00:00:00 IGIHE NETWORK KN KINYARWANDA EN ENGLISH FR FRANCAIS

Impamvu kurwanya inda ziterwa abangavu ari urugamba rwa bose

Yanditswe na Akayezu Jean de Dieu
Kuya 26 May 2022 saa 12:13
Yasuwe :

Ishami ry’Umuryango w’Abibumbye ryita ku mibereho myiza y’abaturage (UNFPA), Ishami ry’u Rwanda, ryagaragaje ko inda ziterwa abangavu ari intandaro y’ibibazo byinshi bikomeje kubangamira iterambere n’imibereho myiza y’abaturage by’umwihariko Abanyarwanda.

Ni ibyatangajwe kuri uyu wa Gatatu tariki 25 Gicurasi 2022, ubwo hamurikwaga Raporo ku Miterere y’abatuye Isi (State of World Population Report), ahagaragajwe ibibazo bibangamiye iterambere ry’abaturage muri rusange.

Ibiganiro byamurikiwemo iyo raporo byitabiriwe n’inzego zirimo izishinzwe ubuzima, uburinganire n’iterambere ry’umuryango, uburezi, amashami ya Loni akorera mu Rwanda ndetse n’abahagarariye ibihugu byabo mu Rwanda.

Baganiriye ku nsanganyamatsiko igira iti “Gushakira umuti ikibazo cy’inda ziterwa abangavu; duhuze imbaraga twongere ibikorwa.’ Abatanze ibiganiro bagarutse ku ngaruka zikomeye z’inda ziterwa abangavu haba kuri bo ndetse n’igihugu muri rusange.

Guverinoma y’u Rwanda yashyize imbaraga mu kurwanya inda zitateguwe yongera umubare w’abakoresha uburyo bugezweho bwo kuboneza urubyaro bavuye ku buryo bwa kamere, aho bavuye kuri 10% bakagera kuri 58% mu 2020.

Minisitiri w’Ubuzima, Dr. Ngamije Daniel yavuze ko ikibazo gikomeye igihugu gifite kugeza ubu ari icy’inda ziterwa abangavu kubera ko ubu zigera kuri 5%. Ni ukuvuga ko abana b’abakobwa batarageza imyaka 18, batanu mu 100 baterwa inda.

Yagaragaje ko mu kugabanya uyu mubare uri hejuru w’abana baterwa inda, bikomeje gukomwa mu nkokora n’amategeko, ubukene, kuva mu mashuri kw’abana b’abakobwa, imyumvire ishingiye ku myemerere n’umuco n’ibindi.

Yakomeje agira ati “Ibiganiro bidahagije hagati y’abana, ababyeyi n’abarimu, kuba abangavu batabasha kugera kuri serivisi zo kuboneza urubyaro […], icyuho mu bumenyi ku buzima bw’imyororokere n’izindi mpamvu.”

Minisitiri Ngamije yagaragaje ko kugira ngo u Rwanda n’Isi ibashe gutsinda uru rugamba rwo guhashya inda ziterwa abangavu, bisaba ubufatanye bwa bose.

Ati “Ni urugamba tugomba kujyanamo twese, abayobozi mu nzego zitandukanye, abihayimana, abafatanyabikorwa batandukanye n’imiryango itari iya leta.”

UNFPA yagaragaje ko mu bibazo byugarije Isi harimo icy’abangavu bagiterwa inda aho nibura umugore cyangwa umukobwa umwe muri bane akoreshwa imibonano mpuzabitsina atabishaka. Abo bagore usanga gutwita atari amahitamo yabo. Ibintu binakorerwa abangavu (ni ukuvuga abakobwa batarageza imyaka y’ubukure).

Umuyobozi wa UNFPRA mu Rwanda, Kwabena Asante-Ntiamoah, yavuze ko mu bihe byashize, ikibazo cy’inda zitateguwe cyangwa inda ziterwa abangavu cyakunze guharirwa abagore gusa ariko igihe kigeze ngo buri wese ku Isi akigire icye.

Ati “Abantu benshi bazavuga ko iki kibazo kitihutirwa, bavuge ko ibi ari ko byahoze. Kuki biteye ubwoba? Kuko tugomba kubihagurukira ubu? Igisubizo ni uko na mbere hose iki kibazo cyariho ariko cyaharirwaga abagore gusa cyangwa bikavugwa ko ari ibibazo by’abagore bonyine.”

Yakomeje agira ati “UNFPA irahamagarira Isi yose kumva ko inda zitateganyijwe atari ikibazo kireba abagore gusa ahubwo ari ikibazo cy’ubuzima, ikibazo cy’uburenganzira bwa muntu, ikibazo cy’ubumuntu n’iterambere. Ni ikibazo cy’Isi yose kandi kirahenze.”

Ubushakashatsi ku Buzima n’Imibereho y’Abaturage mu Rwanda, DHS, bwo mu 2019/2020, bwagaragaje ko hagati ya 2015-2020, abana 61% aribo bavutse barifuzwaga, mu gihe abandi 27% bavutse batateganyijwe naho 12% bavuga mu buryo butifuzwaga.

Muri ubu bushakashatsi hagaragajwe ko abagore bo mu Rwanda, ku mubare w’abana babyara haba hariho umwe wiyongeraho batateganyaga kubyara cyangwa batifuzaga.

Minisitiri w’Uburinganire n’Iterambere ry’Umuryango, Prof. Bayisenge Jeannette yavuze ko hari impamvu zitera izi nda zirimo kudaha ubushobozi abana b’abakobwa, kutabajyana mu mashuri ndetse n’ibindi birimo ihohoterwa rishingiye ku gitsina bakorerwa.

Ati “Twese uko duteraniye hano tuzi ko inda zitateguwe by’umwihariko iziterwa abangavu ziyongera iyo abakobwa batubakiwe ubushobozi mu kuba bakwifatira ibyemezo, iyo batabashije guhabwa uburezi cyangwa bagakorerwa ihohoterwa rishingiye ku gitsina.”

Ubuskakashatsi bwa DHS buheruka kandi bwgaragaje ko kugeza ubu ijanisha ry’abangavu babyara ryagabanyutse, aho bavuye kuri 7% mu 2015 bakagera kuri 5% mu 2020. Ni imibare Migeprof n’izindi nzego zigaragaza ko ikiri hejuru.

Minisitiri w’Uburinganire n’Iterambere ry’Umuryango, Prof. Bayisenge Jeannette yavuze ko hari impamvu zitera izi nda zirimo kudaha ubushobozi abana b’abakobwa, kutabajyana mu mashuri ndetse n’ibindi birimo ihohoterwa rishingiye ku gitsina bakorerwa
Umuyobozi wa UNFPRA mu Rwanda, Kwabena Asante-Ntiamoah, yavuze ko mu bihe byashize, ikibazo cy’inda zitateguwe cyangwa inda ziterwa abangavu cyakunze guharirwa abagore gusa
Impuguke z'abaharanira uburenganzira bw'abana n'abagore zatanze ibiganiro ku cyakorwa mu kugabanya umubare w'abana b'abakobwa baterwa inda zitateguwe
Hasinywe impuruza ihamagarira abantu bose guhagurukira kurwanya inda zitateguwe
Iki gikorwa cyari cyitabiriwe n'abayobozi batandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .