00:00:00 IGIHE NETWORK KN KINYARWANDA EN ENGLISH FR FRANCAIS

Ingabire wari Perezida wa Njyanama i Karongi yeguye

Yanditswe na Nsanzimana Erneste
Kuya 21 Ukuboza 2022 saa 07:38
Yasuwe :

Inama Njyanama y’Akarere ka Karongi yemeye ubwegure bwa Ingabire Dominique wari wari umaze umwaka ari Perezida w’Inama Njyanama y’Aka karere.

Mu mpera z’icyumweru gishize nibwo hatangiye kumvikana amakuru avuga ko uyu muyobozi yasabye kwegura kuri uyu mwanya. Inama y’inama njyanama idasanzwe yateranye kuri uyu wa 20 Ukuboza 2022 niyo yemerejwemo ubusabe bwe.

Ingabire Dominique usanzwe ari umuhuzabikorwa w’Inama y’Igihugu y’Abagore mu karere ka Karongi akaba n’umuyobozi wa IPRC Karongi, yavuze ko azakomeza kuba umujyanama mu nama njyanama y’Akarere.

Ati "Ubusabe bwacu bwakiriwe koko ariko nk’uko byagaragaraga nzakomeza kuba umujyanama kuko itegeko rinshyiramo nk’umuhuzabikorwa w’inama y’igihugu y’abagore. Nzakomeza mbe hafi y’inama njyanama uko bisanzwe.”

“Ikintu cyatumye nsaba kuva ku buyobozi bw’inama njyanama y’akarere ni ukugira ngo mbone umwanya wo kwita ku nshingano zanjye zisanzwe ariko bitabangamiye imikorere y’inama njyanama".

Itegeko riteganya ko iyo iyo Perezida w’Inama Njyanama yeguye, Visi Perezida ahita amusimbura akaba umuyobozi w’agateganyo w’Inama Njyanama y’Akarere.

Visi Perezida w’Inama Njyanama, Ngarambe Vedaste wagizwe Umuyobozi w’agateganyo w’Inama Njyanama y’Akarere ka Karongi yavuze ko yiteguye gukora neza izo nshingano.

Ngarambe yavuze ko afite icyizere ko nta cyuho kizaboneka kuko akazi k’abajyanama b’akarere bagahuriraho bose.

Mu kwezi kwa 11 umwaka ushize wa 2021 nibwo Ingabire Dominique yatorewe kuyobora inama njyanama y’akarere ka Karongi muri manda y’imyaka 5, yeguye kuri uyu mwanya mu gihe yari asigaje imyaka ine.

Ingabire Dominique wari umuyobozi w'inama njyanama y'akarere ka Karongi yeguye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .