00:00:00 IGIHE NETWORK KN KINYARWANDA EN ENGLISH FR FRANCAIS

Imvano y’impinduka zidasanzwe muri Moshions, ibya Kwanda n’ifoto yabiciye: Ikiganiro na Moses Turahirwa

Yanditswe na Mukahirwa Diane
Kuya 27 Ugushyingo 2022 saa 07:08
Yasuwe :

Moses Turahirwa amaze imyaka igera kuri irindwi ashinze inzu y’imideli ikomeye mu Rwanda, Moshions, imaze gushyira hanze ubwoko butandukanye bw’imyambaro.

Mu byumweru bibiri bishize, mu matwi ya benshi ntihasibye kumvikanamo amakuru atandukanye kuri Moshions na Turahirwa ubwe, n’ayo gushinga ikigo gishya cyitezweho kuzana impinduka mu by’imideli mu Rwanda.

IGIHE yagiranye ikiganiro kirambuye na Turahirwa, asobanura ibyo benshi bibaza kuri iyi nzu y’imideli yakoze impinduka zitandukanye.

Asobanura ko iki kigo ari icye 100%, ku buryo kugeza ubu nta n’undi muntu ugifitemo imigabane.

Hari ifoto yagiye hanze mu minsi ishize abantu bacika ururondogoro. Yafashwe ite?

Mfata iriya foto sinari nitaye ku byo abantu bazavuga nyuma kuko yari iri kumwe n’izindi eshatu zerekana igihe nari ndimo cyo guhanga, njye nta kintu nayibonagaho kidasanzwe kandi yari iri mu gihe cya nyacyo cyo gutangaza Kwanda.

Kuko ndi kugenda nkora nk’uko abandi b’i Burayi basohora imyambaro mishya, kuko yose izajya yitwa Kwanda, duhindure igihe yasohokeyemo.

Abantu ku mbuga nkoranyambaga bagusabiye kujyanwa mu nkiko, bitewe n’icyo bamwe bafata nko gukora ibiterasoni mu ruhame. Wabyakiriye ute?

Ibyo abantu bavuze sinabibonaga cyane, inshuti zanjye ni zo zabimbwiraga nkavuga ngo nihagira umpamagara ndamwitaba, kuko njye nabonaga nta tegeko nishe. Iyo bampagara nari kwitaba, ni amahire ko nta wampamagaye.

Ntabwo mbona ko ari ikintu cyo kubangamira umutekano, ahubwo ni abantu bafite umutekano muke mu mitwe yabo, ni ko navuga, bagashaka ko n’igihugu gihungabana ku tuntu tutagize icyo tuvuze.

Muri Moshions habayemo impinduka nyinshi: zatewe n’iki?

Ni impinduka zaziye igihe nyacyo kuko maze hafi imyaka ibiri nzitegura, habanje kuba buri wa Gatanu dusohora umwenda ndetse tukanasobanurira Abanyarwanda byimbitse ku gukora imyenda.

Mu byo nabonye harimo gukomeza gushimangira gukora imyenda mike ifite umwimerere, mu bushakashatsi nakoze mpitamo rero gufata ibyo byiciro bibiri kubera ko hari n’abandi bahanzi buri wa Gatanu, tukanabashishikariza gukora.

Kuko gukorana bizamo ibintu byinshi; naravuze ngo nshobora gukora indi ‘brand’ izajya izamo imyenda uhita wambara, n’ubwo bufatanye n’abandi bahanzi uhereye mu muziki, gushushanya, ubugeni. Iduka ntabwo rizaba ari imyenda gusa, rizaba ari nko mu rugo.

Wasezeye ku guhanga imyambaro muri Moshions, ninde wafashe izo nshingano?

Ibijyanye no guhanga imyambaro ya Moshions biri mu biganza byanjye ariko mfatanyije n’abandi noneho. Nzakomeza gukora imyenda y’icyitegererezo ariko iyi isanzwe abantu bahita bambara iri mu biganza bya Nadia Niwemutoni.

Niwemutoni, umukobwa wigaga imideli muri Newcastle ariko twatangiye gukorana ari kwimenyereza umwuga hano, akomeza yiga byinshi kuri Moshions, anakora, tumuhindura kuba umuhanzi w’imyambaro.

Kwanda ihuriye he na Moshions?

Kwanda ni umwana wa Moshions, imikorere ya Kwanda ituruka kubyo Moshions itanze ku bushakashatsi yakoze, izajya itanga igitekerezo cy’uko ibintu bizajya bikora kuri ba bahanzi, bikorwe mu ntambwe 12. Icyo Kwanda ikeneye cyose igikura muri Moshions.

Ni bande bahanzi bazakora kuri Kwanda?

Abahanzi twatangiye gukorana tuzabatangaza tariki 3 Ukuboza 2022, bose ni 12 bafite igihangano gihuye n’umwenda Moshions ikora.

Ubu nshobora kukubwiramo bane harimo Nishimwe Imfura Paradine wa Wood Habitat, Kalisa Winnie wa Laini Studio, Claude yize ku Nyundo akora ubugeni harimo na Produce Pastor P.

Abo ni bane nakubwira ko bamaze kwinjira, ariko mu kumurika tariki 3 tuzamurika bose bazakora.

Kuki wahurije hamwe aba bahanzi?

Kubahuriza hamwe ni uburyo bwo gufatanya kugira ngo tugire umwimerere w’u Rwanda, ariko ufite imizi nk’iya Moshions kandi ndumva ko ifite ubwo bushobozi, bitewe n’aho yaturutse n’aho igeze no kubahuza n’urundi rwego.

Imikoranire y’aba bahanzi ihagaze ite?

Imikoranire yatangiye kera, wabonaga ko buri wa Gatanu dusohora umwambaro habaga harimo umuziki, ibikoresho bitandukanye, ibi bizaza cyane mu byo ndi gukora nise ’Twelve Steps’, ni intambwe 12 umuhanzi akora guhera ku gitekerezo kugeza kimuritswe.

Byanze bikunze iyo twerekana imyenda hazamo umuziki, amafoto, amashusho n’ibindi, abo rero ni abahanzi dushaka kujya duha agaciro tuvuge ngo imyambaro izakorwaho n’umuziki uvuye kwa Pastor P, bizajya bijyana n’icyerekezo imyenda ifite.

Abahanzi bari muri Kwanda bazungukira he?

Ku myenda izajya iba muri Kwanda, 90% ni iya Moshions, hazajya habaho ubwumvikane hagati ya Kwanda n’umuhanzi, uburyo igicuruzwa cye kizajya kigurishwa.

Ducururiza kuri murandasi, aho waba uri hose ushobora kugura umwenda wa Moshions, rero ushobora kugura na cya gihangano cy’umuhanzi amafaranga agashyikirizwa wa muhanzi ako kanya, mbega ni ukubahagararira.

Watangaje ko Kwanda izaba ikora imyambaro y’icyitegererezo kandi ihenze, ibiciro bizaba bihagaze bite?

Kwanda ni ink’Imandwa, harimo imyenda igura nka $3000; ni umwenda umwe wa Noheli wagura rimwe mu mwaka.

Hari gahunda wavuze yo guha imigabane ibigo bya Leta muri Moshions. Hazagenderwa ku ki?

Imigabane izatangwa ku nyungu runaka kuko Moshions izaba ikigo cy’ubushakashatsi ku bihingwa, amabara y’umwimerere, tuzagenda tureba rero nk’ibigo bishaka ko dufatanya mu bushakashatsi tubahe umwanya.

Hashobora kuza ikigo cy’abahanzi cyangwa ubugeni n’ingoro bakavuga ngo turabona twafasha abahanzi mu buryo bumeze gutya, tukaba twabahuza na babahanzi bari muri Kwanda.

Ni ubushakashatsi hagati haba ku bahanzi n’ubuhanzi. Iyi si imigabane yo kugurisha ahubwo ni ubufatanye.

Wagira icyo uvuga ku hazaza ha Moshions?

Ahazaza ha Moshions ni ukwibera mu Birunga, tukambara bike byiza twatekerejeho ubundi tukavuga ngo tukajya tuzenguruka Isi, ubundi tugataha mu Rwanda.

Nicyo nshaka ko n’abahanzi bazaza muri Kwanda bazakora, tuzajya tugira ingendo zizenguruka Isi. Guhera muri Gicurasi dufite urugendo i Florence, tuzagera no mu bindi bihugu dukora ibirori bihuriwemo n’abahanzi bose, twerekana izo mpano.

Imyenda haba iya Moshions na Kwanda izajya igurirwa hano, kereka abashaka gukorana nanjye bw’umwihariko, izaba iri i Burera. Kandi tugiye gutangira gukorana na Zipline ku buryo niba waratumije umwenda, uzakurwa i Burera na Zipline ukawufata hano.

Ubutumwa ugenera abakunzi ba Moshions ni ubuhe?

Abakunzi ba Moshions ndababwira ngo ’mushonje muhishiwe’ kandi bakomeze badutere ingabo mu bitugu, umushinga ni uwo, Moshions iri kwaguka, irimo kwanda, ntibagire ikibazo ni ukuva mu bwiza tujya mu bundi.

Ni imishinga myinshi iri mu buhanzi kandi biri ku murongo neza, ni uburyo bwo kwaguka no gusangizanya n’abandi amakuru kandi turabashimira ko bakomeje kutuba hafi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .