Impungenge ku masomo ashobora kuzimira muri Kaminuza y’u Rwanda

Yanditswe na Ferdinand Maniraguha
Kuya 8 Ukuboza 2018 saa 09:52
Yasuwe :
0 0

Nta gikozwe, amwe mu masomo y’indimi n’ubugeni ashobora kuzimira mu minsi ya vuba muri Kaminuza y’u Rwanda.

Hari mu gitondo ahagana saa yine ubwo ninjiraga muri Kaminuza y’u Rwanda ishami rya Huye mu nyubako zizwi nka Ex-Rectorat.

Niho higira abanyeshuri biga amasomo y’Ubugeni n’Indimi (Arts and Languages) ndetse n’abiga Itangazamakuru n’itumanaho.

Mu ishuri rimwe ryo mu mwaka wa mbere mu bugeni n’indimi, nasanzemo abanyeshuri batanu barimo batatu boherejwe kwiga ubuhanzi (Creative Industry) na babiri biga ubuvanganzo n’indimi.

Ubwoba ni bwose kuri abo banyeshuri ko kubera ubuke bwabo ndetse hari amakuru ko bagiye kuvangwa n’abiga Isemurandimi (Translation) kugira ngo babe benshi.

Umuyobozi w’Ishami ry’Ubugeni n’Indimi, Dr Rudacogora Augustin yavuze ko umubare w’abanyeshuri bakira buri mwaka ukomeje kugabanyuka cyane.

Mu myaka mike ishize, Guverinoma y’u Rwanda yatangiye guha amahirwe menshi abiga amasomo y’ubumenyi n’ikoranabuhanga, nka bimwe mu bizafasha igihugu kugera ku iterambere ryihuse.

Ibyo byatumye n’umubare w’abanyeshuri bemerewa inguzanyo muri Kaminuza, abenshi baba abagiye kwiga ayo masomo agezweho.

Ibyo bituma ababyeyi bafite abana birihira banga kubazana, bavuga ko batatakaza amafaranga menshi ku masomo atagezweho nk’ay’ubugeni n’indimi.

Dr Rudacogora avuga ko byabagizeho ingaruka ku buryo hadafashwe ingamba bazisanga hari amasomo atakigishwa muri Kaminuza.
Ati “Numva Guverinoma bitabaye ngombwa ko ihindura ibikenewe cyane, yaha amahirwe umubare runaka w’abanyehsuri bakajya mu masomo agaragara nk’ari gukendera kuko nyuma hazabaho icyuho bizagorana gusiba.”

Mu ishami ry’ubugeni n’indimi harimo abanyeshuri 91, barimo 16 bo mu cyiciro cya gatatu bazasoza amasomo uyu mwaka.

Kugabanyuka kw’abanyeshuri biri no mu banyeshuri biga Amateka. Umwaka ushize, nta munyeshuri n’umwe wigeze aza kwigamo mu mwaka wa mbere.

Umuyobozi wa Kaminuza y’u Rwanda Ishami rya Huye, Dr Ruvebana Etienne yabwiye IGIHE ko kugabanyuka kw’abanyeshuri biga indimi n’amateka, byatumye n’abarimu batangira gucika intege.

Ati “Ubu bitugiraho ingaruka cyane. Abarimu bacu usanga badafite amasaha yo kwigisha yuzuye, bikabashyira no mu gihirahiro bavuga bati ‘ Niba tudafite amasaha yuzuye ejo n’ejobundi baradusezerera kuko ntacyo tuzaba dukora’, ugasanga benshi batangiye no kuducika.”

Ruvebana avuga ko nubwo amasomo y’ubumenyi n’ikoranabuhanga akenewe cyane, indimi n’amateka nabyo bidakwiriye kwirengagizwa.

Ati “ Iyo wize ikintu ukunda, bigufasha no kugicengera. Urabona nk’igihugu cyacu n’amateka cyanyuzemo, ntabwo ari cyo cyakabaye kitagira abantu biga amateka kuko dufite amateka ahambaye akeneye kugira abantu bazakomeza kuyarinda no kuyigisha abanyamahanga. Tugira inama mpuzamahanga, ntabwo kujya duhora tujya gushakisha abantu bo hanze twishyura amafaranga atagira ingano baza kudusemurira ari byo twifuza.”

Iki giharahiro cyatumye n’abanyeshuri biga badatuje, by’umwihariko abaje mu mwaka wa mbere.

Maniraguha Pauline yiga mu mwaka wa mbere ibyitwa Arts and Creative Industry. Yabwiye IGIHE ko amakuru abageraho ari uko bagiye kwimurirwa mu masomo y’Isemurandimi kuko ari bake kandi batabishaka.
Ati “Ntabwo tubishaka kuko twe twavuye iwacu tuje kwiga Arts and creative industry. Umuntu aba yarabihisemo afite ibyo agenderaho bitewe n’inzozi aba afite n’ibyo yiyumvamo.”

Umuyobozi Mukuru w’Inama Nkuru y’Amashuri Makuru na za Kaminuza, Dr Muvunyi Emmanuel yagiriye inama Kaminuza za Leta gushyira imbaraga nyinshi mu kumenyekanisha porogaramu nk’umuti urambye w’icyo kibazo.

Yagize ati “Porogaramu zigomba gutezwa imbere kuko abanyeshuri benshi biga mu mashuri yigenga baririhira ariko bakaziga kandi atari iz’ubumenyi n’ikoranabuhanga. Kaminuza zisabwa gushyiraho uburyo bwinshi bwo kumenyekanisha porogaramu, zigahera no hasi mu mashuri yisumbuye kugira ngo abana barimo barangiza mu mashuri yisumbuye bamenye porogaramu zitandukanye.”

Icyakora, Dr Rudacogora yabwiye IGIHE ko imbogamizi bafite kugira ngo bajye kumenyekanisha izo porogaramu ari ingengo y’imari.

Ntabwo byadukundiye kuvugana na Minisiteri y’Uburezi, icyakora Ruvebana yavuze ko ikibazo cyabo bagishyikirije ubuyobozi bukuru bwa Kaminuza kandi ngo babijeje kukigaho.

Basaba ko mu gihe hatangwa inguzanyo zo kwiga Kaminuza, hagira umubare runaka w’abanyeshuri bazihabwa bakoherezwa mu masomo arimo gukendera.

Mu mwaka wa 2017, mu banyeshuri bose bigaga mu mashuri makuru na za Kaminuza mu Rwanda, abigaga ibijyanye n’ubugeni n’ubumenyamuntu banganaga na 3 %.

Mu banyeshuri barangije mu mashuri makuru na Kaminuza bya Leta mu mwaka w’amashuri 2014/2015, mu bijyanye n’ubugeni n’ubumenyamuntu bari 503 naho mu 2015/2016 baba 212.

Mu kwezi gushize, ubwo abarangije muri Kaminuza y’u Rwanda uyu mwaka bahabwaga impamyabumenyi, abarangije mu bugeni n’ubumenyamuntu mu byiciro byose bari 465 bingana na 6.6% by’abarangije bose.

Iri shuri ryo mu mwaka wa mbere ryigamo abanyeshuri batanu gusa

Amafoto: Cyuzuzo Rodrigue


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza