Inganda zitunganya amabuye y’agaciro mu Rwanda, igisubizo ku iterambere ry’ubucukuzi bwayo

Yanditswe na IGIHE
Kuya 7 Nzeri 2020 saa 08:00
Yasuwe :
0 0

Uko iterambere ry’Isi ryihuta hakenerwa ibikoresho byifashishwa mu nzego zinyuranye, aho hose icy’ingenzi ni amabuye y’agaciro avamo bya bikoresho bigezweho mu ikoranabuhanga ndetse n’ibyuma.

Ubucukuzi mu Rwanda si ubwa vuba kuko amateka agaragaza ko bwatangiye hagati ya 1930 -1931 ubwo gasegereti yavumburwaga mu birombe bya Rwinkwavu na Rutongo.

Ubu ishoramari ryo muri uru rwego ririyongera kuko nko mu 2017, ishoramari rishya ryanditswe mu bucukuzi bw’amabuye y’agaciro ryari $267 344 495.

Mu bikorwa hashyirwa imbaraga mu kongerera agaciro amabuye yoherezwa hanze avuye mu Rwanda binyuze mu ishoramari nk’irya Luna Smelter yatangiye gukora ndetse iherutse gushyira hanze umushongi wa gasegereti.

Ubusanzwe coltan yoherezwaga hanze idatunganije bigatuma igiciro cyayo kigabanuka bigahombya igihugu.

Kuri ubu Uruganda rwa LuNa Smelter rwatangiye gutunganya gasegereti amasaha 24/24 aho rushongesha toni zigera kuri 12 ku munsi, zikaba zagera kuri 300 mu kwezi.

LuNa Smelter ikorera ahazwi nka Karuruma mu Murenge wa Jabana mu Karere ka Gasabo yari imaze iminsi ihagaritse ibikorwa kubera icyorezo cya COVID-19, ariko byasubukuwe.

Umukozi ushinzwe Ingufu muri LuNa Smelter, Kayiranga Jean Claude, yabwiye RBA ko bafite ubumenyi buhagije bwo gutunganya ayo mabuye.

Yagize ati “Ubumenyi burahari bitewe nuko ibyo twiga mu ishuri tuza kubishyira mu bikorwa nabwo ugasanga abashoramari batuzanira nk’icyo nakwita ikoranabuhanga tudasanzwe tuzi hano mu gihugu ku isoko ry’umurimo. Rwose ubu nahatana n’abandi kandi nkabatsinda hano mfite ubumenyi bwinshi nahigiye.”

Abakozi bo muri uru ruganda bavuga ko ubuzima bwabo bwahindutse.

Nsenga Jean Claude ushinzwe ububiko yagize ati “Uru ruganda nirwo runtunze n’umuryango wanjye abana banjye bariga ubuzima bwanjye bwaroroshye.”

Umuyobozi w’Inama y’Ubutegetsi muri LuNa Smelter, Lukasz Banasik, yavuze ko ireme rya gasegereti bashongesha riri ku rwego rwo hejuru.

Ati “Turi gutunganya gasegereti ifite ubuziranenge, buri ku kigero cya 99.9% ndetse ni imwe mu zifite ubwiza buri ku kigero cyo hejuru ku Isi. Dufite inzira ebyiri iki gikorwa kinyuramo twifashishje ibikoresho bigezweho bituma turushaho gukora neza ndetse turanateganya kwagura uru ruganda dushoramo imari ihagije.’’

LuNa Smelter ni uruganda rufatwa nk’urwa mbere mu Karere ka Afurika y’Iburasirazuba mu gushongesha no kongerera agaciro amabuye yo mu bwoko bwa gasegereti.

Umuyobozi mukuru wa LuNa Smelter, Robert Nowak, yavuze ko u Rwanda rukungahaye ku mabuye y’agaciro ku buryo ruzaba icyicaro cy’ubucukuzi n’itunganywa ry’amabuye mu Karere.

Ati “Nishimiye ko LuNa Smelter iri kugera kuri iyo ntego. Ubu twatangiye gukora mu buryo bwuzuye ndetse twakoresheje neza igihe cya COVID-19 mu kunononsora neza icyakorwa kugira ngo iki gikorwa kigende neza hifashishijwe abahanga banyuranye.”

Ibihugu bitandukanye birimo u Rwanda bihomba 75% by’amabuye y’agaciro byohereza hanze kubera adatunganyijwe, nyamara akagaruka muri ibyo bihugu ahenze cyane.

Umuyobozi mukuru wungirije mu Kigo cy’Igihugu gishinzwe Mine, Peteroli na Gaz, Dr Ivan Twagirashema, yavuze ko iyo amabuye atunganywa mu ruganda byungukira abantu benshi.

Ati “Uyu munsi umuturage iyo acukuye, hagati y’uwacukuye n’uruganda ruzabyaza umusaruro rya buye rye hazamo abantu benshi cyane uko bajyamo kenshi niko icyo wa muturage wacukuye avanamo kigenda kigabanuka, ni ukuvuga ngo rero kumwegereza uruganda rukaza aha hafi niko urimo wongera icyo wawundi ucukura afatamo nk’inyungu. Iyo uruganda ruhari n’uwacukuye ikilo kimwe cyangwa bibiri ahita yizanira ku ruganda.”

Ikilo cya gasegereti idatunganyijwe umuturage akigurirwa hagati y’amadorali arindwi n’icyenda ni ukuvuga arenga 6000 Frw. Uretse uruganda rwa gasegereti hari urundi rushongesha zahabu. Mu minsi iri imbere hari gushakwa abashoramari bazashora mu gutunganya Coltan na Wolfram.

U Rwanda rwashyize imbaraga mu bucukuzi bw’amabuye y’agaciro nk’imwe mu nkingi y’ubukungu bw’igihugu ndetse muri Kanama 2018 nibwo hasohotse itegeko rishya rigenga ubucukuzi, rigena ko umuntu wese ukora amakosa arimo kudaha abakozi ubwishingizi, ahanishwa guhagarikirwa uruhushya by’agateganyo.

Amabuye menshi u Rwanda rutunganya ni Gasegereti, Coltan na Wolfram ndetse hari ibice bitandukanye bicukurwamo zahabu nko muri Miyove na Kinyami mu Karere ka Gicumbi hakaba amabengeza n’ayandi.

Kubera amahirwe agaragara munsi y’ubutaka bw’u Rwanda n’ishoramari rikomeje kongerwamo, muri uyu mwaka hari hitezwe miliyoni 800$ ndetse mu 2024 ubucukuzi bw’amabuye y’agaciro bukazagera kuri miliyari 1.5$.

Uhereye ibumoso: Olena Wiadena uri mu bagize Inama y'Ubutegetsi ya LuNa Smelter Ltd; Umuyobozi mukuru wa LuNa Smelter, Robert Nowak na Joseph Butera, uyobora ibikorwa byo mu ruganda rwa LuNa Smelter Ltd
Olena Wiadena uri mu bagize Inama y'Ubutegetsi ya LuNa Smelter Ltd
LuNa Smelter ikorera ahazwi nka Karuruma mu Murenge wa Jabana mu Karere ka Gasabo yasubukuye ibikorwa byayo byahagaritswe na COVID-19
Inganda zitunganya amabuye y’agaciro ni igisubizo ku iterambere ry’ubucukuzi mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .