Imyiteguro idasanzwe ya EXPO ya 2020 igiye kuba mu bihe bigoranye (Video)

Yanditswe na Uwimana Abraham
Kuya 7 Ukuboza 2020 saa 09:34
Yasuwe :
0 0

Hashize iminsi mike hamenyekanye amatariki EXPO Mpuzamahanga y’umwaka wa 2020 izabera, nyuma y’uko igihe yari isanzwe ibera yasubutswe bitewe n’uko COVID-19 yari igihangayikishije cyane. Ubu byamaze kwemezwa ko kuva ku wa 11 Ukuboza kugeza ku wa 31 Ukuboza 2020 izabera i Gikondo.

N’ubwo byemejwe ko EXPO igiye kuba, u Rwanda ndetse n’isi muri rusange biracyari mu rugamba rwo guhangana na Coronavirus, haracyari ingamba zigomba kubahirizwa kugira ngo hirindwe ikwirakwira ryayo.

Benshi baribaza uko EXPO yo muri ibi bihe by’icyorezo izaba imeze, hari abibaza niba uko yajyaga yitabirwa ari ko izitabirwa, uko bizagenda kugira ngo ntibe icyuho kinjiriramo icyorezo n’ibindi.

Mu kiganiro IGIHE yagiranye n’Umuvugizi w’Urugaga Nyarwanda rw’Abikorera (PSF), Ntagengwa Théoneste, yavuze ko hazashyirwaho ingamba zizatuma EXPO Mpuzamahanga 2020, iba hirindwa Coronavirus.

Ikiganiro kirambuye IGIHE yagiranye na Ntagengwa Théoneste, umuvugizi wa PSF

IGIHE: Ni Expo igiye kuba mu gihe gitandukanye n’icyo yajyaga ibera, iyi tariki mwayihisemo mushingiye kuki?

Ntagengwa: Icya mbere navuga ni uko mu gihe EXPO yari isanzwe ibera, hagati y’ukwezi kwa karindwi n’ukwa munani, rero muri icyo gihe nk’uko mubizi isi yose icyorezo cya Coronavirus cyari kimeze nabi, by’umwihariko mu Rwanda naho wabona hari abantu bandura benshi, tubona rero bitewe n’uko dusanzwe tuzi EXPO igenda, bitashoboka ko umuntu ayitegura muri icyo gihe.

Kuba rero yaraje muri aya matariki ni uko twagishije inama inzego z’ubuzima, zitubwira ibyo twakora kugira ngo abantu babe batakwandura, tubona birashoboka muri iki gihe. Mu nama batugiriye twabona ko umuntu ayiteguye neza abantu bashobora kuyizamo, bagahaha, bagacuruza batanduzanyije.

IGIHE: Ibyo bizashoboka bite?

Ntagengwa: Nahera ku byo batugiriyeho inama, kugira ngo bigufashe kumva uburyo EXPO izagenda, ikintu cya mbere badusabye ni ukuvuga ngo dushyiremo amabwiriza atuma abantu bashobora kwirinda.

Muri ayo mabwiriza rero irya mbere ni uko badusabye ko twafasha abantu bose bazazamo hano kwishyurana bakoresheje ikoranabuhanga, kugira ngo guhererekanya amafaranga bishobora gutuma abantu bandura bigabanuke.

N’ubundi twari twarabitangiye nka PSF mu rwego rwo kwinjira, hashize imyaka ibiri abantu binjira bakoresheje uburyo bw’ikoranabuhanga, ariko no muri EXPO imbere, twumvikanya na sosiyete zitumanaho zifasha abantu kwishyurana bakoresheje ikoranabuhanga, ko n’uzaba adafite ubwo buryo mbere y’uko aza muri EXPO yafashawa akabubona.

Hanyuma ikindi ukijya kwinjira bazabanza barebe niba udafite umuriro, bazabipima hanyuma nibamara no kumupima umuriro anakarabe, kuko akenshi guhererekanya intoki, gukoranaho, bishobora gutuma abantu bandura.

Abantu bakarabe nibamara gukaraba binjire muri EXPO imbere, ariko by’umwihariko nk’uko tubizi, abantu bagenda bambaye udupfukamunwa, umuntu wese agomba kuba yambaye agapfukamunwa kandi akambaye neza.

Nibamara kugera rero imbere muri EXPO, buri stand izaba ifite uburyo bwo kuba abantu bakaraba intoki bakoresheje hand-sanitizer kugira ngo niba hari aho yikoze ari mu nzira amaze gukaraba akaba yakwandura, akumva hari akantu akozeho gashobora kuba kamwanduje ashobore kwihanagura.

Ikindi ni uko n’abacuruzi bacuruza ibyo kurya, na bo bazaba bafite uburyo umuntu yakaraba akitunganya intoki, akaba yakwicara kandi noneho akicara ahanye umwanya na mugenzi we, bategeranye kugira ngo babe bakwanduzanya.

IGIHE: Ese ko twari tumenyereye ko EXPO yitabirwa n’abantu benshi, no muri ibi bihe abantu bose bazaza nk’uko byari bisanzwe?

Ntagengwa: EXPO ni nk’isoko, mu isoko rero burya hari amabwiriza yagiye ajyaho kugira ngo abantu babashe kwitwararika, yose uko ari tuzayubahiriza kugira ngo abantu batanduzanya.

Wenda ikindi nashishikariza abantu ni uko baza kare, burya amasaha ya mu gitondo EXPO ntabwo iba irimo abantu benshi, ahantu hakunda kuza abantu benshi ni saa cyenda kuzamura, ariko dushishikariza abantu kugira ngo bahagere kare, babashe no guhaha neza.

Ariko na none uburyo stand zacu zubatse ntabwo wavuga ngo uzajya usimbuka stand imwe ujye ku yindi, stand imwe irihagije , urumva ni ahantu hagari umuntu yahagararamo agacuruza, ubwo ndavuga ku bacururiza mu mahema Manini, icyo tuzirinda ni uko abantu bazajyamo ari benshi kugira ngo badashobora kuba bakwanduzanya.

Hanyuma ikindi ni uko no mu nzira uko abantu bazaba bagenda, hazaba hari abantu babibutsa kutegerana, kwambara udupfukamunwa neza, ibyo byose nibibasha gushyirwa mu bikorwa, tubona abantu bazabasha kwirinda.

Ikindi ni uko dufite amasezerano tuzagirana n’ibitaro bigomba kuba bihari, ku buryo umuntu aje bagasanga afite ikibazo bakamushyira ku ruhande, bagakora nk’uko amabwiriza ya MINISANTE abiteganya kugira ngo wite ku muntu waketsweho Coronavirus, bamupime bagire gute, nibiba ngombwa ko bagira aho bamujyana hihariye, naho hazaba hahari.

Ibyo bitaro rero bizaba bifite na ambulance izaba ihari, hazaba hari abaganga, ku buryo umuntu wagize ikibazo cyose bashobora kumwitaho bakamufasha atagize n’abandi yanduza.

IGIHE: Nk’uko wabivuze, mu masaha y’umugoroba hakunze kuza abantu benshi bakazira rimwe, hakaba ubwo usanga bahahuriye ari benshi bikaba byateza umubyigano mu kwinjira, ibyo byo muzabikemura mute?

Ntagengwa: Ibyerekeranye no kwinjira twari twaratangiye no kubikoraho ariko ubu bizarushao kugenda neza, turi kongera ahantu abantu binjirira, ariko by’umwihariko ikindi turimo gukora ni ukongera aho abantu basohokera, ku buryo umuntu ashobora kugira amahirwe y’uko yumva amaze guhaha ibye abirangije akabona inzira asohokeramo atongeye guhura n’abandi.

Ku miryango rero tuzakoresha uburyo butuma umuntu azajya ahagera ahita yinjira, cyane cyane icyo nanavuga ni uko ikoranabuhanga dufite ubu, rigabanya uburyo abantu bahura, hari igihe wazaga ukaba wakwereka umuntu ticket cyangwa message muri telefone, ariko system ihari ni ukuvuga ngo njye nimpagera nze nkoza ku cyuma cyangwa ku mashini, yerekana ko nishyuye mopite nkomeza.

Ni ukuvuga ngo uko abantu binjira bizagenda byihuta kuruta uko byajyaga bigenda, ikindi ni uko tuzafataya n’inzego zaba iz’umutekano, iz’ubuzima, banadufashe ku buryo twarinda ko abantu bashobora kuba bagira umubyigano.

Ikintu ahubwo umuntu yashishikariza abantu, ni uko bava mu ngo baguze ama-ticket, kuko umuntu ashobora kuzajya ayigura kuri telefone ari mu rugo, ataza kuhagera akabona agiye muri system itinze kuyimuha, agategereza bagategereza ari benshi.

Uko biteguye ubu ngubu, system ifite ijisho risoma message, ya message wahawe ko wishyuye uragenda washyira kuri rya jisho rigahita ribona ko koko wishyuye igahita iva muri system ku buryo utakongera kuyinjiriraho, noneho urugi rugahita rureka ugatambuka.

Umuntu ushobora kuzakenera umufasha ni ha handi wenda ushobora kuza ukagira akabazo ka telephone yawe, niho wenda ushobora kuzakenera ubufasha, ariko nka 95% y’abazaza, bazaba bashobora kwiyinjiza ubwabo.

IGIHE: Twinjiye imbere noneho, hari ama-stand asanzwe agira ibitaramo by’imyidagaduro bisusurutsa abantu, wajyaga usanga byitabiriwe n’abantu benshi begeranye, ese byo bizakomeza, bizakorwa bite? Mutubwire no mu tuyira tw’imbere niba ho nta mubyigano ushobora kuzabaho?

Ntagengwa: Mpereye ku by’abantu bashobora kuba bahura ari benshi mu tuyira, hari ibyo twakoze turimo turagenda twongera n’utuyira mu ma-stand aho abantu bajyaga banyura, kuburyo umuntu ashobora kugenda, inzira yari asanzwe anyuramo yabona harimo abantu benshi akaba yanakata mu yindi.

Ikindi ni uko ama-stand aho abantu babaga barimo bacuranga cyangwa bidagadura, icya mbere buriya twebwe tugira n’amahirwe aho ibyo bikorwa bibera ni ahantu hanze hadafunganye, ariko ikindi ni uko hano muri EXPO hateguwe ku buryo umuntu afite camera zifata ahantu hose, ku buryo ibyo twumvikanye ari uko hazaba hari uburyo bwo gukurikirana abantu barimo.

Hazaba abantu bakurikirana babona abantu bamaze kuba benshi bakaba babwira abantu bati munyure indi nzira, ariko hakaba n’abantu bari kuri camera bareba bakavuga ngo muri aka gace turebye uburyo abantu barimo bajyayo baraza kuhahurira bibe ikibazo, bagahita baha amakuru ba bandi bari hariya.

Ikindi navuga ni uko n’abazaba barimo bashimisha abantu nabo dufite uburyo twumvikana ku buryo buri mwanya bibutsa abantu, bakavuga bati ntimwegerane, mwambare udupfukamunwa twanyu neza, ariko hakaba harimo n’abandi bakorerabushake benshi bagenda babibutsa.

IGIHE: Wenda tugiye ku cy’amasaha, ese amasaha azakomeza kuba asanzwe, cyane ko ubu hari amabwiriza y’uko saa yine z’ijoro abantu bose bagomba kuba bageze mu ngo zabo?

Ntagengwa: Amasaha navuga atarahindutse ni ayo gutangira mu gitondo saa tatu, kugeza ubu tuvuga ko izajya ifunga saa mbili, kubera ko dutekereza ko amasaha abiri aba ahagije kugira ngo ari wa muntu wacuruzaga n’uwaje guhaha abe yageze mu rugo.

Ariko ibyo turabivuga ubu, gusa tuba twiteguye ko n’amabwiriza yandi leta yatanga, ari ukongera amasaha cyangwa kuyagabanya, tuzajya dukora dukurikije amabwiriza ariho y’icyo gihe.

IGIHE: Ese ku bazamurika byo bihagaze bite? Abitabiraga bose n’ubu bazongera bitabire? Hanyuma abanyamahanga bo bajyaga bitabira babagaragarije ko n’ubu bazitabira cyane ko turi mu bihe bitoroshye?

Ntagengwa: Kugeza ubu abari basanzwe bitabira bose bamaze kwiyandikisha, tugeze ku kigero cya 92% kandi baracyaza.

Wenda mpereye ku banyamahanga, abantu hafi ya bose bajyaga baza barongeye bifuza kugaruka, kuko abenshi baravuga bati mu Rwanda dukurikije amakuru ahita bigaragaza y’uko uburyo mwarwanyije icyorezo, buha umutekano uwaza ko yahava atanduye, abenshi rero usanga bariyandikishije.

Ubu navuga ko ibihugu tumaze kubona birenze 15 kugeza ubu, hari n’ibindi dutegereje bigomba gusubiza muri iyi minsi.

Ingamba zihariye zizakoreshwa muri EXPO 2020 izaba hirindwa COVID-19

Aho abantu bazamurikira ibikorwa byabo hari gutunganywa
Imirimo irarimbanyije kugira ngo aho abamurika bazakorera hatunganywe neza
Mbere yo kwinjira, buri wese azajya abanza gukaraba
Imyiteguro hari abari kuyigeza ku musozo
Aho abantu bazajya bakarabira mbere y'uko binjira harateguwe
Hateguwe uburyo bwose buzatuma hatabaho umubyigano no mu gihe abantu bazaba bari imbere muri EXPO
Hateganyijwe uburyo bw'ikoranabuhanga rizajya rireba ko umuntu yishyuye ubundi yinjire bitabaye ngombwa ko undi muntu ari we ubireba
Aho kwinjirira harongerewe kandi hateganyijwe uburyo bw'ikoranabuhanga
Abazamurika bakomeje imyiteguro bubaka stand bazakoreramo

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .