00:00:00 IGIHE NETWORK KN KINYARWANDA EN ENGLISH FR FRANCAIS

Ineza ihora iganza ikibi- Senateri Nyirasafari yashimye ubutwari bw’abahishe Abatutsi muri Jenoside

Yanditswe na Nsanzimana Erneste
Kuya 27 April 2022 saa 10:50
Yasuwe :

Visi Perezida w’Inteko Ishinga Amategeko, umutwe wa Sena, Nyirasafari Espérance, yavuze ko iyo haza kubaho Abanyarwanda benshi bafite umutima w’ineza wo guhisha abahigwaga muri Jenoside yakorewe abatutsi, hari kurokoka benshi.

Ni bimwe mu bikubiye mu butumwa yatanze kuri uyu wa 26 Mata 2022, mu muhango wo kwibuka abatutsi biciwe muri Sous-Perefegitura ya Birambo, ubu ni mu Murenge wa Gashali, Akarere ka Karongi.

Twayigize Sylvestre warokokeye muri zone ya Birambo yashimiye Munyemana Jean wamwinjije mu nzu abana batareba akamuraza hagati ye n’umugore, na Ngendahimana Alphonse wamuhishanye n’abandi bantu 25.

Nyirasafari yashimye abahishe abatutsi, avuga ko iyo abafite umutima nk’uwabo baba ari benshi hari kurokoka abatutsi benshi.

Ati "By’umvihariko ndashimira Abanyarwanda bafashije bamwe muri twe kuko nabo bashoboraga kuhasiga ubuzima. Iyo tugira benshi haba hararokotse benshi."

Ati "Ineza ihora iganza ikibi. Twese twahanira gutoza abana bacu kugira neza, kuko kuvuka uri mu gice iki n’iki nta wabyihaye. Ni ukwibeshya kumva ko uwo mudateye kimwe, uwo mudahuje ibitekerezo, uwo mudasa wamukuraho akava ku Isi. Jenoside yakorewe abatutsi ikwiye kuduha isomo. Sinzi ko uwateguye Jenoside akayishyira mu bikorwa hari inyungu yayikuyemo.”

Perezida wa Ibuka mu Karere ka Karongi, Habarugira Isaac, yavuze ko hakeneye imbaraga zikomeye mu guhangana n’abahakana bakanapfobya Jenoside yakorewe Abatutsi by’umwihariko abahohotera abarokotse.

Yatanze urugero rwo mu Kagari ka Birambo, aho umuturage wari usanzwe atotezwa ariko mu cyumweru cy’icyunamo akaba yarakubiswe bikomeye ubu akaba ari gukurikiranwa n’abaganga bo ku Bitaro bya Kilinda.

Habarugira yavuze ko ikindi kigaragaza ko ingengabitekerezo ya Jenoside igihari ari uko hari umuyobozi w’ikigo cy’ishuri wanze ko abanyeshuri bajya muri AERG.

Visi Perezida w’Inteko Ishinga Amategeko, umutwe wa Sena, Espérance Nyirasafari, yihanganishije abarokotse Jenoside yakorewe Abatutsi by’umwihariko abo muri zone ya Birambo, avuga ko igihugu cyumva agahinda bafite ariko ko bakwiye gutwaza ntibahenwe na ko.

Guverineri Habitegeko Francois, Senateri Esperance Nyirasafari, Umunyamabanga Nshingwabikorwa wa Ibuka, Ahishakiye Naftal na Meya wa Karongi, Mukarutesi Vestine
Abadepite n'abasenateri bifatanyije n'abaturage ba Karongi mu kwibuka ku nshuro ya 28, Abatutsi biciwe mu Birambo
Abarokotse Jenoside yakorewe Abatutsi basabwe gukomeza gutwaza, ntibaheranwe n'agahinda
Uyu muhango witabiriwe n'abayobozi mu nzego zitandukanye
Visi Perezida wa Sena y'u Rwanda, Nyirasafari Esperance, yasabye ababyeyi gutoza abana kugira neza kugira ngo ibyabaye mu Rwanda bitazongera
Guverineri w'Intara y'Iburengerazuba, Habitegeko François, yasabye Abanyarwanda kwibuka biyubaka ntibaheranwe n'agahinda
Uyu muhango witabiriwe n'abayobozi mu nzego zitandukanye
Visi Perezida wa Sena y'u Rwanda, Esperance Nyirasafari yashimye ubutwari bw'abarokoye Abatutsi mu gihe cya Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .