Impunzi za mbere ziturutse muri Libya zageze mu Rwanda (Amafoto)

Yanditswe na IGIHE
Kuya 27 Nzeri 2019 saa 08:26
Yasuwe :
0 0

Itsinda ry’impunzi n’abandi bashaka ubuhungiro bose hamwe 66 baturutse muri Libya baraye bageze mu Rwanda nyuma y’uko rwemeye kubafasha.

Ishami ry’Umuryango w’Abibumbye ryita ku mpunzi (UNHCR) muri Libya, ryatangaje ko ‘abenshi bari muri uru rugendo ari abana batari kumwe n’imiryango, abagore b’abapfakazi ndetse n’imiryango’.

Amasezerano areba impunzi zimwe z’Abanyafurika zaheze muri Libya ziri mu mayira zishaka kujya i Burayi, yashyizweho umukono ku wa Kabiri tariki ya 10 Nzeri hagati y’u Rwanda, Umuryango wa Afurika yunze Ubumwe (AU) n’Ishami ry’Umuryango w’Abibumbye ryita ku mpunzi, UNHCR.

U Rwanda rwatangaje ku ikubitiro ko ruzakira impunzi 500, icyiciro cya mbere cyageze mu Rwanda ari 66. Bazanywe n’indege ya Buraq Air, ibagejeje i Kigali burizwa imodoka bajyanwa mu nkambi bagiye gucumbikirwamo i Gashora mu Karere ka Bugesera.

Inkambi ya Gashora isanzweho kuko yifashishijwe mu kwakira ibihumbi by’impunzi z’Abarundi mu 2015. Irimo ibyangombwa nk’ibibuga by’imikino, aho kurara n’ibindi nkenerwa, ubu irimo kongererwa ubushobozi kugira ngo izakire izo mpunzi. Nyuma yo kongererwa ubushobozi ntabwo izaba ikiri inkambi inyurwamo by’igihe gito, izaharirwa izi mpunzi mu buryo bw’igihe kirekire.

Ishami ry’Umuryango w’Abibumbye ryita ku mpunzi muri Libya ryatangaje ko iki cyiciro cyajemo umubare munini w’abana badafite ababyeyi.

Uyu muryango wakomeje uvuga ko gutuzwa mu Rwanda kwabo, bizatuma babaho batekanye nyuma y’imyaka myinshi bari mu bibazo.

Izi mpunzi zageze muri Libya zishakisha uko zakwerekeza ku mugabane w’u Burayi aho zizeraga kubaho neza, kwambuka inyanja ya Méditerranée byaranze ziguma muri Libya ndetse zitangira kugirirwa nabi kugeza ubwo u Rwanda rwamenye ubuzima zibayemo rukiyemeza kuzitabara.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza