00:00:00 IGIHE NETWORK KN KINYARWANDA EN ENGLISH FR FRANCAIS

Imvano y’ubukene bwagwatiriye Akarere ka Rutsiro

Yanditswe na Nsanzimana Erneste
Kuya 13 Mutarama 2023 saa 06:58
Yasuwe :

Abatuye n’abakorera mu karere ka Rutsiro bagaragaza ko imyumvire y’abaturage, ubushomeri n’ubutaka butera ari byo bituma aka karere kaza mu turere dufite abakene benshi mu Rwanda.

Ibi ni bimwe mu byatangarijwe mu nteko rusange y’ihuriro ry’abafatanyabikorwa mu iterambere ry’akarere ku wa 11 Mutarama 2023.

Imibare y’ikigo cy’igihugu cy’ibarurishamibare (NISR) igaragaza ko mu baturage ibihumbi 390 batuye akarere ka Rutsiro abarenga 49% bari munsi y’umurongo w’ubukene mu gihe 24.4% bari mu bukene bukabije.

Ku mpuzandengo, mu Rwanda buri rugo rugizwe n’abanatu batanu. Banki y’Isi igaragaza ko urugo rubeshwaho n’amafaranga atageze ku 2000Frw ku munsi (1,9USD) ruba ruri mu bukene bukabije.

Ikitari umwihariko w’akarere ka Rutsiro ni uko benshi mu baturage ari abahinzi batabigize umwuga, naho ikiri umwihariko kuri aka karere ni uko hafi kimwe cya kabiri cy’ubuso bwako ari amazi y’ikiyaga cya Kivu.

Hagendewe ku byiciro by’ubudehe abaturage ka Rutsiro bangana na 0,01%, ni ukuvuga ingo 12 mu ngo ibihumbi 90 nibo gusa bari mu cyiciro cya kane cy’ubudehe, 41% bari mu cyiciro cya gatatu , 40% bari mu kiciro cya kabiri, mu gihe abari mu cyiciro cya mbere ari 17,6%.

Mu batuye aka karere k’imisozi ifite ubutaka busharira bukeneye ishwagara kugira ngo umusaruro w’ubuhinzi wiyongere, 57% bari mu cyiciro cya mbere n’icya kabiri by’ubudehe.

Mukashyaka Felicite wavukiye muri aka karere akanahakurira yabwiye IGIHE ko igitera ubukene mu karere ka Rutsiro ari ubutaka butera neza.

Ati “Turahinga tukarumbya, uretse ko nyine dusigaye dushyiramo amafumbire ubona hari igitangiye guhinduka. Icyakorwa ni uko abayobozi bakomeza kutwegera cyane bakatwigisha guhinga kijyambere kandi bakatworohereza no kubona amafumbire”.

Umwe mu barimu bigisha muri aka karere utashatse ko amazina ye ajya mu itangazamakuru, yavuze ko ubukene mu karere ka Rutsiro buterwa n’ibintu byinshi birimo imyumvire iri hasi no kutaboneza urubyaro.

Ati “Iyo ntambutse nkareba ku isoko uko abantu bahaha mbona ko nta mafaranga bafite, niba umuntu atabasha kugura ikiro cy’ibishyimbo mu cyumweru biba bigaragaza ko aho hantu hari ubukene”.

Akarere ka Rutsiro ni akarere gafite ubuso bugizwe n’amazi y’ikiyaga cya Kivu ku kigero cya 43%. Aya mazi arimo ibigobe 12 bishobora kororerwamo amafi, aka karere kandi gafite ubutaka bweraho igihingwa cy’icyayi, kakagira amabuye y’agaciro arimo gasegereti, coltan na wolfram.

Ni akarere gashobora kubonekamo ubuki bwinshi kuko gafite ubuso bunini kuri pariki ya Gishwati-Mukura bivuze ko boroye inzuki zabona aho zihomvwa. Aka karere gashobora kweramo imboga n’imbuto kuko gafite ibishanga bihehereye. Abatuye aka karere babishatse bateza imbere ibijyanye no gukora ibikoresho bikoze mu migano kuko aho babitangiye bibona abakiriya kandi bigakurura na ba mukerarugendo.

Umukozi wa Caritas Nyundo-Kibuye, Eugene Uwizeye, umaze imyaka 10 akora mu bijyanye no guteza imbere abaturage barimo n’abo mu karere ka Rutsiro, avuga ko mu bitera ubukene muri aka karere harimo imyumvire y’abaturage.

Ati “Rutsiro ni akarere gakize, ibintu bishobora kubyazwa umusaruro birahari, ariko uburyo n’ubumenyi byo kubibyaza umusaruro ugasanga ari bwo buba bukeya”.

Mu baturage ibihumbi 390 batuye akarere ka Rutsiro 50,2% ni abagore naho 65% ni urubyiruko rwiganjemo urudafite akazi.

Uwizeye avuga mu byo bashyiramo imbaraga nk’abafatanyabikorwa b’akarere mu iterambere harimo gufasha urubyiruko n’abagore guhanga akazi.

Ati “Kuko n’ayo mahirwe tuvuga ari mu karere hari n’igihe umuturage aba atayabona. Niyo mpamvu iyo tuvuga ngo umuturage, natwe nk’abayobozi tugomba kwikebuka, umuturage akazamurirwa imyumvire ntiyumve ko ibintu byose azabikorerwa ahubwo akumva ko iterambere rya mbere ari we rigomba guheraho”.

Mutarambirwa Emmanuel, umukozi w’umuryango Heifer International ufite mu nshingano guteza imbere ubworozi ufatanyije na Miniteri y’Ubuhinzi n’ubworozi, avuga ko mu byo bagiye gushyiramo imbaraga ngo ubukene bugabanuke mu karere ka Rutsiro harimo gutanga amatungo magufi arimo inkoko, ingurube, ihene n’intama.

Ati “Nyuma yo gutanga inka zitanga umukamo no gutanga amahugurwa yo korora kinyamwuga, aborozi tukabashishikariza kwizigama no kugurizanya mu rwego rwo kubafasha gukemura ibibazo by’ingutu bafite mu miryango yabo. Ikindi tubigisha gukora uturima tw’igikoni, gutera imbuto n’ imboga ndetse bagasobanurirwa ibyiza byo kurya indyo yuzuye hagamijwe kurwanya imirire mibi n’ igwingira ry’abana”.

Uyu muryango kandi wubakiye aborozi amakusanyirizo mato mu rwego rwo kugeza umusaruro wabo ku isoko ugifite ubuziranenge.

Ati “Ibyo byose turahamya ko bizatuma abaturage bamererwa neza n’imiryango yabo, bakemure ikibazo cy’igwingira kandi rero burya iyo umuntu yariye neza abasha no gutekereza neza”.

Umuyobozi w’Akarere ka Rutsiro Murekatete Triphose, avuga ko nyuma yo kubona ko aka karere gafite abakene benshi bafashe ingamba bafatanyije n’abafatanyabikorwa batandukanye ku buryo bafite icyizere ko nihongera gukorwa ubushashatsi bazasanga ubukene bwaragabanutse.

Ati “Dufite abafatanyabikorwa benshi badufasha, hari gahunda za Leta VUP, Ubudehe na Girinka inka, ku buryo ubona hari abaturage benshi bagenda bava mu cyiciro kimwe bajya mu kindi, ntabwo biragera aho twifuza ariko icyo twizera cyo ni uko nihongera gukorwa icyegeranyo bazasanga tutakiri kuri ririya janisha”.

Meya Murekatete avuga ko aho bagiye gukomeza gushyira imbaraga ndetse banakeneye uruhare rw’abafatanyabikorwa ari mu guhindura imyumvire y’abaturage kuko ngo hari abagihabwa imfashanyo bakazigurisha, ahandi ugasanga umuturage ashatse abantu batema inka yahawe muri girinka ngo ipfe bayibage.

Ku rwego rw’igihugu imibare igaragaza ko ubukene buri kuri 38%, naho ubukene bukabije bukaba kuri 16% bivuze ko mu karere ka Rutsiro ibipimo biri hejuru ugereranyije no ku rwego rw’igihugu.

Ibipimo n’ubushakashatsi mpuzamahanga bigaragaza ko ubukene mu Rwanda bwavuye kuri 77.2% mu 2001 bugera 55.5% in 2017, ni mu gihe imibare y’ubushakashatsi bw’imbere mu gihugu igaragaza ko bwavuye kuri 58.9% to 38.2

Igice kiniini cy'akarere ka Rutsiro kigizwe n'amazi y'ikiyaga cya Kivu
Abatuye Rutsiro bavuga ko babonye ishwagara bakweza cyane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .