00:00:00 IGIHE NETWORK KN KINYARWANDA EN ENGLISH FR FRANCAIS

Impunzi z’Abanye-Congo zatanze impuruza ku kaga kazabyarwa n’umubano wa FDLR na FARDC

Yanditswe na Ferdinand Maniraguha
Kuya 19 Ukuboza 2022 saa 04:27
Yasuwe :

Inkambi ya Kiziba mu Karere ka Karongi mu Burengerazuba bw’u Rwanda, ni imwe mu za mbere zikuze zagezemo impunzi z’abanye-Congo mu 1996 ubwo bahungaga ubwicanyi bwibasiraga Abatutsi muri Kivu y’Amajyaruguru n’iy’Amajyepfo.

Mu mwaka wa 2019 icyizere cyari cyose ko bagiye gusezera imyaka isaga 20 y’ubuhunzi ubwo Perezida Felix Tshisekedi yajyaga ku butegetsi muri Congo, icyakora nyuma y’imyaka itatu icyo cyizere cyamaze kuyoyoka ndetse bavuga ko hatagize igikorwa benewabo basigaye muri Congo bashobora gutsembwa burundu.

Ubwo bwoba bwa Jenoside yibasiye Abatutsi iri gututumba muri Congo, nibwo bwatumye izi mpunzi zisaga ibihumbi 19 mu nkambi ya Kiziba kuri uyu wa Mbere tariki 19 Ukuboza 2022 zigaragambya, zisaba amahanga gushyira igitutu Leta ya RDC igahagarika ubwicanyi bwibasiye Abatutsi.

Abicwa ni abavuga Ikinyarwanda bo mu bwoko bw’Abatutsi, bashinjwa kuba ari Abanyarwanda cyangwa ibyitso bya M23, bigakongezwa n’imvugo z’urwango z’abanyapolitiki bo muri icyo gihugu.

Mariam umaze umwaka umwe mu nkambi ya Kiziba waganiriye na IGIHE, yavuze ko umuzi w’ikibazo cy’umutekano muke mu Burasirazuba bwa Congo ukunze kwirengagizwa.

Uyu mugore utari Umututsi wahunze gusa kuko yahigwaga azizwa inshuti z’Abatutsi, yagize ati “Umutekano muke hariya uterwa n’imitwe yitwaje intwaro myinshi kandi iyo mitwe njye sinyibonaho amakosa, kuko umutekano muke batubwira ko watangiye mu Burasirazuba bwa Congo mu 1994 […] Abaturage, umuryango mpuzamahanga, Interahamwe byose byarivanze kugeza uyu munsi ntibarashobora kwitandukanya. Interahamwe zafashe umwanya uhagije wo kwigisha uko bafata abagore ku ngufu, uko bica, uko bakubita abana ku bikuta n’ibindi bibi byose.”

Yakomeje agira ati “Ntabwo ndamenya igihango Mobutu yanywanye na Habyarimana kugeza ubwo abagize FDLR barindirwa umutekano kurusha abanye-Congo. Perezida Tshisekedi uyu munsi uhagarariye Congo na we yiyemeje gutera icyuhagiro FDLR , akemeza ko itakiri ikibazo. Kugeza ubu yabaye umuvugizi wa FDLR.”

Umutwe wa FDLR umaze igihe ushyirwa mu majwi gufatanya n’Ingabo za Congo (FARDC) n’indi mitwe ikorera mu Burasirazuba bw’igihugu, guhiga Abatutsi, kubagirira nabi no kubica.

Hari raporo y’Intumwa y’Umunyamabanga Mukuru wa Loni ishinzwe kurwanya Jenoside, iherutse kujya hanze itanga impuruza ko ubwicanyi buri kwibasira Abatutsi muri RDC, buganisha kuri Jenoside.

Igihugu cyarapfuye, ni umurambo…

Mariam na we yemeza ko hashobora kuba hari ikintu cyihishe inyuma y’imikoranire ya FDLR na Leta ya Congo.

Ati “Umwanzi wacu ni FDLR, kuki Congo itabareka ngo bagende? Niba hari amasezerano y’ibanga basinye tutazi, mubirukane bajye mu Rwanda bave mu Burasirazuba cyangwa mubajyane muri Equateur ahari imva ya Habyarimana.”

Mpayukuri Kayira umaze imyaka 20 mu nkambi ya Kiziba, yavuze ko ubwicanyi bwibasiye Abatutsi muri RDC buherutse kugera kuri mukuru we wari mu gisirikare cya Congo, wishwe azira uko yavutse.

Ati “Major Kaminzobe turavukana, ni uw’ingabo za Leta ariko yishwe na Leta. Leta yahagarariye abaturage baramwica, baramutwika baramurya. N’ubu uku uri kumfotora baravuga bati kiriya nacyo nikiza tuzarya, iyi nda tuyimare.”

Mpayukuri wahungiye mu Rwanda afite imyaka 38, avuga ko mbere ya Jenoside yakorewe Abatutsi muri Mata 1994, bari babanye neza n’andi moko atuye icyo gihugu.

Ati “Ubugome babutojwe n’Interahamwe na FDLR. Ku ngoma ya Mobutu twari tubanye neza, yego baribaga ariko ntibicaga none ubu Guverinoma ntihari, igihugu cyarapfuye ni umurambo.”

Ruhorimbere Alexis yageze mu Rwanda ari umwana none ubu yasoje Kaminuza akiri mu nkambi y’impunzi.

Akenshi muri Congo imvugo z’abanyepolitiki baho bagaragaza ko abiyita ko ari impunzi zivuga Ikinyarwanda ari Abanyarwanda badafite uburenganzira bwo kurwanira kuba Abanye-Congo.

Nubwo Ruhorimbere Congo ayizi igice kuko imyaka myinshi yayibayemo mu buhunzi, avuga ko kubatwerera ubwenegihugu bw’amahanga bitazababuza guharanira gusubira iwabo mu gihe amahanga yakomeza kurebera.

Ati “Ntabwo Leta ya Congo ariyo itugira Abanyarwanda […] Ntabwo ururimi umuntu avuga arirwo rumuha ubwenegihugu. Turi abanye-Congo, twasanze ba data na ba mama barakivukiyemo, niyo mpamvu Leta ya Congo yibeshya cyane kutwita Abanyarwanda. Iyo tuza kuba Abanyarwanda uyu munsi ntabwo tuba turi mu nkambi y’impunzi, tuba twaratujwe mu midugudu, turi mu miyoborere nk’abandi baturage.”

Aba baturage basabye umuryango mpuzamahanga ubuvugizi kugira ngo ubwicanyi bukorerwa benewabo muri buhagarare kandi bafashwe gusubira mu gihugu cyabo.

Mpayukuri ati “Byanga bikunda tuzataha kandi tuzagira icyo tuzakora. Loni turabasaba guhaguruka no gukumira buriya bwicanyi, ntibarebere nkuko barebeye mu Rwanda abantu bagashira.”

Izi mpunzi z’abanye-Congo zigaragambije nyuma ya bagenzi babo bo mu nkambi za Kigeme, Mugombwa na Mahama bose bamaze iminsi basaba ko Guverinoma ya Congo ihagarika ubwicanyi bwibasiye benewabo no kubafasha gutahuka.

U Rwanda rucumbikiye impunzi zisaga ibihumbi 70 z’abanye-Congo zirimo izahageze bwa mbere mu 1996.

Izi mpunzi zagaragaje ko umubano wa FDLR na Guverinoma ya RDC ari kimwe mu bituma bagirirwa nabi
Bamwe bari bafite ibyapa bigaragaza ko ubuzima bw'Umututsi muri RDC bugeramiwe
Bigaragambije basaba ko bafashwa umutekano ukagaruka iwabo, batahuka
Izi mpunzi zasabye umuryango mpuzamahanga kugira igikorwa kugira ngo ubwicanyi bwibasiye Abatutsi muri RDC buhagarare

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .