Imvura idasanzwe yirije umunsi yahinduye isura ya Kigali (Amafoto)

Yanditswe na Twarabanye Venuste
Kuya 28 Mutarama 2020 saa 10:30
Yasuwe :
0 0

Umunsi wa 28 Mutarama 2020, ni umwe mu minsi yije nta zuba rivuye mu Mujyi wa Kigali no mu bindi bice bitandukanye by’igihugu, kuko igihu kivanze n’imvura cyiriwe kibuditse.

Ni nyuma y’umunsi umwe Ikigo cy’igihugu cy’iteganyagihe (Meteo Rwanda) gitanze umuburo ku mvura nyinshi izagwa hagati y’itariki ya 28 Mutarama n’iya 1 Gashyantare 2020.

Ku mugoroba wo ku wa 27 Mutarama 2020 Meteo Rwanda yari yatangaje ko imvura nyinshi iteganyijwe ku matariki ya 27, 28, 31 Mutarama n’iya 01 Gashyantare 2020.

Guhera mu rukerera rwo kuri uyu wa Kabiri, imvura nyinshi yatangiye kugwa ndetse yiriza umunsi wose. Bimwe mu bikorwa byari byahagaze mu Mujyi wa Kigali no mu bindi bice by’igihugu bitewe n’iyo mvura.

IGIHE yatembereye hirya no hino mu mujyi wa Kigali ifata amafoto atandukanye agaragaza uko urujya n’uruza rwari rwifashe ndetse n’isura ya bimwe mu bishanga birimo n’ibyimuwemo abantu.

Hari kandi amashusho yagaragaye y’imivu ifite ingufu nyinshi cyane ku buryo hari abo yabuzaga gutambuka ngo bave hamwe bajye ahandi.

Ni ibintu byatumye Minisiteri y’Ibikorwa by’Ubutabazi (MINEMA) isaba abanyarwanda gukomeza kwitwararika ingamba zo kwirinda no gukumira ibiza.

Ubutumwa bw’iyi Minisiteri buvuga ko buri wese akangurirwa gushishoza no kwitwararika hirindwa ko hari uwatwarwa n’imivu, imigezi cyangwa akaba yakubitwa n’inkuba. Abagituye mu manegeka, mu bishanga, mu nzu zidakomeye, barakangurirwa kwimukira ahatashyira ubuzima bwabo mu kaga.

Ababashije kugera ku kazi batashye ikigwa gutega imodoka uw'amahirwe ni uwari ufite umutaka kugira ngo ahagarare ku murongo
Ahantu hatandukanye wasanga huzuye amazi ndetse imirima ihinzemo umuceri irarengerwa
Aho abantu bimutse wasangaga hahise huzura amazi
Imvura yagenzaga make abantu bagasubukura ingendo
Imvura yagwaga buri wese akavuga ibya ya mvugo ngo 'hararya umwana ufite nyina'
I Kigali ntibimenyerewe kubona abantu bambaye amakoti ariko byari byahindutse
Meteo Rwanda yatanze umuburo ko hari ahazaba imyuzure
Mu mujyi wa Kigali hiriwe umuvumbi
Nyabugogo ahafatirwa imodoka zijya Gatsata na Kimisagara

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .