimiye cyane kuko nibutse kera iwacu babitwigishaga. Banyibukije ibintu byinshi nabonaga nkiri umwana ku buryo numva nabikora usibye ko mfite intege nkeya.”

Mutarambirwa Claver w’imyaka 74 y’amavuko avuga ko icyamushimishije by’umwihariko ari Intore, gukina igisoro, imbyino z’abakobwa n’ibisabo.

Ati “Nashimishjwe n’Intore kuko kera nanjye narahamirizaga, nshimishwa n’abakobwa babyina, nshimishwa n’ibisabo bigarutse iwacu kuko byanyibukije umuco wacu nk’Abanyarwanda. Ikindi nishimiye ni ugukina igisoro wabonye ko nanjye nakinnye”

Kagwera Daphrose w’imyaka 85 y’amavuko yavuze ko yashimishijwe na byinshi ariko cyane cyane gucunda amata no gusya amasaka.

Ati “Kera tukiri abakobwa twari dufite inka tugacunda amata, tugasya amasaka bakatwigisha no kuboha ibyibo n’imisambi.”

Umuyobozi wungirije ushinzwe iterambere ry’ubukungu mu Karere ka Huye, Kamana André, yashimiye INMR yateguye icyo gitaramo kuko ari ingirakamaro.

Igitaramo cyasojwe Intwaza zibijeje ko nazo zizajya kubasura bakongera bagasabana.

Urugo Impinganzima rwo mu Murenge wa Mukura mu karere ka Huye rutuwemo n’intwaza zigera kuri 90.

Ni urugo bubakiwe n’Umuryango Unity Club ‘Intwararumuri’ n’abafatanyabikorwa batandukanye, hagamijwe kubafasha kubaho neza no kuzagira amasaziro meza.

Abasaza bakinnye igisoro biyibutsa uko bagikinaga kera
Abayobozi n’abakozi b’Ikigo cy’Ingoro z’Umurage w’u Rwanda bishimanye n'Intwaza
Amb Masozera yababwiye ko bazanywe no kubifuriza umwaka mushya muhire wa 2020_ kubagaragariza urukundo no kubataramira
Bamurikiwe ibikoresho bya kinyarwanda byakoreshwaga hambere
Bamwe mu bakobwa bataramiye Intwaza
Bamwe mu bakobwa bo mu Itorero ry'Ikigo cy’Ingoro z’Umurage w’u Rwanda
Basabanye mu mbyino n'indirimo
Berekanye uko baboha ibiseke n'ibyibo
Berekanye uko bavuza ingoma mu buryo butandukanye
Bishimanye bacinya akadiho n'ikinimba
Bishimiye kwiyibutsa kongera gusya amasaka
Byari ibirori bitazibagirana ku bo mu rugo rw'Intwaza
Iki gitaramo cyatangiye ahagana saa kumi kigeza saa moya z’umugoroba cyaranzwe no kuririmba, kubyina, gusangira icyo kunywa ndetse no kumurika ibirango by’amateka bibukiranya ibigize umuco nyarwanda
Hagati mu gitaramo habaye igikorwa cyo kumurika ibikoresho byo mu Ngoro z’Umurage w’u Rwanda byakoreshwaga hambere
Igitaramo cyasojwe bakishimiye kugumana
Igitaramo cyasojwe Intwaza zibijeje ko nazo zizajya kubasura bakongera bagasabana
Intwaza zavuze ko zishimye cyane kubera ibyo birori n’ubusabane kuko hari byinshi byiza bibibutsa
Intwaza zagaragaje ko zikibuka gusya
Intwaza zasazwe n'ibyishimo zicinya akadiho
Intwaza zo mu rugo Impinganzima mu Karere ka Huye zakorewe igitaramo n'ubusabane zifurizwa umwaka mushya muhire wa 2020
Itorero ry'Ikigo cy’Ingoro z’Umurage w’u Rwanda ni ryo ryabataramiye
Kuvugira inka biri mu byashimishije Intwaza
Ni igikorwa bakoze kuri uyu wa Gatatu bari kumwe n’Itorero ry’icyo kigo ryataramye biratinda
N'ubwo bageze mu za bukuru ntibyababujije kubyina uko bashoboye
Umuyobozi wa INMR, Amb Masozera Robert, n'Umuyobozi wungirije ushinzwe iterambere ry’ubukungu mu Karere ka Huye, Kamana André
Umuyobozi wungirije ushinzwe iterambere ry’ubukungu mu Karere ka Huye, Kamana André, yashimiye INMR yateguye icyo gitaramo
Umwe mu basuye Intwaza avugira inka
Uyu mubyeyi yavuze ko akunda gucunda amata kuva kera akiri muto
Uyu mubyeyi yavuze ko kera bambaraga impuzu nk'uko abo bana bamukikije bazambaye
Wari umunsi w'ibyishimo mu Rugo Impinganzima
Yasazwe n'ibyishimo afata indangururamajwi abafasha kuririmba
Yishimiye kuvuza ingoma

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza