Ingabire Marie Immaculée yatunze agatoki abasembura ababaha serivisi bagatuma bakira ruswa

Yanditswe na Uwimana Abraham
Kuya 9 Ukuboza 2020 saa 07:31
Yasuwe :
0 0

Umuyobozi wa Transparency International Rwanda (TIR), Ingabire Marie Immaculée, yatunze agatoki abaturage bagusha mu bishuko abashinzwe kubaha serivisi bigatuma bagwa mu cyaha cyo kwakira ruswa, kandi ngo batari bafite gahunda yo kuyisaba ariko bayihabwa bakabura uko bigobotora.

Ibi Ingabire yabivuze ku Munsi Mpuzamahanga wo Kurwanya Ruswa wabaye kuri uyu wa 9 Ukuboza 2020, ubwo yagarukaga ku bibazo bituma hakigaragara ruswa mu nzego zimwe na zimwe, aho yavuze ko hari ubwo n’abaturage baka serivisi babigiramo uruhare.

Ingabire yatanze urugero rw’umupolisi wo mu muhanda baganiriye amubaza igituma bakunze gushyirwa mu majwi ko bakunze kwakira ruswa, avuga ko yamubwiye ko hari ubwo bagwa mu bishuko by’abo bashinzwe guha serivisi.

Yaguze ati “Njye namubajije indwara barwaye ituma buri gihe baba bashaka ruswa, arambwira ati, ‘hari n’ubwo uba utayitekereza wowe, ugasaba umuturage ibyangombwa by’imodoka akibuka ko hari ikibazo afite, yajya kubiguha agashyiramo inote ya bitanu’, ati ukibuka ko waraye unyweye “mutzig” y’ideni udafite n’iyo uri bunywe uyu munsi, ibishuko bikagufata ukayakira.”

Yakomeje avuga ko icyo gihe hari ubwo usanga umuturage ataye uwo mupolisi mu mutego wo kwakira ruswa kandi mbere ntayo yari agambiriye gufata.

Ati “Ni ukuvuga ngo tugomba gukoma urusyo n’ingasire tukareba impande zombi, tureba abatanga serivisi gusa mbona ari bo dutindaho, ariko n’abayisaba hari abasembura abayibaha kugira ngo babagushe mu cyaha.”

Umuyobozi wa TIR, Ingabire, yavuze ko aho bihangayikishije cyane ari mu bijyanye n’itangwa ry’amasoko ya Leta, aho ba rwiyemezamirimo biyemerera ku mugaragaro ko batanga ruswa kandi batapfa kubicikaho.

Yagize ati “Aha ngaha tubibona cyane mu masoko ya leta rwose birimo cyane, kandi ba rwiyemezamirimo barabyiyemerera bakakubwira ngo njye ndayamuha kuko ntayamuhaye uriya yayamuha, kandi bo ikibazo cyabo ntawe uvuga undi, kuko barangiza buri wese yumva yungutse.”

Ibi kandi binemezwa n’Umuyobozi Mukuru w’Ikigo cy’Igihugu gishinzwe gutunganya Imitangire y’Amasoko ya Leta (RPPA), Uwingeneye Joyeuse, wavuze ko bamaze kubona ko ruswa ikunze kugaragara mu itangwa ry’amasoko, gusa akavuga ko igenda igabanuka bitewe n’ikoreshwa ry’ikoranabuhanga.

Yagize ati “Navuga y’uko [ruswa] uko igenda ivugwa, isura yayo igaragara mu itangwa ry’amasoko, uburyo abantu bayabona, uburyo se abantu batinda kwishyurwa hari abashaka kuvuga ngo bibwirize, hari ibintu byinshi bigenda bigaragara, n’ubwo kugeza ubu nta bushakashatsi burakorwa bubyerekana neza, ariko ukurikije amakuru twumva n’ibyo tugenda tubona mu bugenzuzi dukora, ubona ko koko ruswa ishobora kuba ihari.”

Yongeyeho ati “Mu by’ukuri rero nkurikije igihe twari tutarashyiramo ikoranabuhanga mu masoko, nkeka y’uko bishobora kuba byari byinshi, ariko navuga y’uko mu by’ukuri iyo ugereranyije n’igihe ikoranabuhanga ryari ritarashyirwa mu masoko ya leta, bitandukanye n’uko bimeze ubu ngubu, kuko no kubikurikirana no kubikumira ubu biba bitworoheye.”

Ubushakashatsi buherutse gukorwa na Transparency International Rwanda, bwagaragaje ko inzego ziza imbere mu kurangwamo ruswa, ku mwanya wa mbere haza polisi yo mu muhanda, hagakurikiraho RIB, TVET, ubucamanza, WASAC, REG, RURA, ndetse no mu gutanga ibyangombwa byo kubaka.

Umuyobozi wa TIR, Ingabire Marie Immaculée, yavuze ko n’ubwo muri izo nzego hakigaragaramo ruswa, ngo ikigero cyayo cyaragabanutse cyane, bitewe n’uko hari ubushake bwa politiki, ndetse na gahunda yo kutihanganira ruswa na gato yimakajwe mu nzego zitandukanye.

Indi nkuru wasoma: Kunyereza umutungo wa Leta ku isonga mu byaha bya ruswa bigihangayikishije, kuwugaruza biracyagoranye

Umuyobozi wa Transparency International Rwanda (TIR), Ingabire Marie Immaculée, yatunze agatoki abaturage basembura ababaha serivisi bagatuma bakira ruswa kandi batabigambiriye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .