00:00:00 IGIHE NETWORK KN KINYARWANDA EN ENGLISH FR FRANCAIS

Impamvu ubushinjacyaha butemera ibihano byahawe abaregwa hamwe na Rusesabagina

Yanditswe na Dufitumukiza Salathiel
Kuya 25 January 2022 saa 08:07
Yasuwe :

Ubushinjacyaha bwanenze kuba hari abagabanyirijwe ibihano muri 20 bareganwa iterabwoba hamwe na Paul Rusesabagina wa MRCD/FLN, nubwo bireze ibyaha cyangwa ari ubwa mbere bakurikiranywe.

Byavugiwe mu iburanisha ryo mu Rukiko rw’Ubujurire ryabaye kuri uyu wa 24 Mutarama 2021, ryibanze ku bihano abaregwa bahawe.

Ubushinjacyaha bwifuza ko ibihano bizamurwa naho abaregwa bakifuza ko bigabanywa.

Nsengimana Herman (wabaye umuvugizi wa FLN, Nsabimana Callixte wiyise Sankara amaze gufatwa), Kwitonda André, Nshimiyimana Emmanuel, Ndagijimana Jean Chrétien na Hakizimana Théogène basabiwe kongererwa igihano.

Ubushinjacyaha bwagaragaje ko butanyuzwe no kuba Urukiko Rukuru rwarabagabanyirije igihano rushingiye ku kwirega kwabo kandi batarigeze bemera icyaha.

Bwavuze ko kuri Nsengimana, Kwitonda, Nshimiyimana na Ndagijimana, Urukiko Rukuru rwabagabanyirije igihano rushingiye ku kuba hari ibyo barwemereye mu iburanisha mu mizi ry’urubanza, kandi atari ko bimeze mu myanzuro yabo n’inyandiko mvugo z’iburanisha.

Kuri Hakizimana, na we ngo ntiyakabaye yaragabanyirijwe igihano kuko mu myanzuro yakoze no mu miburanire ye yahakanye ibyaha aregwa, bityo kuvuga ko hari ibyo yemeye bikaba binyuranya n’ukuri ku buryo bitashingirwaho.

Ubushinjacyaha bwasabye ko buri wese muri abo batanu ahanishwa igifungo cy’imyaka 20.

Bose barezwe ibyaha bibiri ariko bahamywa kuba mu mutwe w’iterabwoba gusa.

Ubushinjacyaha bwabwiye Urukiko ko ingingo ya 59 y’Itegeko riteganya ibyaha n’ibihano muri rusange idateganyiriza igabanya gihano ku ufite ibyo yemeye akagira ibindi ahisha, ahubwo iteganya igihano ku wemeye icyaha mu buryo budashidikanywaho.

Kuba baragabanyirijwe igihano, byagaragajwe nk’ikosa ry’Urukiko Rukuru.

Nsengimana Herman yavuze ko kugaragaza ko Urukiko rwibeshye ku gihano yahawe atari byo.

Yaregwaga kwinjira mu mutwe w’ingabo utemewe no kuba mu mutwe w’iterabwoba.

Yemeye ko yabaye muri FLN mu maburanisha ariko impaka zishingira ku kuba MRCD/FLN ari umutwe w’iterabwoba.

Yahamijwe ko yagiye muri FLN azi ko itemewe ariko akamenya ko ari Umutwe w’iterabwoba ari Ubushinjacyaha bubivuze, bityo ko yemeye ibikorwa ndetse Urukiko rukaba rwaragendeye ku bimenyetso byatanzwe.

Me Rugeyo Jean umwunganira,yabwiye Urukiko ko ibikorwa byose Ubushinjacyaha bwareze Nsengimana ko yakoreye muri FLN yabyemeye, akanabisabira imbabazi.

Kubyemera kwe, ngo ni na kimwe mu byo Ubushinjacyaha bwashingiyeho bumurega.

Yasobanuye ko Urukiko rwasanze bigize icyaha cyo kuba mu mutwe w’iterabwoba, bityo ko umwanzuro rwafashe nta makosa arimo.

Kwitonda André yabwiye Urukiko ko atigeze ahakana kuba muri FDLR/FOCA kandi ko yasobanuye uko yayigezemo ndetse no kwikuramo bikamunanira kubera imikorere yawo.

Me Mugabo Sharif Yusuf umwunganira yashimangiye ko yemeye ibyo yarezwe kandi amategeko ateganya ko agabanyirizwa igihano mu gihe yemeye icyaha.

Ndagijimana Jean Chrétien, Umuhungu wa Gen Irategeka Wilson wari Umuyobozi wa CNRD, yabwiye Urukiko rw’Ubujurire ko yemeye icyaha aregwa bityo ko yari akwiye koroherezwa igihano.

Yibukije ko yemeye ko yabaye muri FLN, avuga ko wenda icyo Ubushinjacyaha bwabaza ari ukuba uwo ari Umutwe w’iterabwoba kuko we ntabyo yari azi.

Ikindi ni uko yahatirijwe na Se kuwujyamo akiri umwana, ibintu Urukiko rwahaye agaciro bikaba impamvu nyoroshyacyaha.

Hakizimana Théogène na we yabwiye Urukiko ko atemeranya n’imvugo y’Ubushinjacyaha ko atemeye icyaha mu buryo budashidikanywaho, avuga ko guhera mu bugenzacyaha no mu bushinjacyaha, mu mabazwa yose yagiye yemera icyaha.

Me Mugabo yasabye Urukiko rw’Ubujurire kuzatandukanya imvugo Ubushinjacyaha bwakomatanyirije hamwe kandi harimo izigamije kwemera n’izigamije kuba batahanwa.

Nshimiyimana Emmanuel yagaragarije Urukiko ko mu maburanisha yose yemeye kuba mu mitwe aregwa ndetse agasobanura uko yayinjijwemo ku ngufu.

Umwunganizi we yashimangiye ko Urukiko Rukuru rwemeje ko yemeye ko yabaye mu mutwe w’iterabwoba aregwa kubamo, ariko ko rutemeye ku yawugiyemo ku gahato ari na byo yajuririye ku giti cye.

Undi wagarutsweho ni Mukandutiye Angelina, aho Ubushinjacyaha bwavuze ko yagombaga guhanishwa igifungo cy’imyaka 15 aho kuba itanu kuko atemera icyaha ahubwo ashaka kucyihunza, ndetse akaba atari ubwa mbere akurikiranywe kuko Inkiko Gacaca zamukatiye Burundu.

Uwo mukecuru w’imyaka 71 yavuze ko yemeye ko yabaye muri CNRD-Ubwiyunge ndetse agashishikariza abakobwa kujya mu gisirikare cyayo cyitwaga FLN kandi akaba muri MRCD, ariko ko nta bubasha yari afite ku bindi bikorwa by’uwo mutwe.

Ibyo yabihereyeho agaragaza ko ibyo Ubushinjacyaha buvuga nta shingiro bifite.

Abandi bagaragajwe n’ubushinjacyaha nk’abahawe ibihano bike ugereranyije n’ibyaha bakoze, bireguye bagaragaza ko ibyakozwe n’urukiko rukuru nta kibazo kirimo.

Ku wa 20 Nzeri 2021 ni bwo Urukiko Rukuru rwakatiye Paul Rusesabagina imyaka 25; naho Nsabimana Callixte alias Sankara, Nizeyimana Marc, Bizimana Cassien, Matakamba Jean Berchmans,Shaban Emmanuel,Ntibiramira Innocent, Byukusenge Jean Claude, na Nsabimana Jean Damascène bakatirwa imyaka 20 y’igifungo.

Nikuzwe Siméon yakatiwe imyaka 10; Nsanzubukire Félicien,Munyaneza Anastase,Hakizimana Théogène,Nsengimana Herman,Iyamuremye Emmanuel,Niyirora Marcel,Kwitonda André na Mukandutiye Angelina bakatirwa imyaka itanu.

Ntabanganyimana Joseph, Nshimiyimana Emmanuel na Ndagijimana Jean Chrétien bo bakatiwe imyaka itatu.

Uru rubanza rw’ubujurire rushingiye ahanini ku ku nyito y’ibyaha ababuranyi bahamijwe, ibyo bagizweho abere n’ibihano bahawe Ubushinjacyaha butemera.

Ku ruhande rw’abaregwa, 13 ntibemera ibihano bahawe.

Abaregera indishyi nabo bavuga ko hari abahawe nke hashingiwe gusa ku bushishozi bw’Urukiko, hakaba n’abataragize izo bahabwa.

Bamwe mu baregwa muri dosiye ya Rusesabagina ubushinjacyaha bwagaragaje ko butemera ibihano bahawe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .