Imvano y’ishyirwaho ry’amasaha yo gutaha atandukanye hagendewe ku matariki

Yanditswe na Iradukunda Serge
Kuya 15 Ukuboza 2020 saa 10:06
Yasuwe :
0 0

Minisiteri y’Ubuzima yasobanuye impamvu amasaha mashya ntarengwa yo kugera mu rugo yashyizweho atandukanye bitewe n’amatariki, ivuga ko bigamije kwirinda gufata ibyemezo bihutiyeho no gufasha abantu gukomeza kwirinda Covid-19 mu minsi mikuru.

Izi ngamba nshya zo kurwanya Covid-19 zikubiye mu byemezo byafashwe n’Inama y’Abaminisitiri yateranye ku wa 14 Ukuboza iyoborwa na Perezida Paul Kagame.

Iyi nama yafashe umwanzuro wo kwigiza imbere isaha ntarengwa yo gutaha ya Saa Yine iyigeza saa tatu z’ijoro. Ni icyemezo kigomba kubahirizwa guhera kuri uyu wa 15 Ukuboza.

Iki cyemezo kizamara icyumweru kimwe kuko guhera ku wa 22 Ukuboza amasaha y’ingendo azongera guhinduka aho zizajya ziba zibujijwe guhera saa Mbili z’ijoro, umwanzuro uzageza tariki ya 4 Mutarama 2021.

Kuva icyorezo cya Covid-19 cyagera mu Rwanda ni ubwa mbere Inama y’Abamisitiri ishyizeho ingamba zo kugabanya amasaha ntarengwa yo kugera mu rugo ariko ikayatandukanya hashingiwe ku matariki.

Umunyamabanga wa Leta muri Minisiteri y’Ubuzima, Dr Mpunga Tharcisse yavuze ko uyu mwanzuro wafashwe mu rwego rwo kwirinda ibyemezo biza bihutiyeho, ndetse no gufasha abantu kwitegura ku buryo igihe kizagera biteguye kubahiriza izi ngamba nshya.

Ati “Gutandukanya amasaha no kuyaha amatariki ni uburyo bwo guteguza abantu kugira ngo babyitegure bamenye ko uko iminsi mikuru igenda yegereza ariko n’ingamba zo kwirinda zigenda zikazwa kugira ngo abantu bakomeze kwirinda aho kugira ngo bajye mu bintu bashobora kwandura ari benshi.”

Yakomeje avuga ko ubu buryo bushya bwakoreshejwe kugira ngo abantu bafashwe mu kubahiriza izi ngamba bitandukanye n’uko byagendaga mbere aho wasangaga abantu batunguwe n’icyemezo.

Ati “Byagiye bigaragara ko kenshi iyo imyanzuro yasohokaga nk’uyu munsi ingamba zahindutse kubishyira mu bikorwa biragorana bigatera n’impanuka kenshi na kenshi mu mihanda ariko ubu ni uburyo bwo kugira ngo abantu babateguze, bitegure batangire bakore gahunda zabo bajyanye n’ibihe turimo cyane cyane ko iminsi mikuru irangwamo n’ibintu by’ubusabane byinshi no kwirekura bituma abantu bajya mu bintu bituma bandura kandi batirinda Covid-19.”

Leta y’u Rwanda yashyizeho izi ngamba nshya zo kwirinda Covid-19, nyuma yo kubona ko mu byumweru bibiri bishize umubare w’abandura iki cyorezo ugenda urushaho kwiyongera. Mu minsi 14 gusa ishize, abantu barenga 700 banduye iki cyorezo mu gihe batandatu bo bapfuye.

Mu zindi ngamba zafashwe harimo ihagarikwa ry’amateraniro rusange harimo imihango y’ubukwe, ubusabane n’ibirori bitandukanye byaba ibibera mu ngo cyangwa ahandi hose.

Harimo kandi ko umubare w’abitabira inama (meetings and conferences) utagomba kurenga 30% by’ubushobozi bwo kwakira abantu bw’aho bateranira. Kandi abayitabira bose bagomba kubanza kwipimisha COVID-19.

Izindi ngamba zafashwe

1 Ibikorwa by’inzego za Leta n’abikorera bizakomeza ariko buri rwego rurasabwa gukoresha abakozi batarenze 30% by’abakozi bose, abandi bagakorera mu rugo ariko bakagenda basimburana.

2 Imodoka zitwara abantu mu buryo bwa rusange zemerewe gutwara 50% by’umubare w’abantu zemerewe gutwara kandi hakubahirizwa amabwiriza yo kwirinda COVID-19.

3 Insengero zahawe uburenganzira bwo gukora kuko zujuje ibisabwa mu kwirinda COVID-19, zemerewe kwakira 50% by’ubushobozi bwazo bwo kwakira abantu, inshuro imwe mu cyumweru.

4 Imihango yo gushyingura ntigomba kurenza abantu 50.

5 Umubare w’abitabira ikiriyo ntugo,ba kurenga abantu 15 icyarimwe.

6 Imyitozo ngororamubiri ikorerwa mu nyubako z’imyidagaduro (gyms) no kogera muri pisine (swimming pool) birabujijwe. Icyakora abantu bacumbitse muri hoteli bemerewe gukora izo siporo zombi kuri hoteli bacumbitsemo ariko berekanye ko bipimishije COVID-19.

7 Imikino ya Shampiyona y’Igihugu y’Umupira w’amaguru hamwe n’imyitozo y’abakinnyi birahagaritswe. Icyakora amakipe y’umupira w’amaguru ari mu marushanwa mpuzahanga yo yemerewe gukomeza kuyitabira.

Isaha ntarengwa yo kugera mu rugo yigijwe imbere ishyirwa saa Mbiri z'ijoro guhera ku wa 22 Ukuboza 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .