Inganda zimwe zahagaritswe mu gukumira Coronavirus, izizakomeza gukora zihabwa amabwiriza

Yanditswe na Rabbi Malo Umucunguzi
Kuya 24 Werurwe 2020 saa 09:26
Yasuwe :
0 0

Minisiteri y’Ubucuruzi n’inganda, yasohoye amabwiriza arebana no gufasha abanyenganda bakora ibikoresho by’ibanze bikenewe muri ibi bihe hari ingamba nshya zo gukumira icyorezo cya Coronavirus, izindi zisabwa kuba zihagaritse ibikorwa mu gihe cy’ibyumweru bibiri.

Ni amabwiriza yasohowe kuri uyu wa Mbere tariki 23 Werurwe 2020, ubwo u Rwanda rwari ku minsi wa kabiri wo gufunga ibikorwa byinshi birimo ingendo zitari ngombwa, mu rwego rwo kwirinda ikwirakwira rya COVID-19 iterwa na Coronavirus.

Kuri uyu wa Mbere nibwo u Rwanda rwemeje ko umubare w’abarwaye wiyongereyeho 17, bituma abanduye iki cyorezo bose hamwe bagera kuri 36.

Abatahuweho ubwandu bushya barimo abantu icyenda bageze mu Rwanda baturutse i Dubai, batatu bavuye muri Kenya, babiri baturutse muri Leta Zunze Ubumwe za Amerika, umwe wavuye muri Qatar, umwe waturutse mu Buhinde n’umuntu umwe wahuye n’undi wagaragayeho Coronavirus mu Rwanda.

Minisiteri y’Ubucuruzi n’inganda yategetse ko "uretse inganda zitunganya ibiribwa, ibinyobwa, amazi, imiti yifashishwa kwa muganga, ibikoresho by’isuku, inganda z’amashanyarazi ndetse n’inganda zikora ibikoresho by’ibanze byifashishwa n’inganda zavuzwe haruguru, izindi nganda zirasabwa kuba zihagaritse ibikorwa byazo mu gihe cy’ibyumweru bibiri kugira ngo hirindwe ikwirakwira rya Coronavirus."

Yanahaye amabwiriza inganda zizakomeza gukora, hagamijwe kurinda abakozi no gukumira ikwirakwira rya Coronavirus.

 Kureba abakozi ba ngombwa bakenewe mu ruganda akaba aribo gusa baza mu kazi, abandi bagakorera mu ngo zabo hifashishijwe ikoranabuhanga.

 Kugira ibyangombwa byose nkenerwa byo kurinda abakozi bazo n’ababagana kwandura Coronavirus, kandi bakubahiriza intera byibuze ya metero imwe hagati y’umuntu n’undi

 Kwirinda kuzamura ibiciro by’ibyo bakora bitwaje ko ibyo bakora bikenewe n’abantu benshi

 Kugaragaza umubare w’abakozi bazajya bakora muri ibi byumweru bibiri kandi abo bakozi barasabwa kugaragaza ibyangombwa by’umurimo mu gihe bagiye ku kazi.

Leta yakajije ingamba nyuma y’uko umubare w’abanduye ukomeje kwiyongera, ndetse ku wa Gatandatu Minisitiri w’Intebe yatangaje ko byagaragaye ko hakwiye kongera imbaraga mu gukumira ikwirakwira rya COVID-19 mu Rwanda, ku buryo ingamba zakajijwe mu gihe cy’ibyumweru bibiri ndetse bishobora kongerwa.

Mu myanzuro yatangiye kubahirizwa uhereye ku wa Gatandatu 23:59, irimo ko ingendo zitari ngombwa zibujijwe.

Iryo tangazo rivuga ko "Gusohoka mu rugo nta mpamvu zihutirwa birabujijwe, keretse abajya gutanga no gushaka serivisi z’ingenzi harimo kwivuza, guhaha, serivizi za banki n’izindi."

Minisiteri y’Ubuzima yasabye abaturarwanda bose gukomeza kwitwararika no gukurikiza ingamba zashyizweho na Leta zirimo;

 Guhagarika ubucuruzi bw’ibikorwa bitari iby’ibanze,

 Guhagarika ingendo zihuza imijyi n’uturere n’izindi zitari ngombwa no kuva mu rugo nta mpamvu zihutirwa,

 Abantu bose bageze mu Rwanda mu byumweru bibiri bishize barasabwa kwishyira mu kato mu gihe cy’iminsi 14 guhera igihe bagereye mu Rwanda.

 Kubahiriza amabwiriza y’inzego z’ubuzima yo gukaraba intoki kenshi kandi neza no kubahiriza intera ya metero imwe hagati y’abantu.

COVID-19 iheruka kwemezwa nk’icyorezo cyibasiye Isi yose. Kuva cyaboneka bwa mbere mu Bushinwa mu Mujyi wa Wuhan mu Ukuboza 2019, abamaze kucyandura basaga 381 000, abarenga 16 000 bahitanwe na cyo mu gihe abasaga 102 000 bagikize.

Ibimenyetso bya COVID-19 birimo kugira umuriro, ibicurane, umunaniro n’inkorora ijyana no kubabara mu mihogo, guhumeka bigoranye bishobora kugera aho bitera umusonga nawo ushobora kubyara urupfu.

Ishobora kwandura binyuze mu kuramukanya abantu bahana ibiganza, hakabaho guhererekanya amatembabuzi yaturutse mu myanya y’ubuhumekero y’umuntu wanduye, maze uyakozeho akaza kwikora ku munwa, ku mazuru cyangwa mu maso, agahita yandura. Umuntu ashobora no gukura iyi virusi ku kintu yaguyeho, kandi iyo gikomeye ishobora kumaraho amasaha menshi yagera no ku minsi itatu.

Minisante itanga inama ko umuntu ugaragaje ibimenyetso bya COVID-19 yakwihutira guhamagara umurongo utishyurwa wa 114, agahabwa ubufasha adahise akora urugendo, kwipimisha akoresheje telefoni akanda *114# agakurikiza amabwiriza, kohereza email kuri [email protected], gutanga ubutumwa bwa WhatsApp kuri +25088202080 cyangwa akitabaza umujyanama w’ubuzima umwegereye.

Uruganda rwa Africa Improved Foods ni rumwe mu rukorera ibiribwa mu cyanya cyahariwe inganda i Masoro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .