Impamvu umushinga wo kuvugurura Gare ya Nyabugogo wadindiye

Yanditswe na Evariste Nsengimana
Kuya 16 Mutarama 2020 saa 08:09
Yasuwe :
0 0

Ubuyobozi bw’Umujyi wa Kigali bwatangaje ko igishushunyo mbonera cyo kuvugura Umujyi wa Kigali cyakozwe mbere kitagaragaraza uburyo bwo kurengera ibidukikije birimo ibyatsi biri hagati y’imihanda bibangamirwa n’abanyamaguru n’uburyo bwo kurwanya ibiza, biri mu byatumye uwo mushinga udatangirizwa igihe cyari giteganyijwe.

Mu Ugushyingo 2017, Umujyi wa Kigali watangaje ko ufite gahunda yo kuvugurura bigezweho Gare ya Nyabugogo, bikaba byaragombaga gushyirwa mu bikorwa na Sosiyete itwara abagenzi n’ibintu ya RFTC, ikuzura itwaye miliyari 45 z’amafaranga y’u Rwanda.

Gahunda yari ihari ni uko umushinga wagombaga gutangira mu 2018 ariko magingo aya Ubuyobozi bw’Umujyi wa Kigali bukomeza kugaragaza ko icyo kibazo kiri mu biwuhangakishije kandi buri gukora ibishoboka byose ngo gikemuke.

Umuyobozi wungirije w’Umujyi wa Kigali ushinzwe imiturire n’ibikorwa remezo, Dr Nsabimana Ernest, yabwiye IGIHE ko igishushanyo mbonera cyakozwe mbere cyari gifite inenge ziri gukosorwa.

Ati “Umushinga wo wabayeho ariko uko byagombaga kugenda ntabwo ariko byagenze. Wajemo ibibazo bya tekinike bituma usa n’aho usubiye inyuma ariko si ugusubira inyuma ngo uhagarare n’ubundi urimo urakosorwa ariko hari ibintu byongewemo.”

Mu gukosora igishushanyo mbonera cya Gare ya Nyabugogo hagomba kurebwa by’umwihariko ku kibazo cy’umwuzure ukunze kwibasira iyi gare isa n’aho iri mu gishanga ku buryo amazi aturuka mu bice bitandukanye atazajya asenderamo ngo abangamire urujya n’uruza.

Ibi ngo ntabwo igishushanyo mbonera cya mbere cyakozwe cyagaragazaga uko bizakorwa.

Mu buryo iki kibazo kizakemurwa, hazagurwa ruhurura ya Mpazi iri mu zigira uruhare runini mu guteza umwuzura muri aka gace. Uyu mushinga ushobora gutangira muri Gashyantare uyu mwaka bigizwemo uruhare n’Umujyi wa Kigali ufatanyije n’Ikigo gishinzwe amazi n’amashyamba ‘RWAFA’ ku nkunga y’Umuryango w’Ubumwe bw’Ibihugu by’u Burayi,

Ati “Ibyo rero byose ni ibintu umushinga wa mbere utari waratekerejeho kugira ngo bijyemo. Ikindi cyatumye umushinga uhindurwa, urabona urujya n’uruza hariya, abantu banyura hirya no hino ndetse na buriya busitani bwo mu mihanda hagati baraburibase. Hari umushinga wo gushyiraho ibiraro bica hejuru abantu bazajya bambukiraho.”

Uwo mushinga uzakorerwa ku bice by’imihanda ikikije Gare ya Nyabugogo nawo hari kurebwa uburyo utazabangamira ibikorwa byo kuvugurura gare. Ati“Mbere rero ibyo byose ntabwo byari byaratekerejweho.”

Umujyi wa Kigali unavuga ko uri kureba uburyo abikorera bagira uruhare rufatika mu mushinga wo kuvugurura iyi gare kugira ngo ujyane n’igihe.

Ati “Kuvuga ngo umushinga uzatangira ryari biterwa n’igihe inyigo irangiriye no gukusanya amafaranga yo kubikora. Turimo kureba ko nibura uyu mwaka warangira byibura inyigo irangiye atari ukuvuga ngo irakozwe iki kiraburamo.”

“Inyigo irangiye kare ntacyawubuza gutangira, ni ibintu Umujyi wa Kigali ushyizemo imbaraga n’abafatanyabikorwa bawo.”

Kuvugura gare nibitangira imodoka zizerekezwa he?

Dr Nsabimana yavuze ko igihe cyo kuvugurura Gare ya Nyabugogo ibinyabiziga n’abagenzi batazaba bayikoresha, Umujyi wa Kigali uteganya kureba ahantu hisanzuye imodoka zazajya ziparika by’agateganyo ariko ko hatatangazwa hataremezwa neza.

Yavuze ko kubera izo mpinduka, ingengo y’imari yari yateganyijwe byanze bikunze izahinduka kubera ibintu byagiye biyikosorwamo.

Ahagana mu 1998 nibwo iyi gare yafunguwe, itangira kuba ihuriro ry’imodoka zose ziva cyangwa zijya muri Kigali. Uko iminsi yagiye yicuma, iyi gare yabaye ihahiro kuri benshi bayikoramo ibiraka bya buri munsi bakabona ibibateza imbere.

Kubaka inzira z’abanyamaguru zinyura mu kirere biri mu byadindije umushinga wo kuvugurura Gare ya Nyabugogo
Umuyobozi wungirije w’Umujyi wa Kigali ushinzwe imiturire n’ibikorwa remezo, Dr Nsabimana Ernest yavuze ko uyu mushinga ushobora gutangira umwaka utaha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .