Ingagi enye zo mu muryango wa Hirwa ziciwe n’inkuba muri Uganda

Yanditswe na Rabbi Malo Umucunguzi
Kuya 8 Gashyantare 2020 saa 08:54
Yasuwe :
0 0

Umuryango uhuza ibihugu bihurira ku misozi y’ibirunga, Greater Virunga Transboundary Collaboration – GVTC, watangaje ko ingagi enye zo mu muryango wa Hirwa zasanzwe zapfuye, ibipimo by’ibanze byerekana ko zaba zishwe n’inkuba.

Izi ngagi zasanzwe muri Pariki y’Igihugu ya Mgahinga muri Uganda, bikekwa ko zishwe n’inkuba ku wa 3 Gashyantare 2020. Ingagi zapfuye zirimo eshatu nkuru z’ingore n’imwe y’ingabo yari ikiri nto.

Uyu muryango wakomeje uti “GVTC yayoboye itsinda rigizwe n’Ikigo gishinzwe kubungabunga urusobe rw’ibinyabuzima muri Uganda (UWA), Ikigo cy’u Rwanda gishinzwe iterambere (RDB) n’abaganga b’ingagi, bagiye kureba neza icyateye urwo rupfu no gusuzuma izindi ngagi zigize uwo muryango.”

“Hafashwe ibipimo bya nyuma y’urupfu bijyanwa muri laboratwari birasuzumwa. Hashingiwe ku byavuye mu isuzuma ry’abaganga, ibyagaragaye aho zabonetse n’amateka, icyishe izi ngagi uko ari enye kigomba kuba ari inkuba yazikubise.”

Umwanzuro wa nyuma w’igenzura ngo uzakorwa hamaze gusesengurwa ibishoboka byose, bikazafata igihe kiri hagati y’ibyumweru bibiri na bitatu.

Umuryango wa Hirwa ugizwe n’ingagi 17, wambutse ugana muri Uganda muri Pariki ya Mgahinga muri Uganda ku wa 28 Kanama 2019, uvuye muri Pariki y’Igihugu y’Ibirunga mu Rwanda.

Uyu ni umwe mu miryango y’ingagi iba mu birunga bihuriweho n’ibihugu bitatu, ni ukuvuga muri Pariki y’Igihugu y’Ibirunga mu Rwanda, Pariki y’Ingagi y’Igihugu ya Mgahinga ku ruhande rwa Uganda na Pariki y’Igihugu ya Virunga ku ruhande rwa Repubulika ya Demokarasi ya Congo.

Ikigega mpuzamahanga cyita ku kubungabunga ingagi, Dian Fossey Gorilla Fund, cyatangaje ko cyababajwe n’urupfu rw’ingagi enye zo mu muryango wa Hirwa, aho bikekwa ko zishwe n’inkuba.

Kiti “Hirwa ni umwe mu miryango usurwa cyane na ba mukerarugendo, turahamya ko abantu benshi bababazwa n’aya makuru.”

Uyu muryango kandi washimiye ibihugu by’u Rwanda na Uganda uburyo bikomeje kwita ku ngagi kuva mu myaka myinsi ishize.

Ibarura ryakozwe mu 2016 ryerekanye ko umubare w’ingagi ukomeje kwiyongera mu gice cy’ibirunga, aho mu Rwanda habarurwaga ingagi 604 ziba mu miryango 41, bingana n’izamuka rya 26% kuko zavuye kuri 480 mu mwaka wa 2010. Naho ingagi zo mu ishyamba rya Bwindi muri Uganda na Sarambwe muri Repubulika ya Demokarasi ya Congo (RDC) zavuye kuri 400 zigera kuri 459.

Ibyo byatumye ingagi zibarurwa mu gice cy’imisozi y’ibirunga zirenga 1000.

Aha ni hamwe mu hashyingurwa ingagi ziba zapfuye, muri Pariki y'Igihugu y'Ibirunga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .