00:00:00 IGIHE NETWORK KN KINYARWANDA EN ENGLISH FR FRANCAIS

Impungenge ku igabanuka ry’igiciro cya macadamia ku isoko mpuzamahanga

Yanditswe na Nsanzimana Erneste
Kuya 20 Mutarama 2023 saa 01:29
Yasuwe :

Abahinzi ba macadamia mu Rwanda bavuga kuri ubu bari gushaka uko bahangana n’igiciro cya macadamia cyagabanutse ku isoko mpuzamahanga kuko igiciro cyayo kitajyanye n’agaciro ifite mu kurinda ubuzima bw’abantu indwara by’umwihariko izitandura.

Igiciro cya madacamia idatunganyije cyaragabanutse kigera ku mafaranga hagati ya 800Frw na 1300Frw ku kilo, mu gihe mbere ya covid-19 cyaguraga 2000Frw.

Macadamia ni igihingwa kimaze imyaka 40 gihingwa mu Rwanda kuko cyahageze mu 1980. Ikigero Abanyarwanda bayiryaho kiracyari hasi cyane nubwo inzobere zigaragaza ko ifite akamaro kanini ku buzima bw’umuntu.

Magingo aya u Rwanda rwohereza mu mahanga toni zirenga 400 z’umusaruro wa macadamia, ibintu abahinzi bayo babonamo ikibazo kuko ifite intungamubiri u Rwanda rwakabaye rwifashishwa mu kurwanya igwingira n’indwara zitandura.

Macadamia ni igiti kijya kumera nk’umwembe cyera utubuto watumena imbere ugasangamo akantu k’umweru uhekenya ukumva gafite icyanga cy’ubunyobwa.

Mu Rwanda habarurwa ibiti bya macadamia birenga ibihumbi 268 biteye ku buso bwa hegitari zirenga 1300.

Inzobere mu bijyanye n’imirire zigaragaza ko macadamia irimo amoko arindwi ya vitamini, ikabamo n’amoko arindwi y’imyunyu ngungu.

Ndagijimana Nicholas umaze imyaka 17 ahinga akanakora ubushakashatsi kuri macadamia, yabwiye IGIHE ko ubunyobwa bwayo bukize ku ntungamubiri nyinshi zishobora kwifashishwa mu kurwanya igwingira.

Ati "Uriye macadamia ntabwo wagwingira kubera ko ibiyigize, biruta ibiboneka mu mata, isambaza n’inyama. Iyo uriye garama 20 za macadamia wumva uhaze mu gihe umuntu arya ibigori amasaha n’amasaha atarahaga kuko umubiri uba utarabonamo ibyo ukeneye".

Yavuze ko iki gihingwa ari inshuti y’umutima kuko amavuta yayo arwanya ibinure bigira uruhare mu kwifunga kw’imitsi.

Ati "Abantu bazihinga ndabashishikariza ko nabo bayirya bakereka abandi ko bishoboka.”

Kugeza ubu mu Rwanda hari inganda eshatu zitunganya umusaruro wa macadamia zirimo ebyiri z’abanyamahanga na rumwe n’Umunyarwanda.

Madacamia itunganyije igera mu bihumbi 20Frw ku kilo. Ikilo cya Macadamia idatunganyije kiva mu bilo 4 cyangwa 5 bya macadamia idatunganyije.

Nsabimana Stanley, Umuyobozi w’Umuryango Nyarwanda w’Abahinzi ba macadamia (Macadamia Society of Rwanda) avuga ko bahanze amaso isoko ryo mu Rwanda kurenza isoko mpuzamahanga.

Ati “Icyo tugamije ni ukwereka Abanyarwanda ibyiza byo kurya macadamia kuko muri iki gihe Isi yugarijwe n’ikibazo cy’indwara zitandura, kandi macadamia igabanya ibinure bya cholesterol bigira uruhare mu kongera indwara z’umutima”.

Ikigo cy’Igihugu gishinzwe iyoherezwamuhanga ry’umusaruro w’ubuhinzi n’ubworozi NAEB cyatangarije IGIHE ko igabanuka ry’igiciro cya macadamia ryatewe n’impamvu zinyuranye zirimo ihungabana ry’ubukungu bw’Isi mu gihe cya COVID-19 no kuba umusaruro wa macadamia mu Bushinwa wariyongereye cyane.

U Bushinwa ni kimwe mu bihugu bigura kandi bikoresha umusaruro mwinshi wa macadamia ku Isi. Iyo umusaruro wabo uri hejuru, ibiciro by’uturuka ahandi biragabanuka.

NAEB igira abahinzi inama yo gukorera neza macadamia bagashyiramo inyongeramusaruro zikwiriye kandi bakayirinda ibyonnyi mu rwego rwo kongera umusaruro kuri buri giti.

Ku mpuzandengo umusaruro w’igiti cya macadamia mu Rwanda ugeze ku biro 30 mu gihe hari ibihugu byeza ibilo 70 cyangwa 100 ku giti kimwe.

Leta y’u Rwanda yizeza abahinzi ba macadamia ko izakomeza gushishikariza abanyemari gushora imari mu guhinga no gutunganya umusaruro wa macadamia. Ibi bizatuma zigurishwa ku giciro kiri hejuru kuko kuyohereza iri mu bishishwa biri mu bituma igura make.

Abahinzi ba macadamia mu Rwanda berekeje amaso ku isoko ry'imbere mu gihugu
Abahinzi ba macadamia babangamirwa no kutagira uruhare mu kugena igiciro cyayo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .