00:00:00 IGIHE NETWORK KN KINYARWANDA EN ENGLISH FR FRANCAIS

Imyaka itandatu ya Zipline mu Rwanda: Drones zishobora gutangira gutwara n’ibicuruzwa

Yanditswe na Iradukunda Serge
Kuya 26 Ukuboza 2022 saa 05:24
Yasuwe :

Imyaka itandatu irashize mu Rwanda hatangijwe uburyo bw’ubwikorezi bwifashisha utudege tutagira abapilote tuzwi nka ‘drones’. Ni intambwe ishimishije u Rwanda rwateye cyane cyane mu bijyanye no gutwara ibikoresho byifashishwa kwa muganga rubifashijwemo n’ikigo cyo muri Leta Zunze Ubumwe za Amerika kizwi nka Zipline.

Mu 2016 ubwo Zipline yatangiraga gukorera mu Rwanda nibwo bwa mbere igihugu cyo muri Afurika cyari kigiye gutangira kwifashisha drones za gisivile mu gutwara ibintu.

Ku ikubitiro utu tudege twatangiye tugeza amaraso ku bitaro byo hirya no hino mu gihugu cyane cyane ibyo mu duce bigoranye kugeramo, nyuma iyi gahunda iza kwagurwa dutangira no gutwara imiti.

Kugeza ubu Zipline ifite ibibuga bibiri bishobora gukoreshwa n’izi ndege birimo icy’i Muhanga mu Murenge wa Shyogwe n’icy’i Kayonza.

Imiti, amaraso n’ibindi drones zitwara biba kuri ibi byicaro aho zihagurukira zibishyiriye umuganga wabitumije.

Ibitaro bitumiza ubwoko bw’imiti ikenewe, abakozi babishinzwe ba Zipline bakabona ubusabe, iyo miti ikegerenywa igashyirwa muri drone ikoherezwa ku bitaro byayitumije.

Iyi drone ntishobora kuyobya imiti kubera ko hari kode yo ku bitaro biyikeneye ihuzwa n’agapfunyika k’imiti ndetse na drone ku buryo ihita iyerekeza kuri ibyo bitaro nyirizina.

Iyi drone ifite ubushobozi bwo gutwara ibiro bibiri by’imiti ikamara amasaha abiri mu kirere igakora urugendo rwa kilometero 160, ikagenda ku muvuduko wa kilometero 130 ku isaha.

Kugeza ubu Zipline itanga imiti mu ntara y’Amajyepfo, intara y’Amajyaruguru ndetse no mu Burengerazuba mu bitaro n’ibigo nderabuzima birenga 400.

Mu kiganiro IGIHE yagiranye n’Umuyobozi Mukuru wa Zipline Rwanda, Shami Eden Benimana yavuze ko iyo basubije amaso inyuma mu myaka itandatu ishize basanga hari byinshi bamaze kugeraho.

Ati “Zipline ijya gutangira gukorera mu Rwanda nibwo bwa mbere ikigo nk’icyacu gikoresha drones muri gahunda zo gutwara ibintu mu kirere cyari gitangiye, ubwo rero habaye ibintu byinshi cyane ni nko guhera kuri zeru ukagera aho turi uyu munsi.”

Yavuze ko mu byo bamaze kugeraho uyu munsi harimo imizigo irenga ibihumbi 467 batwaye ku rwego rw’Isi irimo irenga ibihumbi 167 batwaye mu Rwanda gusa.

Ikindi Zipline Rwanda yabashije kugeraho muri iyi myaka harimo no kuvugurura indege ikoresha uyu munsi bigendanye n’ibibazo bagendaga babona mu zo bahereyeho.

Shami Eden Benimana agaragaza ko ubushakashatsi butandukanye bumaze gukorwa bwerekanye ko hari itafari rikomeye serivisi za Zipline zashyize muri gahunda zo kubaka urwego rw’ubuzima rukomeye mu Rwanda.

Ati “Dukorana n’ibitaro birenga 410 mu Rwanda, ku bijyanye n’amaraso twabashije kugeza muri ibi bitaro amashashi arenga ibihumbi 100, bivuze ko hari abantu twafashije, wenda nguhaye imibare ubushakashatsi bwakozwe bwagaragaje ko ababyeyi bitaba Imana mu gihe bari kubyara ku bitaro dukorana nabyo bagabanutseho 88%, ni benshi cyane bakize kubera ko amaraso yabagezeho byihuse.”

“Indi mibare kandi igaragaza ko igihe byafataga kugira ngo amaraso ave ahantu hamwe ajye ahandi cyagabanutse cyane kuko nta hantu dushobora kurenza iminota 40. Ikindi ni uko umubare w’amaraso yapfaga yagabanutseho 67%.”

100% by’abakoramo basigaye ari Abanyarwanda

Zipline itangira mu Rwanda kimwe mu bibazo byari bihari harimo n’ikijyanye no kubona abakozi b’Abanyarwanda kuko iki kigo cyari kiganjemo abanyamahanga.

Shami Eden avuga ko mu myaka itandatu hari byinshi byakozwe hagamijwe gukemura iki kibazo ndetse bikaba byaratumye abakozi Zipline ikoresha uyu munsi ari Abanyarwanda ku kigero cya 100%.

Ati “Ubu mu Rwanda hari abantu 140 bakorera Zipline bose ni Abanyarwanda, igikorwa cyose mu Rwanda ni Abanyarwanda bagikora kuva ku kwita ku ndege n’ibindi byose. Kuva twatangira kugeza ubu hari byinshi twize cyane haba mu bijyanye na ‘engineering’ ndetse n’ubu bucuruzi.”

Yakomeje avuga ko uretse aba Banyarwanda babonye akazi muri Zipline kubera ubumenyi bungutse “hari n’abandi bagiye bava mu Rwanda bakajya gukorera iki kigo mu bindi bihugu.”

Mu gukomeza gufasha Abanyarwanda kugira ubumenyi ku bijyanye na ‘drones’, hatangijwe icyiswe Zipline Academy ifasha abakozi bashya b’iki kigo kubona ubumenyi bw’ibanze bakeneye. Shami yavuze ko mu minsi iri imbere

Mu rwego rwo gukomeza kwagura imikorere ya Zipline mu Rwanda, iki kigo giherutse kuvugurura amasezerano gifitanye na Guverinoma yongerwaho imyaka irindwi.

Muri aya masezerano mashya afite agaciro ka miliyoni 61 z’Amadolari, Zipline yiyemeje ko serivisi zayo zizagera ku bantu miliyoni 11 mu Rwanda, no kuba urugendo drones zayo zizakora ruzaba rungana n’ibirometero miliyoni 200.

Shami Eden yavuze ko aya masezerano azafasha Zipline mu kwagura serivisi zayo zikava ku gutwara amaraso n’imiti zikagera no mu zindi nzego zitandukanye.

Ati “Aya masezerano ni areba ahazaza mu gihe kinini cyane kuko twemera ko nubwo uru rwego aribwo rugitangira ariko ruzagira akamaro kanini cyane ku Banyarwanda. Tugitangira twari turimo kwiga haba ku ruhande rwacu ndetse n’uruhande rwa Guverinoma, duhera kuri Minisiteri y’ubuzima hibanzwe ku maraso nyuma tuza kongeramo imiti.”

Yavuze ko ubu Zipline yatangiye no gufasha mu gutwara imiti n’inkingo z’amatungo ndetse no gutanga umusanzu mu kurwanya imirire mibi, igeza inyuganiramirire ku bitaro bizikeneye ngo bizihe abana n’ababyeyi.

Ati “Muri aya masezerano tuzajya dukorana n’inzego zose, ikigo cya leta cyose gifite icyo dushobora kubafasha muri serivisi zabo haba kuyihutisha ndetse no kuyigeza kure.”

Biteganyijwe kandi ko mu minsi ya vuba Zipline izatangira gahunda zo kugeza mu ngo z’abantu imiti itandukanye. Ni gahunda izaba ireba cyane abantu bafite indwara zitandura basanzwe bazi imiti bafata.

Iki gihe umuntu azajya abasha gutumiza umuti wa diabetes cyangwa uwa Asthma umugereho atavuye aho ari.

Ishobora kwinjira mu bucuruzi bwo kuri internet

Mu nzego nyinshi zitandukanye Zipline ihanze amaso harimo n’ibijyanye n’ubucuruzi bwo kuri internet ku buryo mu myaka mike iri imbere ishobora kuzajya utumiza ikintu kuri Vuba Vuba cyangwa andi maduka aho kukigezwaho hakoreshejwe moto ukakizanirwa na ‘drones’ za Zipline.

Shami avuga ko nubwo uyu ari umushinga ukiri mu nyigo uzashoboka cyane mu myaka ya vuba.

Ati “Muri uyu mwaka uza turi kureba uko twakora mu Mujyi wa Kigali no mu yindi mijyi cyane cyane mu bijyanye n’ubucuruzi bwo kuri internet, ku buryo bya bintu dukenera ariko bikagora abantu kubibona ese birashoboka ko twagira icyo dukora?”

Yavuze ko mu bijyanye n’ubucuruzi bwo kuri internet bazibanda ku gutwara cya kintu cy’ingenzi umuntu aba akeneye cyane.

Ati “Akenshi buriya uhaha ibintu byinshi cyane kuko uba utizeye ko uzabasha kujya ku isoko inshuro nyinshi, ntabwo tuvuze ngo ibintu byose bizajya bijya muri ‘drones’ ahubwo ni kwa kundi wibagirwa ikintu wagera mu rugo ukavuga uti reka ngitumize, bizatuma duhera ku binti by’ingenzi ariko noneho tunagure ikoranabuhanga ku buryo dushobora gutwara byinshi.”

Shami yavuze ko serivisi batanga zizaguka zikagera no mu bukerarugendo ndetse n’izindi nzego z’igihugu zizagaragaza ko hari aho zikeneye Zipline kugira ngo zirusheho kwagura ibyo zikora.

Drones za Zipline zatangiye gukorera mu Rwanda zitwara amaraso
Inzego zikoreshwamo izi ndege za Zipline zigiye kurushaho kwagurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .