00:00:00 IGIHE NETWORK KN KINYARWANDA EN ENGLISH FR FRANCAIS

Impundu n’impungenge mu muryango w’i Karongi uherutse kwibaruka abana batatu

Yanditswe na Nsanzimana Erneste
Kuya 31 Ukuboza 2022 saa 08:55
Yasuwe :

Umuryango wa Nyiransekanabo na Niyonsaba Athanase wo mu Kagari ka Nyamiringa, Umurenge wa Gitesi bari mu byishimo byo kwibaruka abana batatu bavukiye rimwe ku mbyaro yabo ya kane.

Ku wa 29 Ukuboza 2022 nibwo uyu mubyeyi n’abana be batatu basezerewe mu Bitaro bya Kibuye aho yabyariye bamubaze tariki 25 Ukwakira. Nyuma yo kubyara ntabwo yahise asezererwa mu bitaro kuko mu bana batatu yabyaye harimo babiri bari bagikeneye kwitabwaho by’umwihariko kuko bavukanye ibiro bike.

Nyiransekanabo n’umugabo we bari mu cyiciro cya gatatu cy’ubudehe, gusa agaragaza ko badafite ubushobozi nubwo bashyizwe muri iki cyiciro agashima ubuyobozi bw’Ibitaro bya Kibuye bwabitayeho mu gihe cy’amezi abiri babimazemo.

Ati “Dutunzwe no guca inshuro, nabaga mfite ikibazo cy’ukuntu nzajya gukorera abana ariko ibihembo abakozi b’ibitaro bampaye ndabyishimiye; ngiye gutaha nishimye bizamfasha gusunika iminsi”.

Nyiransekanabo avuga ko yashimishijwe bikomeye no kuba yarabyaye abana batatu icyarimwe.

Ati “Ubu tugize abana batandatu kuko twari dusanzwe dufite batatu. Twabyakiriye neza kuko nubwo ari umugisha uvanze n’ibibazo ariko icyo nasaba Leta ni uko yazaduha ubufasha kuko kurera abana batatu udafite ubushobozi ntabwo ari ibintu biba byoroshye”.

Niyonsaba avuga ko bakimenya ko bicaye bakaganira bakumvikana uburyo bagomba gutangira guteganyiriza abo bana batatu bagiye kubyara gusa ngo bitewe n’uko umubyeyi n’umwana bamaze amezi abiri mu bitaro ubuzima ntibuborohereye.

Uyu muryango wageze igihe cyo gutaha ufite ideni ry’ibihumbi 11 Frw ugomba kwishyura ibitaro ugaragaza ko ayo mafaranga ntayo ufite. Ubuyobozi bw’ibitaro byarebye umuhate uyu muryango washyize mu kwishyura ibitaro mu bushobozi buke ufite, biba ngombwa ko abakozi b’ibitaro bawunganira ku kwishyura iryo deni ndetse banawugurira ibikombe bitanu by’amata y’ifu abana bagomba gukomeza kunywa.

Ati “Ubushobozi dufite ni bukeya ariko umuntu abyakira uko bimeze, Dukeneye ubufasha bwo kunganira inshuro tuzaba twaciye kugira ngo aba bana babashe gukura neza”.

Uko bigenda bigenda ngo umubyeyi abyare abana batatu

Ukwigize Alphonsine ukuriye serivise yo kwita ku mpinja mu Bitaro Bikuru bya Kibuye yabwiye IGIHE ko kubyara abana batatu icyarimwe biterwa no kuba igi ryigabanyijemo ibice bitatu gusa ngo ntabwo bikunze kubaho kuko mu myaka 7 amaze ashinzwe iyi serivise amaze kubibona inshuro eshatu gusa.

Ati “Umuzenguruko w’inda irimo abana batatu uba utandukanye n’ubw’inda irimo umwana umwe. Ku Kigo nderabuzima barabibona, ikindi bashobora kumva uko umutima utera, iyo babyumva ntabwo bashobora kumva ko uwo mwana atari umwe, kimwe n’uko bashobora kuba bamukozeho bari gushakisha uko uwo mwana ameze mu nda niba yicaye, niba acuramye, ibyo byose biri mu bintu byatuma umenya ko atari umwana umwe urimo”.

Ku kigo nderabuzima iyo basanze umubyeyi atwite umwana urenze umwe bamwohereza ku bitaro kugira ngo ace mu cyuma.

Kimwe n’undi mubyeyi wese utwite, umubyeyi utwite abaganga bamubwira ibimenyetso mpuruza agomba kwitondera birimo kuba yumvise umwana atagikina mu nda bakamusaba kwihutira kujya kwa muganga igihe yumvise ikibazo kidasanzwe.

Ukwigize avuga ko umubyeyi ubyaye inshuro zirenze imwe ahobora gukeka ko atwite abana barenze umwe kuko uko inda iba ingana ku mubyeyi utwite umwana umwe atari ko iba ingana ku mubyeyi utwite abana barenze umwe.

Ibitaro bya Kibuye byasabye uyu mubyeyi kuza ku bitaro mu gihe yiteguraga kubyara, bimukurikiranira hafi, bibonye inda igize ibyumweru 37 abaganga baramubaga abana bose uko ari batatu kugeza ubu ni bazima kandi bafite ubuzima bwiza nubwo harimo abavukanye ibiro bike nabo ibiro byabo biri kwiyongera.

Umuyobozi Mukuru w’Ibitaro bya Kibuye Dr Ayingeneye Violette yavuze ko muri izi mpera z’umwaka wa 2022 bahisemo guhemba umuryango wa Niyonsaba wabyaye abana batatu, mu gikorwa ngarukamwaka cyo kwifatanya n’abarwayi mu minsi mikuru isoza umwaka.

Muri iki gikorwa abarwayi by’umwihariko abadafite ababagemurira bagenerwa amafunguro bakayasangira n’abakozi b’abayobozi b’ibitaro mu rwego rwo kubafasha kwishima mu minsi mikuru isoza umwaka nk’uko biba birikugenda hirya no hino mu miryango.

Ibitaro byashimiye uyu muryango wibarutse abana batatu
Umuryango wishimiye kubyara abana batatu
Bahawe amata yo gufasha umubyeyi n'abana ariko haracyakenewe ubundi bufasha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .