00:00:00 IGIHE NETWORK KN KINYARWANDA EN ENGLISH FR FRANCAIS

Inama y’Igihugu y’Urubyiruko yatoye Komite Nyobozi Nshya

Yanditswe na IGIHE
Kuya 1 Ukuboza 2021 saa 04:00
Yasuwe :

Abantu icyenda ni bo batorewe kwinjira muri Komite Nyobozi y’Inama y’Igihugu y’Urubyiruko muri manda izamara imyaka itanu, ariko abatorewe guhagararira abanyeshuri bo bakazamara imyaka ibiri.

Iradukunda Alodie wo mu Karere ka Kicukiro yatorewe kuba Umuhuzabikorwa muri Komite Nyobozi y’Inama y’Igihugu y’Urubyiruko mu gihe Nyamanswa François w’i Gisagara yagizwe umwungirije.

Aya matora yabereye ku Cyicaro gikuru cy’Ikigo gishinzwe Imisoro n’Amahoro (RRA) tariki ya 26 Ugushyingo 2021.

Ni amatora yabaye mu bwisanzure aho buri mukandida yahabwaga umwanya uhagije kugira ngo avuge imigabo n’imigambi afitiye urubyiruko igihe yaba atowe.

Aya matora yo ku rwego rw’igihugu yitabiriwe n’abagize Komite Nyobozi y’Inama y’Igihugu y’Urubyiruko ku rwego rw’Akarere bagera kuri 211 baturutse mu turere twose tw’igihugu.

Yanakuriranywe n’abayobozi mu Nama y’Igihugu y’Urubyiruko mu bunyamabanga ndetse n’abakomiseri muri Komisiyo y’Igihugu y’Amatora.

Umuyamabanga Nshingwabikorwa wa Komisiyo y’Igihugu y’Amatora, Munyaneza Charles, yashimiye abayobozi bashya b’urubyiruko batowe n’uburyo ababatoye babikoze mu bwisanzure, abasaba kuzashyira mu bikorwa ibyo basezeranyije bagenzi babo muri rusange.

Iradukunda Alodie watowe ku mwanya w’Umuhuzabikorwa w’Inama y’Igihugu y’Urubyiruko yashimiye icyizere yagiriwe ndetse yizeza ko azafatanya n’urubyiruko mu bikorwa biruteza imbere cyane cyane mu kwihangira imirimo.

Yagize ati “Twishimiye ko mwatugiriye icyizere kandi tubasezeranyije ko tuzafatanya mu buryo bwose kugira ngo duteze imbere Urubyiruko rw’u Rwanda n’Igihugu muri rusange”.

Kugira ngo umukandida atorerwe kwinira muri Komite Nyobozi y’Inama y’Igihugu y’Urubyiruko ku rwego rw’Igihugu, agomba kuba afite nibura impamyabumenyi yemewe na Leta y’icyiciro cya mbere cya Kaminuza cyangwa ishuri rikuru, mu gihe umukandida wiyamamaza ku mwanya w’uhagarariye urubyiruko rwiga mu mashuri yisumbuye, asabwa kuba afite nibura imyaka cumi n’itandatu y’amavuko.

-  Abatorewe kujya muri Komite Nyobozi y’Inama y’Igihugu y’Urubyiruko

1. Iradukunda Alodie (Akarere Kicukiro): Umuhuzabikorwa

2. Nyamanswa François (Akarere Gisagara): Umuhuzabikorwa Wungirije

3. Dusenge M.Grace (Akarere ka Rusizi): Umunyamabanga

4. Uwimbabazi Zawadi (Akarere ka Rutsiro): Ushinzwe ubukungu

5. Ruhumuriza Anselme (Akarere ka Nyaruguru): Ushinzwe imibereho myiza

6. Bugingobwimana Théogène (Akarere ka Musanze): Ushinzwe Imiyoborere myiza n’Amategeko

7. Kibibi David (Akarere ka Nyagatare): Ushinzwe itangazamakuru n’Ubutwererane

8. Mwesige Thomas (Akarere ka Kicukiro) uhagarariye urubyiruko rwiga muri mashuri makuru.

9. Umutoni Najma (Akarere ka Kicukiro) Uhagarariye urubyiruko rwiga mu mashuri yisumbuye.

Abakandida babanzaga kuvuga imigabo n'imigambi y'ibyo bazakora nibatorwa
Iradukunda Alodie ni we watowe nk’Umuhuzabikorwa w’Inama y’Igihugu y’Urubyiruko
Abatorewe kuyobora Inama y’Igihugu y’Urubyiruko bafashe ifoto y'urwibutso
Abagera kuri 211 bagize Komite Nyobozi y’Inama y’Igihugu y’Urubyiruko ku rwego rw’Akarere ni bo batuye
Umuhuzabikorwa Wungirije muri Komite Nyobozi y’Inama y’Igihugu y’Urubyiruko, Nyamanswa François, atuye mu Karere ka Gisagara
Dusenge M. Grace w'i Rusizi yagizwe Umunyamabanga muri Komite Nyobozi y’Inama y’Igihugu y’Urubyiruko

Amafoto: Myculture


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .