Impinduka muri za Ambasade: Col Rutabana yagizwe Ambasaderi w’u Rwanda muri Uganda, Mironko Fidelis muri Turikiya

Yanditswe na Philbert Girinema
Kuya 26 Nzeri 2020 saa 05:30
Yasuwe :
0 0

Inama y’Abaminisitiri yashyizeho abayobozi batandukanye muri za Ambasade z’u Rwanda hirya no hino, aho nka Col Rutabana Joseph yagizwe Ambasaderi w’u Rwanda muri Uganda mu gihe Mironko Fidelis we yagizwe Ambasaderi w’u Rwanda muri Turikiya.

Col. Joseph Rutabana yari asanzwe ari Ambasaderi w’u Rwanda muri Israel, umwanya yagiyeho mu 2015. Muri Uganda agiye gusimbura Gen Maj (Rtd) Frank Mugambage uherutse gusoza manda ye nyuma y’imyaka 11 ahagarariye u Rwanda muri iki gihugu.

Mironko Fidelis wagizwe Ambasaderi w’u Rwanda muri Turikiya we yari asanzwe muri dipolomasi y’u Rwanda kuko yari Umujyanama wa Mbere muri Ambasade y’u Rwanda i Londres ashinzwe ibijyanye na politiki. Usibye izo nshingano, by’umwihariko yari ashinzwe ibijyanye n’uburezi ndetse n’ishoramari.

Kuri uwo mwanya asimbuye Williams Nkurunziza wari umaze imyaka ine ari Ambasaderi w’u Rwanda muri Turikiya aho yoherejwe nawe avuye mu Bwongereza nka Ambasaderi.

Usibye aba bagizwe ba Ambasaderi, hari abandi bahawe inshingano zo kuba abajyanama ba Kabiri n’aba Mbere muri Ambasade ndetse n’abahawe kungiriza Ambasaderi mu gihugu, umwanya witwa Minister-Counsellor.

Muri dipolomasi, Minister-Counsellor niwe aba ari umuyobozi wa kabiri ukomeye muri Ambasade inyuma ya Ambasaderi uba uhagarariye igihugu.

Muri abo harimo nka Kayinamura Robert wagizwe Minister-Counsellor muri Ambasade y’u Rwanda i New York mu gihe Ngango Gatuku James we ari i Genève mu Busuwisi.

Wizeye James yagizwe Minister-Counsellor muri Ambasade y’u Rwanda mu Bwongereza mu gihe Buhungu Abel we yoherejwe muri Ambasade y’u Rwanda muri Sudani ku mwanya wa Minister-Counsellor.

Bagabo Isaïe we yagizwe Umujyanama wa Mbere muri Ambasade y’u Rwanda muri Ethiopia no mu Muryango wa Afurika yunze Ubumwe cyo kimwe na Opirah Robert nawe woherejwe muri Ethiopia kuri izo nshingano.

Matsiko Peter we yagizwe Umujyanama wa Mbere w’uhagarariye u Rwanda muri Loni mu gihe Nzabonimpa Serge yagizwe Umujyanama wa Mbere muri Ambasade y’u Rwanda muri Senegal.

Nyinawumuntu Marie Grace yagizwe Umujyanama wa Mbere muri Ambasade y’u Rwanda mu Bubiligi cyo kimwe na Bucyana Andre mu gihe Kabakeza Joseph yagizwe Umujyanama wa Mbere muri Ambasade y’u Rwanda mu Bwongereza.

Eya Nchama Blondine Uwimana we yagizwe Umujyanama wa Mbere muri Ambasade y’u Rwanda mu Bufaransa mu gihe Rubayita Eric we yoherejwe muri Ambasade y’u Rwanda mu Burusiya.

Kayijuka Frank we yagizwe Umujyanama wa Kabiri muri Ambasade y’u Rwanda muri RDC, mu gihe Buzizi Epiphanie we yoherejwe muri Tanzania nk’Umujyanama wa Kabiri.

Rubagumya Vianney yagizwe Umujyanama wa Kabiri muri Ambasade y’u Rwanda muri Nigeria mu gihe Kayoge Rutoni Eric we yagizwe Umujyanama wa Kabiri muri Ambasade y’u Rwanda muri Ethiopia.

Gakumba Douglas yagizwe Umujyanama wa Kabiri muri Ambasade y’u Rwanda muri Zambia, mu gihe Tubanambazi Edmond we yagizwe Umujyanama wa Kabiri muri Ambasade y’u Rwanda mu Busuwisi no muri Loni i Genève naho Kaze Ornella agirwa Umujyanama wa Kabiri muri Ambasade y’u Rwanda mu Bufaransa.

Abandi bahawe inshingano zo kuba abajyanama ba kabiri muri Ambasade z’u Rwanda hirya no hino harimo Ntageruka Charles woherejwe muri Ambasade y’u Rwanda muri Leta Zunze Ubumwe za Amerika; Irakoze Prosper mu Buhinde, Mukayiranga Beata muri Congo mu gihe Mutesi Stella we yagizwe Umujyanama wa Mbere muri Ambasade y’u Rwanda muri Mozambique.

Ni cyo kimwe na Nikuze Nkusi Epiphanie wagizwe Umujyanama wa Mbere muri Ambasade y’u Rwanda muri Zimbabwe na Mukama Jean Hugues mu Buholandi mu gihe Kayitesi Ornella we ari muri Ambasade y’u Rwanda muri Singapore.

Murezi Lucas yagizwe ushinzwe ubukungu muri Ambasade y’u Rwanda muri Turikiya mu gihe Rutishisha Mucyo we yagizwe ishami ry’Amajyaruguru n’Uburengerazuba bwa Afurika muri Minisiteri y’Ububanyi n’Amahanga.

Col Rutabana Joseph yagizwe Ambasaderi w’u Rwanda muri Uganda
Mironko Fidelis yagizwe Ambasaderi w’u Rwanda muri Turikiya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .