Ingagi z’u Rwanda zabaye ingarurabugingo

Yanditswe na Ndahayo Emmanuel
Kuya 16 Ukuboza 2020 saa 04:29
Yasuwe :
0 0

Hari igihe Abanyarwanda n’abanyamahanga bigeze guhurwa u Rwanda, baruhunga ku bwinshi berekeza i Mahanga, bitewe n’uko igihugu cyari mu bibazo bikomeye, byanaje kuganisha kuri Jenoside yakorewe Abatutsi mu 1994.

Abahunze igihugu bari babuze umutekano, ibyo bikajyana n’akarengane, ubukene bwarabaye karande, bukira ntawe uzi uko buramuka, mbega igihugu cyose cyarakamutse, cyarashegeshwe kitakigira ubuzima.

Ushobora kwibaza ko gusubiza ubugingo mu gihugu cyabutakaje byasabye imbaraga nyinshi, kandi koko ni ko byanagenze ariko biza gushoboka binyuze mu bumwe bw’abanyarwanda n’imiyoborere ihamye, neza neza aka ya mvugo y’Umuryarwanda igira iti “nta kinanira abishyize hamwe”.

Mu gihugu cyuzuyemo ubugingo rero, ubuzima burashisha mu mpande zose. Nyuma yo komora ibikomere by’imitima y’abantu no kubasubiza ubuzima, leta y’u Rwanda yanitaye cyane ku bidukikije bisanzwe biri mu gihugu ku bwinshi, usibye ko na byo nyine byari biri gucyendera bitewe n’uko muri za ngaruka twakomojeho ziranga igihugu kiri mu kaga, na byo nta wari ukibyitaho.

Ku ikubitiro, kwita ku ngagi zo mu misozi miremire byari mu mishinga y’ibanze, bitewe n’uko ubu bwoko bw’ingagi busigaye hacye cyane ku Isi, bwari mu menyo ya ba Rubamba b’abashimusi, bazihigiraga kuzimara.

Imibare ihamya ko intego yo kuzitaho yagezweho kandi igikataje, kuko nko muri uyu mwaka wa 2020, umubare w’abana b’ingagi 24 bashya baherutse guhabwa amazima, mu muhango ngarukamwaka wahariwe ‘Kwita Izina’ abana b’ingagi baba bavutse muri uwo mwaka, no kwishimira ibimaze kugerwaho mu kurinda ingagi muri rusange, dore ko zifite amahirwe mabi yo kuzarimbuka burundu, mu gihe abantu batakora iyo bwabaga ngo baziteho.

Magingo aya , nyuma y’ibyakozwe n’ibikirimo gukorwa, nta washidikanya ko u Rwanda rumaze kuba igihugu gitanga ubuzima bitari ku Banyarwanda gusa, ahubwo no ku banyamahanga bashimishwa no gusura ibinyabuzima birumbukiye mu rw’imisozi igihumbi.

Uheruka muri aba ni Penny Walker n’itsinda rye, bahamya ko urugendo bagiranye mu buturo bw’ingagi mu Birunga, rwabahinduriye ubuzima, rugatuma biyumva bitandukanye kandi bakishimira impano y’ubuzima butari ubwabo gusa, ahubwo n’ubw’ingagi babonye bakaziyumvamo, dore ko zisanzwe zinafite byinshi zihuriyeho n’abantu.

Urugendo rw’iri tsinda rwatangiye mu cyakare nk’uko bisanzwe ku bashyitsi basura ingagi, Anaclet wari butware aba bashyitsi yari yashyitse kuri One&Only Gorilla’s Nest, imwe muri hoteli zikomeye ku mugabane wa Afurika, ari na yo aba bashyitsi bari bacumbitsemo mu gihe cy’iminsi itatu bamaze mu Rwanda.

Mu byondo n’isayo ryari ryatewe n’imvura nyinshi yari yaraye itosa ubutaka bwo mu Birunga n’ubundi busanzwe buhehereye, Anaclet yagejeje aba bakerarugendo ku birenga by’imisozi y’Ibirunga, aho bagombaga kwitegurira urugendo ruzamuka rugana mu misozi icumbikiye ingagi.

Mu nzira ariko ubwo, urugendo rwasusurukijwe n’amajwi y’abana bajya ku mashuri bagendaga basuhuza abo bashyitsi, babapepera, ibyakomeje kwereka abari mu modoka ko urugwiro Abanyarwanda bakirana ababagana rutaba ku kibuga cy’indege no muri hoteli gusa, ahubwo ko ari umuco umaze gushinga imizi mu mibereho rusange yabo.

Ku birenge by’Ibirunga, Augustin nawe yari ategereje, yakira abashyitsi bamwenyuraga inzira yose, anabamenyesha ko bagiye gusura Umuryango w’ingagi witwa ‘Susa’, umwe mu miryango igoranye gusura, bitewe n’uko utuye mu misozi hejuru, ahantu hagoranye kugera ndetse hari n’ubutumburuke budasanzwe.

Ku bwa Augustin ariko, ari na we wari ugiye kuyobora iri tsinda mu rugendo rwose, ibyishimo byo guterera akajisho kuri ‘Susa’ byari bikwiye igitambo kitoroshye nk’iki.

Izingiro ry’urugendo ryatangiriye mu mirima izamuka igana mu Birunga, ari na ko Augustin agenda asobanura urusobe rw’ibinyabuzima rurimo amoko y’ibiti n’amababi yabyo afite umwihariko, ndetse adakunze kugaragara henshi ku Isi.

Hamwe na hamwe, uru rusobe rw’ibinyabuzima rutanga impumuro itandukanye n’iyo dusanzwe tumenyereye, ibyo Augustin yasobanuraga ko “bishobora gufungura ibihaha by’abashyitsi uko barushaho guhumeka uwo mwuka wihariye”.

Guhumeka no gutara akuka byari bikenewe cyane muri uru rugendo, kuko umuryango wa ‘Susa’ wari ugiye gusurwa utuye ahirengeye, ibyasabaga aba bashyitsi kuzamuka amasigamana mu rugendo rugana aho uyu muryango wari wagaragaye mu gitondo cy’uwo munsi, dore ko abasanzwe banakurikirana amerekezo y’aho imiryango y’ingagi iherereye na bo bari bisunze iri tsinda bari gutanga umutahe wabo muri uru rugendo.

Nyuma y’urugendo rw’iminota nka 30, hirya mu ishyamba humvikanye urwamo rw’imwe mu ngagi z’ingabo, maze Augustin ahindukirana ijwi ryuzuye ibitwenge, yongorera abashyitsi ati “Uwo ni umwe mu batware bo mu muryango w’ingagi wa Pablo”, ndetse anongeraho ko iri tsinda ry’abashyitsi ari “abanyamahirwe cyane [kuko] bagiye gusura imiryango ibiri y’ingagi ku munsi umwe”, ibintu bidakunze kubaho kuko ubusanzwe abashyitsi baba bagomba gusura umuryango w’ingagi umwe ku munsi.

Hagati aho, uko urugendo rwakomezaga, ni na ko rwasatiraga wa muryango wa Pablo ndetse byaje no kurangira bawushyitseho, banawucaho, yewe imwe mu ngagi zawo inakoza ukugura rwayo kuri umwe mu bashyitsi bari mu rugendo, usibye ko itari imwitayeho cyane ndetse itanamusagariye.

Mu kwirinda ko habaho gukangarana no guhinda umushyitsi, Augustin yasobanuye ko “[iyi ngagi] ntitewe ubwoba na twe, ahubwo iri kwiyumvamo ko umuryango wa Susa uri hafi hano, bityo iyi mitwarire ni wo igenewe”, aheraho aburira abashyitsi ati “ntimwiruke”.

Umuryango wa Pablo wakomeje kugaragaza imyitwarire irimo amahane, gusa nyuma y’igihe gito, iri tsinda ryarenze imbibe z’aho wari uherereye, rikomeza urugendo rizamuka rijya gushaka Susa.

Umuryango wa Susa ariko na wo ntiwari worohewe, kuko bitewe n’amahane y’umuryango wa Pablo, ingagi zigize uyu muryango zari zirimo kwiruka zihungira mu misozi, zigerageza gushyira intera ihagije hagati yazo n’izo mu muryango wa Pablo, mu rwego rwo kwirinda amakimbirane ashobora kuvuka hagati y’imiryango yombi; amakimbirane akunda kuvamo imirwano ikarishye cyane ndetse ishobora no guhitana ingagi zimwe na zimwe.

Birumvikana ko uko ingagi zakomezaga kuzamuka, ni na ko byarushagaho kugora abashyitsi kuzigeraho, gusa nyuma y’igihe gito, amaherezo ba bashyitsi baje kuzishyikira, bazisangana imyitwarire itandukanye cyane n’iyo zari zifite zihunga, kuko zari zituje kandi zitekanye, zitegereza abashyitsi bari bazihanze amaso mu buryo buteye ibinezaneza.

Aha rero ni ho hari ya soko y’ubugingo twahoze tuvuga, kuko kureba izi ngagi mu cyanya cyazo, ukazireba ziri kurisha hirya aho izindi ziganditse ziruhuka, ukareba abana bazo bikinagura, banirunkaka iyo yose, ndetse ukihera ijisho imiterere ya za nyina ziri gukurikirana imikorere y’abana bazo ari na ko zikabacyebura aho bari kurengera, ni amashusho arema ibitekerezo bidapfa kwibagirana mu mitwe ya buri wese ubyiboneye n’amaso ye.

Ibi bihe bizwiho kuvubura intekerezo ziganisha ku gaciro k’ubuzima bwa twese, yaba twebwe abantu ndetse n’inyamaswa, tutibagiwe urusobe rw’ibidukikije dutuyemo.

Mu gihe cy’isaha imwe, mu mutuzo wuzuye mu ishyamba rwagati, Penny Walker n’itsinda rye batumbereye ingagi bazitaruye mu ntera ya metero umunani, igamije kurinda ko kwihuza kw’abantu n’ingagi bishobora gukurura uburwayi runaka hagati y’ibiremwa byombi binasanzwe bifitanye isano ya hafi.

Abashyitsi bari baburiwe kubahiriza iyi ntera ariko ingagi na zo zisa nk’izizi iby’iyi migirire, kuko buri uko utwana twazo twasimbukaga twikinagura dushaka gusatira abantu – dore ko ari n’utunyamatsiko cyane – nyina zabaga ziri hafi aho, buri nshuro zigahita zidukurura zitubuza kujagarara, mu gitsure n’urukundo rukwiye hagati y’umubyeyi n’umwana.

Birumvikana ko buri mushyitsi mu bari mu itsinda rya Penny Walker yifuje kwigumira muri ibi bihe, ndetse buri wese yashishikajwe no kwegura telefoni n’ibindi bikoresho bifata amashusho kugira ngo abike urwibutso rw’ibi bihe bidasanzwe ubuziraherezo. Gusa ariko Honore yari yaraye aburiye aba bashyitsi, ababwira ko guhugira mu gufata amashusho gusa bishobora kubatesha amahirwe yo kwitegereza no gusobanukirwa imibereho y’izi ngagi, abasaba kubika ibyo bikoresho byabo nyuma yo gufata amashusho, ubundi bagakoresha umwanya wabo neza barebana n’ibi biremwa amaso ku maso nta kidobya.

Ka karyoshye kadahora mu itama rero kaba no mu Birunga, nyuma y’isaha nto y’isura, Augustin yarembuje abashyitsi abamenyesha ko ari igihe cyo gufata urugendo rumanuka rusubira kuri Gorilla’s Nest. Bagononwa, Walker na bagenzi be bafashe inzira baramanuka, basiga ingagi mu cyanya cyazo n’amarangamutima menshi, gusa bagenda bamwenyura banibukiranya ibihe by’ingenzi byaranze urugendo rwabo.

Bakigera kuri hoteli, bakujwemo inkweto bari bambaye maze Annelise abazanira udukarine duto, ati “ngaho mwirwaneho maze mwandike uko mwiyumva aka kanya. Tuzaboherereza ubu butumwa igihe mutazaba mubwiteze, twizere ko bizabibutsa uko muri kwiyumva aka kanya”.

Muri uwo mugoroba, nyuma yo gukorerwa ‘massage’ no kunanura imitsi, uruhurirane rw’ibiribwa biryohereye kandi byasaruwe neza neza mu butaka aba bashyitsi bari bacumbitsemo, byahawe ikaze kimwe nyuma y’ikindi, byongera kandi kubaka ubuzima bw’abashyitsi bari basigaranye umunaniro w’umunsi w’amateka mu buzima bwabo.

Mu ijoro, berekeje mu byumba bateguriwe maze bagwa agacuho, baruhuka ubuticura mu mahumbezi y’urugo rw’igihe gito bari batuyemo mu Rwanda. Nta gushidikanya ko inzozi bahoze barota zo gusura ingagi uwo munsi bari bamaze kuzigira impamo.

Uyu ni Umuryango wa Susa, ari na wo wasuwe na Walker n'itsinda rye, ukaba ukunze kuba mu misozi miremire

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .