Inama y’i Kigali yatangiye Uganda ihakana ibyo iregwa, u Rwanda rugaragaza ibimenyetso

Yanditswe na Rabbi Malo Umucunguzi
Kuya 14 Gashyantare 2020 saa 05:16
Yasuwe :
0 0

Inama ya gatatu yahuje komisiyo ihuriweho y’u Rwanda na Uganda, yakoraniye i Kigali hagamijwe gusuzuma ibimaze kugerwaho nyuma y’amasezerano ya Luanda, agamije guhosha umwuka mubi umaze iminsi hagati y’ibihugu byombi.

Kuri uyu wa Gatanu nibwo itsinda riyobowe na Minisitiri w’Ububanyi y’Amahanga wa Uganda, Sam Kahamba Kutesa, ryageze mu Rwanda mu biganiro n’u Rwanda. Ni ibiganiro bibimburiye inama izahuza Perezida Paul Kagame na Yoweri Museveni, ku mupaka wa Gatuna, ku wa 21 Gashyantare 2020.

Nyuma y’ibibazo u Rwanda rumaze igihe rugaragaza ko Abanyarwanda bahura nabyo muri Uganda birimo gufungwa binyuranyije n’amategeko no gukorerwa iyicarubozo kugeza ubwo rwasabye abaturage barwo kutajya muri Uganda, Minisitiri Kutesa yatangiye ijambo rye ashinja u Rwanda.

Yavuze ko nyuma y’inama yabereye i Luanda, Uganda yagiye igerageza gushyira mu bikorwa ibyemeranyijweho, ariko ngo u Rwanda nta bwo rwabikurikije.

Yakomeje ati “Ku rutonde rw’Abanyarwanda bavugwaga ko bafungiwe muri Uganda, ndifuza kuvuga ko nyuma y’inama ya mbere yabereye i Kigali u Rwanda rwijeje gutanga urutonde rwa bo ariko ntabwo byakozwe. Ariko twarakomeje tubona amakuru ku mazina n’abantu byavugwaga ko bafunzwe mu butumwa bwatanzwe.”

“Bijyanye n’amasezerano ya Luanda no mu buryo bwo gushaka gusubiza umubano ku murongo, Uganda yakuyeho ibirego ku banyarwanda icyenda bari bakurikiranweho gutunga intwaro binyuranyije n’amategeko."

Ku wa 9 Mutarama 2020 nibwo abo bantu icyenda bashyikirijwe inzego z’u Rwanda, bagarurwa mu gihugu, avuga ko asaba u Rwanda narwo kubikorwa gutyo, rukarekura abanya-Uganda basaga 50 bafungiwe mu Rwanda.

Yanahakanye icyo gucumbikira imitwe yitwaje intwaro igamije guhungabanya umutekano w’u Rwanda irimo RNC na RUD Urunana, avuga ko basabye ko hajyaho itsinda ryacukumbura iki kibazo gikomeye.

Ati “Iri tsinda ryagaragaza ibinyemetso bifatika, rikubaka icyizere ku mpande zombi.”

Kutesa yanavuze ko Uganda yabujije abayobozi bayo n’ibitangazamakuru gukomeza imvugo zibasira u Rwanda, ariko itangazamakuru ryo mu Rwanda ryakomeje ibikorwa bibangamiye Guverinoma yacu n’ubuyobozi bwacu.”

Nyuma y’ijambo rya Kutesa, Umunyamabanga wa Leta muri Minisiteri y’Ububanyi n’Amahanga, Nduhungirehe Olivier, yavuze ko inama ebyiri ziheruka harimo iyabaye muri Nzeri no mu Ukuboza 2019, zamaze amasaha 12 yakoreshejwe hasobanurwa ibibazo biri mu Rwanda na Uganda.

Yavuze ko inama iheruka yafashe imyanzuro irimo kurekura abaturage b’igihugu kimwe bafungiwe mu kindi, guhagarika ubufasha buhabwa umutwe ubangamiye ikindi gihugu no kurengera uburenganzira bw’abaturage b’ikindi gihugu, ndetse itaha ikazabera ku mupaka wa Gatuna ku wa 21 Gashyantare 2020.

Yavuze ko yizeye ko iyi nama ya gatatu iganisha ku bisubizo by’ibibazo abayobozi b’ibihugu bagaragaje mu nama ya Luanda, ku buryo bizafatwaho umwanzuro mu nama y’i Gatuna.

Nubwo ngo hari intambwe yari yatangiye guterwa nk’irekurwa ry’abanyarwanda icyenda, hari n’ibitarakozwe birimo ubufasha Uganda iha imitwe n’abantu bagamije guhungabanya umutekano w’u Rwanda ndetse atanga ingero.

Icya mbere yavuze uburyo ubuyobozi bwa RNC muri Uganda bukomeje icengezamatwara no gushaka ubushobozi, bafashijwe n’abayobozi ba CMI barimo Col CK Asiimwe, Umuyobozi wungirije wa CMI akaba n’umuyobozi ushinzwe kurwanya iterabwoba.

Amb Nduhungirehe yakomeje ati “Charlotte Mukankusi wo muri RNC ushinzwe diplomasi, yasuye Uganda mu kwezi gushize agiye guhura n’abayobozi ba Uganda. Icya gatatu, RNC mu ntara ya Uganda iyobowe na Pasiteri Deo Nyirigira na Dr Sam Ruvuma, bakomeje ibikorwa birimo gushaka abarwanashyaka, kuvugurura imikorere, gukora icengezamatwara no gushinga komite nshya muri Uganda, by’umwihariko mu nkambi za Kyangwali na Nakivale na Mityana.”

Ikindi ngo ni uko Capt Nshimiye uzwi nka Governor wayoboye ibitero byo mu Kinigi mu ijoro ryo ku wa 3-4 Ukwakira 2019, akomeje kurengerwa n’inzego z’umutekano za Uganda, agafatanya n’umunyamabanga wa Leta Philemon Mateke.

Yakomeje “Akomeje kujya mu nkambi wa Kyangwali aho abarwanyi bamwe n’imiryango yabo baba. Akunda kujya i Kisoro gusura umugore we cyangwa guhura na Minisitiri Mateke, akamuha amabwiriza. Nicyo kimwe na Nzabonimana Fidele, Kabayiza Seleman na Mugwaneza Eric ba RUD Urunana bagize uruhare mu bwicanyi byo mu Kinigi bagatanga raporo ku buyobozi bwa Uganda mu Ukwakira 2019, bacungiwe umutekano n’inzego z’umutekano za Uganda ngo batazagezwa imbere y’ubutabera mu Rwanda.”

“Ikindi ni uko ku wa 2 Gashyantare 2020, umunsi habayeho inama ya komisiyo ihuriweho y’ibihugu bine, habaye inama y’iminsi ibiri ya RNC na RUD Urunana yabereye i Mbarara. Iyo nama yitabiriwe n’abarimo Capt Nshimiye uzwi nka Governor, Col Rugema Emmanuel na Col Sam ba RUD Urunana, mu gihe Lt Frank Mushayija watorotse igisirikare, Major Ntare, Capt Frank Mugisha uzwi nka Sunday, JMV Turabumukiza na Major Robert Higiro wari uhagarariye RNC. CMI yohereje imodoka zafashe Col Rugema n’itsinda rye bava i Kisoro bajya i Mbarara mu nama.”

“Intego z’iyo nama kwari ugucura imigambi yo kurema umutwe uhuriweho na RUD na RNC no gukomeza ibikorwa by’icengezamatwara.”

Nduhungirehe yanakomeje avuga uburyo kugeza ubu hari umubare munini w’abanyarwanda bafungiwe muri Uganda mu buryo butemewe.

Yakomeje ati “Abanyarwanda ubu barimo gupfa kubera iyicarubozo bakorewe na CMI, urugero rubabaje ruheruka ni urwa Emmanuel Mageza w’myaka 50, wakorewe iyicarubozo mu gihe kirenga umwaka muri kasho za CMI, uheruka kugwa mu bitaro byo mu mutwe bya Butabika, ashyingurwa muri Uganda.”

Yavuze ko umuryango we usaba ko yakoherezwa mu Rwanda ngo ashyingurwe bikurikije amategeko.

Minisitiri w’Ububanyi n’Amahanga wa Angola, Manuel Domingos Augusto, yavuze ko ibihugu byombi byafashe ingamba zirimo kurekura abantu bafunzwe no kugarura urujya n’uruza ku mipaka.

Yavuze ko iyi inama ibaye nyuma y’inama yahuje Perezida Kagame na Museveni, bagaragaje ko nta kintu cyaza imbere y’imibereho myiza y’abaturage b’ibihugu bayoboye, bakemera gukorera inama ku mupaka wa Gatuna.

Yavuze ko bishimiye kuba abahuza aho bikenewe, ndetse bifuza ko ibi biganiro biza kuba byiza.

Minisitiri w’Intebe wungirije wa RDC akaba na Minisitiri w’Umutekano, Gilbert Kankonde Malamba, yavuze ko intego z’iyi nama zagarutsweho, kandi hari ibimenyetso byiza babonye mu gushaka amahoro.

Yakomeje ati “Mwagize ubutwari bwo kuvuga ko ibintu bitameze neza, kandi twaganiriye byinshi, inama iheruka yari ingirakamaro kandi nizeye ko mu gukurikiza ibyemeranyijweho n’abakuru b’ibihugu byacu baheruka guhurira i Luanda, tuza kugana mu cyerekezo kizima gishyira ibintu mu buryo.”

Yavuze ko iyi nama ibaye ku wa 14 Gashyantare nk’umunsi w’abakundanye, igomba kubaka ubucuti hagati y’ibihugu byombi.

Yakomeje ati “Ndizera ko mu minsi mike imipaka izaba ifunguye, iterambere rigakomeza ndetse abaturage bagaturana mu kivandimwe no mu mahoro.”

Ibi biganiro byabereye kuri Minisiteri y'Ububanyi n'amahanga kuri uyu wa Gatanu
Umunyamabanga wa Leta muri Minisiteri y'Ububanyi n'amahanga, Nduhungirehe Olivier aramutsa abanyamakuru mbere y'inama na Uganda
Minisitiri Nduhungirehe, Ambasaderi w'u Rwanda muri Uganda, Frank Mugambage na Minisitiri w'Ubutegetsi bw'Igihugu, Prof Shyaka Anastase, bategereje intumwa za Uganda
Umunyamabanga wa Perezida Kagame, Col Patrick Karuretwa; Minisitiri w'Umutekano, Gen Patrick Nyamvumba; Minisitiri w'Ubutegetsi bw'igihugu, Prof Shyaka Anastase; Minisitiri w'Ububanyi n'amahanga wa Angola, Manuel Domingos Augusto n'Umunyamabanga wa Leta muri Minisiteri y'Ububanyi n'Amahanga, Olivier Nduhungirehe baganira
Abayobozi b'u Rwanda, Uganda, RDC na Angola bafashe ifoto y'urwibutso
Intumwa za Uganda mu biganiro n'u Rwanda
Minisitiri w'Ububanyi n'amahanga wa Angola, Manuel Domingos Augusto ageza ijambo ku bitabiriye inama
Minisitiri w'Intebe wungirije wa RDC akaba na Minisitiri w'Umutekano, Gilbert Kankonde
Minisitiri Kutesa yavuze ko Uganda izakora ibishoboka mu kuzahura umubano
Minisitiri w'Umutekano wa Uganda, Gen J.J Odongo
Minisitiri Nduhungirehe avuga ko Uganda yakomeje kubangamira u Rwanda
Col Patrick Karuretwa ni umwe mu bitabiriye ibi biganiro
Gen Patrick Nyamvumba, Minisitiri Shyaka na Ambasaderi Mugambage mu biganiro na Uganda

Amafoto: Dushimimana Ami Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .