Ingabo z’u Rwanda ziri muri Centrafrique zujuje Guest House ifite agaciro k’arenga ibihumbi 40$

Yanditswe na Iradukunda Serge
Kuya 23 Kanama 2020 saa 02:30
Yasuwe :
0 0

Ingabo z’u Rwanda ziri mu butumwa bwa Loni bwo kubungabunga amahoro muri Repubulika ya Centrafrique (MINUSCA) zujuje muri iki gihugu ‘Guest House’ ifite agaciro ka 40.767$.

Iyi Guest House yubatswe mu Ntara ya Haute Kotto mu Mujyi wa Bria na batayo (RWABGII) y’Ingabo z’u Rwanda ziri mu butumwa bw’amahoro muri iki gihugu. Igizwe n’ibyumba bine, uruganiro n’ubwogero ikazakoreshwa mu kwakira abashyitsi bakuru basura iyi ntara.

Umuyobozi w’iyi ntara, Evariste Thierry, ubwo yashyikirizwaga iyi ‘Guest House’ yashimiye Ingabo z’u Rwanda zatekereje kuri uyu mushinga.

Ati “Ndashimira Ingabo z’u Rwanda ziri mu bikorwa byo ku bungabunga amahoro ku bw’iki gikorwa remezo zadushyikirije uyu munsi. Ni ikimenyetso cy’ubufatanye, iyi nzu izakoreshwa nk’icumbi ry’abayobozi bo hejuru bazasura intara yacu.”

Umuyobozi w’iyi batayo, Lt Col Leodomir Uwizeyimana, yavuze ko Ingabo z’u Rwanda zubatse iyi Guest House kugira ngo zongerere ubushobozi iyi ntara mu bijyanye no kwakira abashyitsi bayisura.

Hejuru y’inshingano Ingabo z’u Rwanda zifite muri iki gihugu zirimo gucungira umutekano w’Umukuru w’Igihugu, kurinda Ibiro by’Umukuru w’Igihugu, kurinda ingoro y’Umukuru w’igihugu n’ahandi hantu hose Umukuru w’Igihugu ajya, zigira n’uruhare mu kubaka ibikorwa remezo byatuma abaturage b’iki gihugu babaho neza.

Muri ibyo harimo amavuriro n’amashuri ndetse muri Gicurasi uyu mwaka zari ziherutse guha iki gihugu imashini ikoreshwa mu gupima icyorezo cya COVID-19 ifite agaciro ka 200 000 $.

U Rwanda rwatangiye kohereza abashinzwe umutekano mu butumwa bw’Umuryango w’Abibumbye bwo kugarura amahoro muri Centrafrique guhera mu 2014, aho muri iki gihe bagizwe n’imitwe itatu, irimo ibiri ishinzwe kubungabunga no kugarura amahoro muri rusange n’umutwe umwe ushinzwe kurinda abayobozi.

Imibare y’Umuryango w’Abibumbye yo muri Werurwe 2020, igaragaza ko u Rwanda ari rwo rufite abasirikare benshi mu bikorwa byo kugarura amahoro muri Centrafrique bagera ku 1369, akaba ari narwo rufiteyo abapolisi benshi 437.

Umuyobozi w'Intara ya Haute Kotto, Evariste Thierry, ashyikirizwa n'Ingabo z'u Rwanda urufunguzo rw'iyi GuestHouse
Iyi Guest House izakoreshwa mu kwakira abashyitsi bagenderera iyi ntara
Evariste Thierry yashimiye Ingabo z'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .