Impunzi 123 ziturutse muri Libya zageze mu Rwanda (Amafoto)

Yanditswe na Rabbi Malo Umucunguzi
Kuya 11 Ukwakira 2019 saa 01:50
Yasuwe :
0 0

Guverinoma y’u Rwanda yakiriye icyiciro cya kabiri cy’impunzi zaturutse muri Libya, aho kuri iyi nshuro rwakiriye 123, bageze mu Rwanda basanga abandi 66 bahasesekaye mu kwezi gushize.

Impunzi 123 zavanwe muri Libya zageze ku Kibuga Mpuzamahanga cy’Indege cya Kigali i Kanombe ahagana saa Sita n’igice zo kuri uyu wa Gatanu.

Ku wa 10 Nzeri 2019 nibwo Guverinoma y’u Rwanda, Umuryango wa Afurika Yunze Ubumwe (AU) na UNHCR, bashyize umukono ku masezerano y’ubufatanye, azatuma iki gihugu cyakira impunzi zizaturuka muri Libya, zahageze zishakisha amayira yazambutsa Méditerranée zikagera i Burayi.

Aya masezerano azatuma rwakira impunzi zigera kuri 500 yasinyiwe i Addis Ababa ku cyicaro cya AU, nyuma y’ubushake Perezida Paul Kagame yagaragaje bw’uko u Rwanda rwakwakira izi mpunzi z’Abanyafurika.

Mu mpunzi 123 zageze mu Rwanda harimo ab’igitsina gabo 99 na 24 b’igitsina gore. Harimo abagera kuri 59 batarageza imyaka y’ubukure. Bakomoka mu bihugu bitatu bitandukanye, harimo 106 bava muri Eritrea, 15 bava muri Somalia na babiri bakomoka muri Sudani.

Nk’uko Minisiteri Ishinzwe Ibikorwa by’Ubutabazi, Minema, yabitangaje kuri Twitter, na bo "bazacumbikirwa mu nkambi y’agateganyo ya Gashora iherereye mu Karere ka Bugesera, ari naho itsinda ry’impunzi 66 zahageze mbere zicumbikiwe."

Ubwo kuri uyu wa Gatatu yafunguraga ku mugaragaro Ihuriro ry’Urubyiruko rusaga ibihumbi 10 rwaturutse hirya no hino rizwi nka YouthConnekt Africa muri Kigali Arena, Perezida Paul Kagame yagarutse ku mpamvu zagejeje ku cyemezo cyo kwakira izi mpunzi.

Umukuru w’igihugu yavuze ko ku birebana n’izi mpunzi, ikibazo cyazo byagaragaraga ko gishobora gukemurwa mu nzira eshatu.

Yavuze ko inzira ya mbere ari uko izo mpunzi niba harimo abashakaga gukomeza kujya ku Mugabane w’u Burayi ariko bakaba barafashwe, bafashwa bagahabwa ahantu hari umutekano mu gihe hari abantu barimo kubashakira uko bajya mu Burayi.

Ati “Twaravuze ngo aho kugira ngo bakomeze bicirwe hariya, bashobora kuza hano noneho mugakorana n’u Burayi, ibyo bihugu bikaba byaza bigahitamo abo bishaka kwakira natwe tukabareka. Icya kabiri, twaravuze ngo kuri abo bashaka cyangwa bumva batakomeza ku Mugabane w’i Burayi cyangwa bakaba bumva bashaka gusubira aho baturutse, twavuze ko nabo baza tukabashakira ahantu heza baba noneho tugakorana n’ibihugu byabo bakaba basubizwayo mu gihe babyifuje kandi biciye mu mucyo.”

Perezida Kagame yavuze ko inzira ya gatatu yari ko “niba badashaka gusubira aho bavuye bakaba bashaka kugumana natwe, nta kibazo tuzagumana, tuzabaha ibyo bakeneye byose nk’uko tubiha abaturage bacu, ntabwo twabaha byinshi kubera ko tudafite byinshi, ariko ibyo dufite byose turabisangira, ubwo nibwo buryo ibi bintu byateguwemo.”

Yavuze ko kugeza ubu buri gihugu cyabikora mu gufasha gukemura iki kibazo, agaragaza ko ibyo u Rwanda rwakoze bitari ukugira ngo rushimwe cyangwa ngo hagire ugira icyo yishyura.

Icyiciro cya kabiri cy'impunzi ziturutse muri Libya cyageze mu Rwanda
Impunzi 123 ziturutse muri Libya zageze mu Rwanda
Mu mpunzi 123 zageze mu Rwanda harimo ab’igitsina gabo 99 na 24 b’igitsina gore
Abakozi b'Ishami ry'Umuryango w'Abibumbye ryita ku Mpunzi (UNHCR) baganira ubwo hakirwaga impunzi zivuye muri Libya
Bahise bashyirwa mu modoka zerekeza i Gashora aho bazacumbikirwa by'agateganyo
Mu mpunzi zageze mu Rwanda harimo abagera kuri 59 batarageza imyaka y’ubukure
Imizigo yabo yabitswe neza mbere yo kwerekeza mu Karere ka Bugesera aho bazacumbikirwa by'agateganyo
Umwe mu bana wavanywe muri Libya ari kumwe n'umukozi wa UNHCR

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza