00:00:00 IGIHE NETWORK KN KINYARWANDA EN ENGLISH FR FRANCAIS

Imyiteguro ya CHOGM, abanyamuryango bashya bazakirirwa i Kigali, u Rwanda… Ikiganiro na Patricia Scotland uyobora Commonwealth

Yanditswe na Philbert Girinema
Kuya 5 May 2022 saa 10:31
Yasuwe :

Mu gihe habura ibyumweru bitatu ngo u Rwanda rwakire Inama y’Abakuru b’Ibihugu na za Guverinoma bo mu Muryango wa Commonwealth, Umunyamabanga Mukuru wawo, Patricia Scotland, yasobanuye ko imyiteguro igeze ku rwego rushimije.

Scotland yabigarutseho mu kiganiro yagiranye na IGIHE. Ni ikiganiro cyabaye mu gihe yari i Kigali yitabiriye Inama y’Abakuru b’Inzego zirwanya ruswa muri Afurika mu Muryango wa Commonwealth.

Yagarutse ku myiteguro, agaragaza ko abakuru b’ibihugu ‘benshi’ bitezwe i Kigali ndetse ko nta gihindutse, inama y’i Kigali ishobora kuzasiga hari ibihugu bishya by’ibinyamuryango byakiriwe.

Mu bihugu bishaka kwinjira muri uyu muryango, harimo Gabon.

IGIHE: Ni iki ibihugu bya Afurika by’umwihariko u Rwanda, byakora ngo nibura ikigero cya ruswa kigere kuri Zeru?

Patricia Scotland: Commonwealth imaze igihe yiga kuri iki kibazo cya ruswa kuko nk’uko ubizi, ikinyuranyo cy’amafaranga dufite n’ayo dukeneye ngo tubashe kugera ku ntego z’iterambere rirambye, ni amafaranga agendera muri ruswa ku Isi hose.

Commonwealth yashyize imbaraga mu kureba icyakorwa ngo icyo kinyuranye kiveho n’uko ayo mafaranga twayohereza aho agomba kuba ari mu bihugu byacu.

Iyo utekereje ruswa, ni amafaranga dukeneye mu kubaka imihanda, amashuri n’ibitaro, ngo twohereze abana bacu ku mashuri, tubagaburire neza, kandi u Rwanda rwabaye intangarugero mu byo rwagiye rwiyemeza mu kurwanya ruswa.

Ni iki uheraho uvuga ko u Rwanda rwabaye intangarugero?

Ndatekereza ko Perezida Kagame yabigaragaje neza asobanura ko uburyo bumwe bwo kurwanya ruswa, ari ugukoresha ikoranabuhanga.

Urebye uburyo u Rwanda ruri mu bihugu bikoresha ikoranabuhanga muri Afurika, mu bucuruzi, mu miyoborere, ibaruramari... bigora abashaka kuyobya amafaranga.

Muri Commonwealth tumaze igihe dukorana kugira ngo turebe icyo twakora, ni ibiki bishoboka ariko intambwe nziza twabonye, ni uko mu bihugu bigize uyu muryango, dufite 19 byo muri Afurika biri mu bya mbere ku rutonde rwa Mo Ibrahim mu miyoborere myiza kandi nta gihugu cyacu dufite mu biri inyuma mu kurwanya ruswa.

Turabizi ko muri Afurika twahombye arenga miliyari 1000$ kandi ayo mafaranga ntabwo aguma muri Afurika, ajya hanze y’uyu mugabane.

Turashaka ko ayo mafaranga agaruka, ni gute twasangira amakuru, ni iki cyabuze ku buryo duhagarika gukora ibintu bidatanga umusaruro? Turashaka gukorera hamwe ku buryo ruswa iba amateka.

Ubona hari ubushake mu bihugu bya Afurika?

Dukoreye hamwe birashoboka, kandi urabona ko hari icyo bitanga, turi kugaruza amafaranga menshi kurusha ikindi gihe.

Ubwo Perezida Buhari yitabiraga inama [yo kurwanya ruswa] mu 2016, abantu baramubajije bati urashaka ko bagusaba imbabazi, aravuga ati Oya.

Ati "Ndashaka ko umuntu wese wasahuye aya mafaranga mu gihugu cyanjye ayagarura. Ayo mahame [twashyizeho] agamije kugira ngo uwo mutungo ugaruke muri Afurika, nagaruka tuzubaka ibikorwa remezo, amashuri, …

Nizera ko nidukorera hamwe, tuzabigeraho.

Patricia Scotland uyobora Commonwealth yishimira aho imyiteguro igeze u Rwanda rwitegura CHOGM

Harabura ukwezi ngo u Rwanda rwakire inama ya CHOGM, imyiteguro igeze he?

Nejejwe n’aho imyiteguro igeze. Niba wibuka neza, nageze hano mbere y’uko inyubako nyinshi zubakwa. Nabonye abantu bari kubaka umusingi, ubu inzu ni nziza.

Birababaje kuba u Rwanda byararusabye gutegereza inshuro eshatu. Rwari rwiteguye mu 2020, mu 2021, none mu 2022. Buri wese arashaka kuza i Kigali, abantu baravuga i Kigali nk’umutako wa Afurika.

Ni ubwa mbere Afurika yakiriye CHOGM kuva mu myaka 15 ishize Uganda yayakira. Rero ni ibintu bidasanzwe. Dufite amasezerano y’Isoko Rusange rya Afurika, dufite udushya twinshi, rero ni umwanya mwiza wo kwishimira Commonwealth.

Hari abakuru b’ibihugu bamaze kwemeza ko bazaba bari i Kigali muri iyi nama?

Dufite umubare munini w’abamaze kwemeza ko bazaza. Buri munsi tugenda tugira umubare wiyongera. Turizera ko tuzabona benshi bashoboka kuzitabira muri 54.

Turabizi ko bamwe bafite amatora, abandi baracyafunze imipaka kubera Covid-19 ariko turizera ko tuzagira ubwitabire bufatika. Kandi abayobozi benshi barashaka kuza.

Hari ibihugu bishaka kwinjira mu muryango. Twizere ko bizabera i Kigali?

Ibihugu bitatu biri mu rugendo rwo gusaba kwinjira muri Commonwealth.

Ni ibintu bishimishije kuba umuryango umeze neza ku buryo ibihugu byinshi, n’ibitarigeze biba mu muryango mugari wa Commonwealth (bitakolonijwe n’u Bwongereza) kimwe n’u Rwanda, nka Mozambique na Cameroun, bibona akamaro k’umuryango bigashaka kuwinjiramo.

Ibihugu bitatu biri mu rugendo rwo gusaba kwinjira muri Commonwealth, kandi twizeye ko kimwe cyangwa bibiri bishobora kuzaba byujuje ibisabwa mbere ya Kamena.

Nibigenda bityo, bazaba bari kumwe natwe i Kigali.

Ni ukuvuga ko byanze bikunze abanyamuryango bashya bazakirwa?

Umuntu yabitegereza, hazaba hari ibyishimo byinshi. Ndizera ko dushobora kuzabona umunyamuryango umwe cyangwa babiri bashya i Kigali.

Ni gute muzagenzura ko inama y’i Kigali yabyaye umusaruro wifuzwa?

Icya mbere tuzishimira kuba twongeye guhurira hamwe, kubera ko ayo mahirwe yo guhura ni ikintu abanyamuryango benshi bari bakumbuye.

Imyaka ibiri ishize yari igoye cyane kuri buri muntu wese. Urebye umubare w’abantu bapfuye, ni miliyoni z’abantu muri Commonwealth.

Byari biteye agahinda kandi bikomeye. Byagize ingaruka ku bucuruzi bwacu, byari bigoye, imihindagurikire y’ibihe… rero guhurira hamwe ni amahirwe akomeye, izaba ari inama ya mbere ihuje abayobozi bo hirya no hino ku Isi tugize imbonankubone mu myaka ibiri ishize, hatifashishijwe ikoranabuhanga, ahubwo abantu bari kumwe.

Urebye ingingo twatoranyije, guhanga ibishya, urubyiruko, imihindagurikire y’ibihe, ikoranabuhanga, iterambere ry’ikoranabuhanga, kuribyaza umusaruro muri Commonwealth mu gusubiza neza ibibazo by’abaturage bacu… kuba turimo gushyira imbere izo ntego hamwe n’icyerekezo 2030 kigamije iterambere rirambye (SDGs), izo ni intego zifatika twizera ko tuzafatanyamo mu kubaka ubukungu budahungabanya ibidukikije.

Tugomba kuzahura ibikorwa, tukarenga ibyago bikomeye twagize.

Urebye ku mihindagurikire y’ibihe, hari ibihugu byinshi byagize ibibazo muri ibi bihe, wareba COVID-19, njye na Tedros twagarutse ku kuba twarahuye n’umuhengeri umwe, ariko ntitwari mu bwato bumeze kimwe.

Muri Afurika ibihugu bimwe biracyafite munsi ya 10% by’abantu bakingiwe nka Sierra Leone, nyamara mu bindi bice by’Isi hari aho bageze kuri 95%, bitari uguhabwa urukingo rumwe gusa, ahubwo bamaze guhabwa eshatu.

Tuzareba mu bijyanye n’ubuzima, uburyo twarenga ibibazo kandi tukagendera hamwe.

Scotland yasobanuye ko nta gihindutse, inama izabera mu Rwanda izarangira hakiriwe abanyamuryango nibura babiri bashya

Njye nzabibona nko kugera ku ntego nyabyo nitubasha gutera intambwe zifatika mu kwemeranya ku buryo twahanga ibishya, tugashyiraho uburyo bwunganira abahanga ibishya no kubasha guhangana bikwiye igihe cyose twagira ikindi cyorezo.

Iki ni cyo cyorezo gikomeye mu myaka 100 ishize, ariko abantu benshi bemeranya ko gishobora kutaba icya nyuma.

Rero twizera ko abayobozi bacu bazabasha kwigira ku myaka ibiri igoye, ishize, uburyo twarushaho guhangana kuko twitwaye mu buryo butandukanye, hamwe byabaye byiza cyane hazamo guhanga ibishya, kubera ko byari ngombwa.

Urebye nk’ibyabaye mu bucuruzi bukoresha ikoranabuhanga, inama zibera mu ikoranabuhanga, mu bunyamabanga twavuye ku nama zikorwa abantu bari kumwe, zose zimurirwa mu bw’ikoranabuhanga, mu buryo bwihuse nko kuzimya itara.

Ubu tumaze kugira inama ibihumbi mu ikoranabuhanga, ntabwo byari byarigeze bibaho. Isi imaze guhinduka, ubu turimo kujya mu buryo bubangikanya ikoranabuhanga n’uburyo bwo guhurira hamwe.

Ibyo rero birasaba kugendana no kuziba icyuho mu ikoreshwa ry’ikoranabuhanga, kugira ngo hatagira n’umwe dusiga inyuma.

Bimwe mu bihugu byacu ariko biracyafite ikibazo kubera ko nta internet bifite, ntabwo bifite ikoranabuhanga bikeneye kugira ngo rifashe abaturage babyo.

Ibyo bibazo byose rero bigomba gushakirwa umuti n’abayobozi bacu mu buryo buhamye, tukabona gahunda yo kubigeraho.

Icyo gihe inama izaba yagenze neza. Noneho nitwiyongeraho abanyamuryango bashya, bizaba ari byiza kurushaho.

Ni izihe ngaruka intambara yo muri Ukraine yagize kuri Commonwealth?

Isi yaguye mu kantu ndetse itungurwa n’ibirimo kuba muri Ukraine, kubera ubuzima bukomeje gutikira, kandi Commonwealth ishyize imbere iyubahirizwa ry’amategeko, imiyoborere myiza, amahoro, ndetse turimo gushyigikira abakomeje guharanira amahoro muri Ukraine.

Hari ingaruka za politiki n’ubukungu urebye ihungabana ry’ubucuruzi bwa gaz na peteroli, ikibazo cy’ibiribwa, byose byagizweho ingaruka.

Bamwe bavuga ko dukwiye no kurushaho kwitonda mu bijyanye n’ibiribwa.

Ni gute twakongera umusaruro muri Afurika nk’urugero, kubera ko ibihugu byacu byinshi usanga byohereza mu mahanga ibyo bahinga byose, bigatumiza hanze ibyo barya.

Ibi byago biradufasha kongera kwikebuka. Ni gute twafasha uturere kugaburira abaturage batwo, ni gute twaharanira iterambere ry’ubuhinzi bwacu bugamije ubucuruzi, ni gute dukoresha ikoranabuhanga kugira ngo tubashe kwihaza, gutekana mu nzego zose, muri politiki, ubukungu, imibereho, ikoranabuhanga?

Mbere wasangaga duhanganye n’ikibazo kimwe, ubu dufite ikibazo cy’umutekano ku Isi hose, imihindagurikire y’ibihe ikomeje guteza ibibazo byinshi ndetse iteye inkeke ku gukomeza kubaho kw’ibihugu byinshi, ibibazo by’ubukungu bishingiye kuri ibyo bibazo bitatu, ndetse dufite ubwiyongere bw’abaturage muri Commonwealth nk’urugero, usanga abantu benshi ari bato.

60% by’abatuye Commonwealth bafite munsi y’imyaka 30, rero tugomba kureba uburyo twita ku bana bacu.

Ni gute twatuma bagira inzozi, icyerekezo n’amahirwe, ni gute duteza imbere impano cyangwa ibintu tuzi ko dukeneye mu gihe kiri imbere?

Mfite icyizere kubera ko iyo nje mu Rwanda nkabona urubyiruko, cyangwa iyo ngiye mu bindi bihugu bya Afurika, urubyiruko rwa Commonwealth ni intyoza, ruhanga ibishya, kandi wareba ibigo bito birimo kuvuka, ndetse unarebye nk’ibigo bikomeye cyane ku Isi, byinshi muri byo byahanzwe mu myaka 20 ishize, bimwe ni mu myaka 10 gusa, reba na Alibaba.

Nta kintu byatangiriyeho. Tuzi ko dufite ubushobozi bwo guhanga ibishya, tugomba gushyiraho uburyo bufasha urubyiruko rwacu gutera imbere kuko nitutabikora, urubyiruko rwacu nirutakaza icyizere, ntirwitabweho, nibaba batize ngo bahabwe amahirwe, turimo kurema ikibazo aho twakabaye dufasha.

Twese abayobozi bose muri Commonwealth dushishikajwe no guharanira ko bitagenda bityo. Tugiye kwita ku rubyiruko rwacu, ducukumbure, kandi mfite icyizere ko tuzakorera hamwe tukagera ku gisubizo.

Ni ibiki utajya wibagirwa uko utekereje u Rwanda?

Nkunda umuhate w’iki gihugu. Bwa mbere mva mu ndege nkakandagira mu Rwanda, ntabwo nashoboraga kwiyumvisha ibyo mbona. Igihugu gifite umuhate, gitera imbere, gisukuye.

Iki ni cyo gihugu cya mbere gisukuye nabonye, ndetse inshuro imwe gusa nabonye urupapuro hasi mu muhanda, ndavuga ngo yego mbonye urupapuro, ariko ako kanya umuntu yahise aza ararutora.

Nanyuzwe n’uburyo igihugu gitoshye, ari cyiza, ndetse natewe ishema no kujya kureba ingagi, ndetse ku munsi wo kuzita izina nemererwa kwita izina ingagi (mu 2019).

Wibuka izina ry’ingagi yawe?

Yego, Ingagi yanjye nayise ’Nazarian’, kubera ko ubwo najyaga muri Kenya, umumasayi yanyize Nazarian bishatse kuvuga ukunda ndetse agaharanira amahoro.

Nyamara ingagi yanjye ishobora kuba ari imwe mu ngagi nto z’inkubaganyi, ariko yitwa Nazarian [aseka].

Mu byo nzahora nibuka harimo urugwiro rw’abantu, munafite imideli myiza ku buryo ntekereza ko nintaha nzatahana amwe mu makanzu yanyu meza.

U Rwanda rufite byinshi byo kwishyimira, nibuka ubwo nitabiraga umuhango wo gucana urumuri rw’icyizere mu bihe byo Kwibuka abazize Jenoside.

Ntabwo nzibagirwa iryo joro, ryankoze ku mutima, kwa kundi ukabasha kumva akababaro iki gihugu cyagize, ariko binahumura umutima wanjye, mbona ko muri ako kababaro kavuyemo abantu bashyize hamwe, beza, bashyize hamwe mu kubaka igihugu kidasanze.

Ntekereza ko u Rwanda rufite byinshi rukwiye kwishimira, iteka uko nje hano bisa n’aho ruba rwabaye rwiza kurushaho.

Ntabwo nzi uko mwabigenje, ariko ntekereza ko mukwiye no gusangiza abandi iri banga kubera ko ni ibintu bishamaje.

Mu 2019, Patricia Scotland ni umwe mu bise Ingagi izina mu muhango wabereye mu Kinigi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .