00:00:00 IGIHE NETWORK KN KINYARWANDA EN ENGLISH FR FRANCAIS

Ingabo z’u Rwanda ziri muri Sudani y’Epfo zakoze ubukangurambaga bwo kurwanya Malaria

Yanditswe na Rosine Ingabire
Kuya 21 August 2022 saa 08:05
Yasuwe :

Ingabo z’u Rwanda, [Rwanbatt-1] ziri mu butumwa bw’Amahoro bw’Umuryango w’Abibumbye, UNMISS, zakoze ubukangurambaga bwo kurwanya Malaria zegereza ubuvuzi abaturage bo muri Sudani y’Epfo.

Aba baturage bavuwe Malaria n’Ingabo z’u Rwanda kuri uyu wa 20 Kanama 2022, ni abo mu bice by’Umujyi wa Juba ndetse n’ahitwa Konyo-Konyo.

Abari mu butumwa bw’amahoro ku bufatanye n’Umuryango wita ku guteza imbere ubuzima wa SFH [Society for Family Health] ndetse n’Umujyi wa Juba kandi bakoze umuganda rusange mu Nkambi ya Mahad [Mahad IDP Camp].

Uretse gukora amasuku muri uwo muganda kandi hatanzwe inzitiramubu ziteye umuti , hasibwa ibinogo by’amazi, ndetse banatema ibihuru bikikije iyo Nkambi ya Mahad.

Itangazo ry’Ingabo z’u Rwanda, RDF rivuga ko nyuma y’umuganda, abaturage bakanguriwe kwirinda no kurwanya Malaria ndetse abagera kuri 40 bahabwa ubuvuzi bw’iyi ndwara iri mu zihitana benshi muri Sudani y’Epfo.

Mu izina ry’ubuyobozi bw’Umujyi wa Juba, Philp Petia yashimiye iki gikorwa cyo kwegereza abaturage ubuvuzi avuga ko bifasha mu kugabanya umubare w’abarwaye Malaria by’umwihariko muri iyi Nkambi ya Mahad ndetse no mu bayituriye muri rusange.

Umuyobozi wa Rwanbatt-1, Ltd Col Shyaka Emmanuel yasabye abatuye mu Nkambi ya Moahad n’abaturage muri rusange gusukura uduce batuyemo batema ibihuru banaziba ibizenga by’amazi kugira ngo babashe kwirinda indwara z’ibyorezo bitandukanye birimo na Malaria.

Imibare yo mu 2020, igaragaza ko mu baturage 100,000 ba Sudani y’Epfo nibura abagera kuri 286,9 bari barwaye Malaria. Ni mu gihe uwo mubare wiyongereye cyane kuko abayirwaye bageze kuri 357,1/100,000.

Abana bo muri Sudani y'Epfo nabo basuzumwe Malaria
Abageze mu za bukuru bari mu bibasirwa cyane na Malaria nabo basuzumwe banahabwa ubuvuzi
Ingabo z'u Rwanda ziri muri Sudan y'Epfo zanakoranye umuganda n'abaturage
Umuyobozi wa Rwanbatt-1, Ltd Col Shyaka Emmanuel yahaye abaturage bo muri Sudani y'Epfo ubutumwa bwo kwirinda Malaria

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .