Imyirondoro y’inzirakarengane z’ibikorwa bya FLN na Rusesabagina

Yanditswe na IGIHE
Kuya 2 Nzeri 2020 saa 07:42
Yasuwe :
0 0

Ifatwa rya Rusesabagina ryomoye ububabare n’uburibwe bw’abaturage bo mu Ntara y’Amajyepfo bagizweho ingaruka n’ibikorwa bye hamwe n’umutwe yabagamo wa FLN we na Nsabimana Callixte uzwi nka Sankara; nubwo gufatwa kwabo kudashobora kuzatuma bongera kubona ababo bakundaga, cyangwa ngo bakire ubumuga batewe n’ubugizi bwa nabi bakorewe.

Mu matariki atandukanye mu 2018, uyu mutwe wagabye ibitero mu bice byegereye ishyamba rya Nyungwe, usahura abaturage, wica abandi ndetse wangiza n’ibikorwa remezo bitandukanye.

Nsabimana wari Umuvugizi wa FLN yigeze kuvuga yari ifite inshingano zo kugaba ibitero ku Ngabo z’Igihugu, n’ahandi hantu nko guturitsa ibiraro no gufunga umuhanda wa Nyungwe kugira ngo “Cyangugu tuyishyire mu kato”.

Ibi bitero mu bice bya Nyungwe barabigabye ku matariki atandukanye nko ku ya 03 Kamena, 19 Kamena, 01 Nyakanga, 13 Nyakanga na 15 Ugushyingo mu 2018. Nsabimana yasobanuye ko ibyo bitero byose byagabwe n’uwari Umugaba Mukuru wungirije ushinzwe ibikorwa ari Gen Maj Sinayobye Bernabé yoherejwe na Gen Irategeka Wilson wari Umugaba w’Ikirenga w’uyu mutwe.

Ngo Sinayobye amaze guhabwa amabwiriza, nawe yohereje uwitwa Gen Gwada binjira muri Nyungwe ari abarwanyi bari hagati ya 150 na 250. Bari baturutse mu Burundi ahitwa Cibitoki, icyo gihe binjira ku butaka bw’u Rwanda ngo hari muri Mata 2018.

Ni ibitero ngo byari bizwi kandi bishyigikiwe n’abantu bamwe bo mu buyobozi bw’u Burundi ariko byakorwaga mu ibanga kugira ngo bitamenyekana. Uwo mutwe wagabye ibitero muri ayo matariki atandukanye, wica abaturage, usahura amaduka n’amatungo, ufata bugwate abantu, ukomeretsa abandi, utwika inzu n’ibinyabiziga hamwe n’ibindi bikorwa bya kinyamaswa.

Josephine Mukashyaka wo mu Murenge wa Nyabimata ni umwe mu bagizweho ingaruka n’ibikorwa by’uyu mutwe kuko umugabo we witwa Fidèle Munyaneza yishwe.

Yigeze kuvuga ati “Umugabo wanjye niwe wari utunze urugo. Yari ishema ryanjye n’abana banjye, ubu ubuzima buragoye kuko adahari.”

Marie Chantal Ingabire wo mu Murenge wa Kibeho mu Karere ka Nyaruguru, nawe yabuze umugabo we witwaga Anathole Maniraho. Yamusigiye abana babiri, ubu agowe no kubarera wenyine mu gihe ariwe bafatanyaga.

Ubwo yavugaga kuri Nsabimana na bagenzi be yagize ati “Yishe umugabo wanjye ubwo umuryango wari umukeneye cyane bitavugwa. Kurera abana yansingiye birangoye.”

“Ubuzima ntibworoshye cyane cyane ku bana b’impinja ndera njye nyine. Bararwara, ni njye biba bireba, mbese byose bindi ku mutwe. Niba hari ukuntu yatanga indishyi ku bantu yagiriye nabi yategekwa kubikora”.

-  Tariki ya 19 Kamena 2018 hishwe abaturage batatu

Abarwanyi b’uyu mutwe mu ijoro ryo ku wa Kabiri tariki ya 19 Kamena 2018 bagabye igitero ku Biro by’Umurenge wa Nyabimata bakomeretsa n’Umunyamabanga Nshingwabikorwa w’Umurenge batwika n’imodoka ye.

Muri icyo gitero bishe uwitwa Munyaneza Fidèle wari Perezida wa Njyanama y’Umurenge wa Nyabimata, uwitwa Maniriho Anathole wari ushinzwe amasomo ku Rwunge rw’Amashuri rwa Nyabimata n’umuturage wundi witwa Habimana Joseph.

Ubuyobozi bw’Akarere ka Nyaruguru icyo gihe bwabwiye IGIHE ko ibi bikorwa by’ubugizi bwa nabi byabaye hagati ya saa tanu n’igice na saa sita z’ijoro. Mu baturage bapfuye harimo babiri basanzwe mu ngo zabo.

Mu byangijwe muri icyo gitero harimo imodoka y’Umunyamabanga Nshingwabikorwa w’uwo murenge yatwitswe mu gihe nyirayo we yarashwe akajyanwa kwa muganga. Basahuye icyo gihe imashini muri Sacco gusa nta mafaranga bakuyemo.

Nsabimana ubwo yavugaga kuri iki gitero akimara kugezwa mu Rwanda, yigaramye ibyakozwe n’umutwe yari abereye umuvugizi, avuga ko yakundaga kubwira abo barwanyi ko batagomba kwica abaturage ngo kuko babakeneye mu mpinduramatwara biyemeje. Ahubwo yashinje Sinayobye na Irategeka kuba aribo batangaga amabwiriza yo kwica abaturage.

Uyu mugabo ufungiye muri Gereza ya Mageragere, yavuze ko ubwo icyo gitero cyabaga, Sinayobye yamubwiye ko barashe ushinzwe kurinda Sacco kuko ngo yari afite imbunda ndetse nawe akaba yari ari kubarasa. Ati “Banamwambuye imbunda barayifotora barayinyereka”.

Ubu bugizi bwa nabi bwabaye hashize icyumweru habaye ubundi kuko tariki ya 10 Kamena 2018 abantu bitwaje intwaro gakondo hamwe n’imbunda, bari bateye abaturage bo mu Murenge wa Ngera mu Karere ka Nyaruguru barabakomeretsa, batwara n’imitungo irimo amafaranga, televiziyo, inkweto n’ibindi.

-  Tariki ya 19 Kanama batwitse imodoka

Kuri iyo tariki, abarwanyi ba FLN bateye i Nyabimata, maze batwika imodoka ya RAV4 hamwe n’inzu ya Koperative imwe y’abatuye muri ako gace. Iyo nzu yari icumbitsemo Umunyamabanga Nshingwabikorwa w’Umurenge wa Nyabimata witwa Nsengiyumva Vincent.

Banatwitse kandi moto yo mu bwoko bwa TVS ya Havugimana Jean Marie Vianney n’indi y’uwitwa Bapfakurera Venuste.

-  Tariki ya 15 Ukuboza 2018 bishe abaturage batandatu, abandi 19 barakomereka

Kuri iyi tariki, abarwanyi ba FLN bongeye kugaba ibitero maze bica abantu batandatu aribo Mutesi Diane, Niwenshuti Isaac, Atete Sine Ornella, Mukabahizi Hiralie, Samuel Ntiziryayo na Niyomugabo Jeannine bakomeretsa kandi abandi 19 IGIHE yabashije kubona amazina yabo bose.

Icyo gihe aba barwanyi batwitse imodoka eshanu muri Nyungwe mu Karere ka Nyamagabe zirimo Coaster eshatu, imwe yo mu bwoko bwa Minibus n’ivatiri imwe.

Ingabo z’u Rwanda zahise zitabara, zirokora aba baturage. Mu itangazo ryashyizwe hanze icyo gihe Umuvugizi w’Ingabo z’u Rwanda, Lt Col Innocent Munyengango, yagize ati “Twarokoye abaturage abagizi ba nabi bashakaga gutwara ku ngufu, baraganirijwe mbere yo koherezwa mu ngo zabo. Twagaruye kandi ibikoresho bitandukanye byari byibwe inzirakarengane gusa byinshi muri byo byarangijwe.”

Mu byo aba barwanyi basahuye harimo imyambaro n’amaherena by’abari bamaze kwicwa no gukomeretswa, za mudasobwa, amatelefoni n’amafaranga. Nyuma yaho Nsabimana yumvikanye yigamba icyo gitero, anavuga ko bafashe ishyamba rya Nyungwe.

Nsabimana yavuze ko ubwo bagabaga ibi bitero abarwanyi be bari baturutse muri RDC banyura muri Kivu y’Amajyaruguru, bakomeza ahitwa Farinda, binjira i Burundi mu Ntara ya Cibitoke bakomereza mu ishyamba rya Kibira ni ko kwinjira muri Nyungwe.

Ubwo bagabaga iki gitero, ngo Sinayobye yavugaga ko abarwanyi bagikambitse muri Nyungwe kuva muri Mata 2018, aho bari kumwe na Gen Gwada. Nyuma ngo bohereje abandi basirikare inshuro ebyiri, bagenda mu byiciro kimwe kigizwe na 50 ikindi kigizwe na 30.

Ati “Basangaga abinjiye bwa mbere mu bitero bya Nyabimata na Kivu bo binjiye bari hagati ya 150 na 250.”

-  Abaturage bafashwe bugwate

Ku itariki ya 19 Kanama 2018, abarwanyi ba FLN bagabye igitero maze bafata bugwate abaturage barimo uwitwa Shumbusho Damascène, Ntakirutimana Sylvain, Nsabimana Anastase, Siborurema Venuste na Habyarimana Jean Marie Vianney.

Ni nako byagenze tariki ya 15 Ukuboza 2018 kuko na none abarwanyi b’uyu mutwe bagabye igitero mu Murenge wa Kitabi maze bashimuta umuturage witwa Niyonkuru Samuel.

Nsabimana ubwo yabazwaga kuri ibi bitero yavuze ko Sinayobye yamubwiye ko batwaye abaturage bane bari ku irondo, nyuma babagejeje mu ishyamba rya Nyungwe barekura babiri “kuko bari barwaye” hanyuma ngo abandi babajyana muri FLN.

Ati “Undi yambwiye ni umusaza batwaye bamwitiranyije n’Umuyobozi w’Umurenge nyuma aza kumbwira ko bamurekuye.”

Ubwo RIB yerekanaga Rusesabagina, yavuze ko akekwaho ibyaha birimo kurema no kuyobora umutwe n’ihuriro ry’imitwe y’iterabwoba yitwara gisirikare igizwe n’abahezanguni, irimo MRCD na PDR-Ihumure, ikorera mu bice bitandukanye mu karere no mu mahanga.

Hari hashize igihe Rusesabagina ashyiriweho impapuro mpuzamahanga zisaba ko afatwa agashyikirizwa ubutabera kugira ngo abazwe ku byaha bikomeye aregwa birimo iterabwoba, gutwika, ubushimusi n’ubwicanyi byakorewe abaturage b’inzirakarengane, b’abanyarwanda mu duce dutandukanye tw’u Rwanda turimo Nyabimata mu Karere ka Nyaruguru muri Kamena 2018 no muri Nyungwe mu Karere ka Nyamagabe mu Ukuboza 2018.

Imodoka y'Umunyamabanga Nshingwabikorwa w'Umurenge wa Nyabimata yaratwitswe

Isano hagati ya Rusesabagina na Nsabimana Callixte

Sankara yigeze kuvuga ko yamenyanye na Rusesabagina mu 2014, akiri muri RNC. Uyu mutwe w’iterabwoba niwo Nsabimana yagiyemo ubwo yari avuye mu Rwanda mu 2013, ngo agezeyo yumvishijwe na Kayumba Nyamwasa ndetse na Patrick Karegeya ko agomba kubiyungaho bakarwanya u Rwanda.

Gusa ngo yaje kuva muri RNC amaze kubona ko nta demokarasi ibamo, kuko ngo ibikorwa byayo byose byari bishingiye kuri Kayumba Nyamwasa na murumuna we Frank Ntwali. We na Rusesabagina ngo batangiye kuvugana nk’abantu baziranye bahuriye muri opozisiyo, bikubitana n’uko bombi banakomoka mu karere kamwe.

Ati “Dukomoka mu Karere kamwe mu yahoze ari Komine Murama ubu ni mu Karere ka Nyanza, naho umugore we akomoka i Rusatira, yari aturanye na mama kuko bavuka hamwe.”

Icyo gihe ngo batangira kuvugana, bavuganiraga kuri telefoni cyane kuri WhatsApp, baza kwemeranya gukorana muri Werurwe 2018. Biyunze mu mpuzamashyaka MRDC ihuriwemo na CNRD yayoborwaga na Gen Wilson Irategeka, mu gihe we [Rusesabagina] yayoboraga PDR Ihumure, Nsabimana wiyise Sankara akayobora RRM.

Basinyanye amasezerano y’imikoranire batari kumwe, kuko babikoze bifashishije ikoranabuhanga, gusa mu nyandiko bandika ko inama yabereye i Bruxelles mu Bubiligi, bitewe n’uko Rusesabagina ariho yari atuye.

Icyo gihe PDR Ihumure yahawe umwanya wa Perezida mu gihe cy’umwaka, Rusesabagina ayobora gutyo, CNRD ya Irategeka ihabwa umwanya wa Visi Perezida mu gihe Nsabimana yagizwe Visi Perezida wa Kabiri, naho Umunyamabanga Mukuru yabaye uwa CNRD witwa Kalinijabo Jean Paul, yungirizwa n’umuntu wo muri PDR Ihumure witwa Seka.

Muri iyi mpuzamashyaka, Rusesabagina yafashe inshingano zo kuba umuntu ushinzwe ibya dipolomasi n’imari, mu gihe uruhande rwa Irategeka rwo rwari rushinzwe ibya gisirikare, ariho hagaruka umutwe wa FLN wari ushamikiye kuri iyi mpuzamashyaka.

Irategeka ni we wabaga ufite ububasha bwo kohereza ahantu runaka abasirikare, kuko yari Umugaba w’Ikirenga. Uwari Umugaba Mukuru yari Lt Gen Habimana Hamada; Umugaba Mukuru wungirije ushinzwe ibikorwa ari Gen Maj Sinayobye Bernabé; Umuyobozi ushinzwe agace k’amajyaruguru ari Brig Gen Antoine Hakizimana uzwi nka Java, mu gihe Nsabimana Callixte yari umuvugizi.

Mu miterere y’uyu mutwe, Umunyamabanga Mukuru wa Kabiri yari Nahimana Straton, bombi uko ari batandatu nibo bari bagize Biro Politiki ya MRCD.

Rusesabagina akurikiranyweho ibyaha by'iterabwoba, ubushimusi n'ubwicanyi
Nyuma y'ibi bitero, ubu ishyamba rya Nyungwe riratekanye...

Izindi nkuru wasoma:

- Nyuma y’ibitero umutekano uradadiye: Impumeko y’abatuye i Nyabimata no mu nkengero za Nyungwe (Video)

- Hasigaye mbarwa, utarapfa yarafashwe: Ibyo wamenya ku bari mu mugambi umwe na Rusesabagina muri FLN

- Paul Rusesabagina wari umuyobozi mukuru wa FLN yatawe muri yombi (Amafoto)


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .