Imvano y’imyigaragambyo yatumye Ambasade za Israel zirimo n’iyo mu Rwanda zifungwa

Yanditswe na Philbert Girinema
Kuya 31 Ukwakira 2019 saa 05:42
Yasuwe :
0 0

Kuva kuri uyu wa Gatatu, Ambasade 103 za Israel ku Isi hose zafunze imiryango, kubera imyigaragambyo y’abakozi bazo na Minisiteri y’Ububanyi n’Amahanga muri iki gihugu, yakomotse ku bwumvikane buke na Minisiteri y’imari.

Impamvu nyamukuru ishingiye ku kuba ingengo y’imari yakoreshwaga na za Ambasade yaragabanyijwe bikomeye, ibintu ba Ambasaderi bavuga ko byatumye akazi kabo gahura n’ibibazo, bagashinja Minisiteri y’Imari muri iki gihugu kudaha agaciro akazi bakora.

Bimwe mu byo ba Ambasaderi ba Israel hirya no hino bambuwe, harimo ko batagihabwa amafaranga yo kwakira abashyitsi. Basobanura ko Minisiteri y’Imari n’Igenamigambi ibafata nk’abantu baba baragiye mu mahanga mu misangiro (kurya) gusa ntihagire ikindi bakora.

Ambasade ya Israel mu Rwanda ikorera ku Kimihurura muri Kigali Heights, ni imwe mu zari zafunze imiryango gusa ku gicamunsi cyo kuri uyu wa Kane byaje gutangazwa ko imyigaragambo ihagaze nyuma y’uko Urukiko rw’Umurimo rugerageje kumvikanisha impande zombi.

Ubwo iyi myigaragambyo yatangiraga, nta gihe cyari cyashyizweho nk’umunsi izarangirira, gusa ubu umwanzuro ni uko ibikorwa bya za Ambasade bisubukurwa guhera kuri uyu wa Gatanu.

Ambasaderi wa Israel mu Rwanda, Ron Adam, yabwiye IGIHE ko atari ubwa mbere habayeho iyi myigaragambyo ndetse ku buryo iba mu bice byose by’Isi, aho kuba ku cyicaro cya Minisiteri y’Ububanyi n’Amahanga muri Israel, i Yeruzalemu.

Ati “Ibi bijyanye n’urugamba rwacu rwo kubona ingengo y’imari nini, kugira ngo Minisiteri y’Ububanyi n’Amahanga ibone amafaranga menshi kuko imaze igihe kinini irwana n’ikibazo cy’ingengo y’imari hamwe na ba Ambasaderi ubwabo, bamaze igihe bahura n’icyo kibazo.”

“Ntabwo ari ibintu bigaragaza isura nziza kuri Israel ariko uko niko biri kuko ingengo y’imari icungwa na Minisiteri y’Imari, harimo abantu badaha agaciro akamaro k’imibanire mpuzamahanga mu budahangarwa by’igihugu cyacu. Batekereza ko tuba twagiye mu misangiro gusa akaba aribyo dukoresha amafaranga.”

Ambasaderi Adam yavuze ko iki kibazo hari n’ahandi yagiye acyumva mu bihugu binyuranye, ariko impamvu y’imyigaragambyo ari uko bisa n’aho batereranywe.

Ati “Birumvikana hari Minisitiri w’Intebe ugomba kubyitaho ariko ubu ahugiye mu gushyiraho guverinoma nyuma y’amatora, nta muntu uhari wo kutwitaho, ni ibintu bibabaje, ni yo mpamvu twatangiye imyigaragambyo.”

Icyo bivuze ku banyarwanda ni uko muri iki gihe cy’imyigarambyo badashobora kubona viza kuko Ambasade ziba zafunze ibikorwa, ku buruo badashobora no kujya kuzakira mu bindi bihugu.

Urukiko rwinjiye mu kibazo

Uyu munsi habaye urubanza mu rukiko rw’umurimo muri Israel, impande zombi zirahamagazwa. Icyari kigamijwe ntabwo ari ugufata umwanzuro ahubwo kwari ukumvikanisha impande zombi.

Amb. Adam yavuze ko “kubera ko demokarasi itwemerera kwigaragambya, urukiko ntirushobora gufata umwanzuro ubirwanya, urukiko rushobora kuwufata mu gihe ari ikibazo cy’umutekano cyangwa se cy’uburenganzira bwa muntu”.
Rwaje kumvikanisha impande zombi, zemera ko imyigaragambyo yaba ihagaritswe mu gihe cy’iminsi 25, hakaba ibiganiro. Ibyo ni byo byatumye ibikorwa bigomba gusubukurwa kuri uyu wa Gatanu.

Mu gihe cy’imyigaragambyo, ba Ambasaderi bose ntabwo babarirwa umushahara hamwe n’abandi bakozi ba za Ambasade b’abanya-Israel, usibye abenegihugu [nk’abanyarwanda] baba bakorera za ambasade aho ziri.

Ingengo y’imari ya Minisiteri zose muri Israel irenga gato miliyari 1.5 z’amadolari ya Amerika, kimwe cya gatatu kijya mu bijyanye n’umutekano. Ingengo y’imari ijyanye n’ibikorwa bya Ambasade zose igeze kuri miliyoni 367 z’amadolari.

Ron ati “Uburyo ingengo y’imari icungwa muri Israel rimwe na rimwe ntabwo buba busobanutse kuri benshi.”

Umuyobozi w’Ikigo cy’u Rwanda cy’indege, RwandAir, Yvonne Makolo, yabwiye IGIHE ko ingendo z’iki kigo zigana i Tel Aviv zitigeze zihungabana, ndetse ko bakomeje gukurikiranira ikibazo hafi bareba aho kigana.

Za Ambasade zisaba ko nibura ingengo y’imari yakongerwaho miliyoni 200 z’amadolari kugira ngo babashe gukora uko bikwiye.

Ambasaderi wa Israel mu Rwanda, Ron Adam, yatangaje ko imyigaragambyo yatewe n'uko ingengo y'imari igenerwa ibikorwa bya za Ambasade yagabanyijwe
Ambasade ya Israel mu Rwanda yafunguwe muri uyu mwaka. Aha Minisitiri w'Ububanyi n'Amahanga, Dr Sezibera Richard yari kumwe n'Umuyobozi Mukuru wa Minisiteri y'Ububanyi n'Amahanga muri Israel, Yuval Rotem

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza